ဂျန်ဇက် (NSS) - ဇူလိုင် ၈

အင်ဒိုနီးရှားနိုင်ငံ ဆူလာဝေစီကျွန်းရှိ တရားမဝင် တူးဖော်နေတဲ့ ရွှေတွင်းနားမှာ မြေပြိုမှုတွေဖြစ်ပွားခဲ့ရာ အနည်းဆုံး ၁၁ ဦးသေဆုံးကာ ၁၉ ဦးပျောက်ဆုံးနေကြောင်းသိရပါတယ်။ ဆူလာဝေစီကျွန်းမှာ ပြီးခဲ့တဲ့ရက်ပိုင်းက မိုးသည်းထန်စွာရွာသွန်းခဲ့ပြီးနောက် မြေပြိုမှုများဖြစ်ပွားလာခဲ့ခြင်းဖြစ်ပြီး  Gorontalo ဒေသရှိ Bone Bolango ကျေးရွာနားမှာ ဇူလိုင်လ ၆ ရက်နေ့က မြေပြိုမှုများစတင်ဖြစ်ပွားခဲ့ခြင်းဖြစ်ကြောင်းသိရပါတယ်။

လက်ရှိအချိန်မှာ မြေပြိုမှုကြောင့် သေဆုံးခဲ့ရတဲ့ ရုပ်အလောင်း ၈ လောင်းကို ပြန်လည်ဆယ် ယူရရှိထားကြောင်းသိရပါတယ်။ မြေပြိုမှုများကြောင့် တံတားကျိုးမှုတွေလည်းဖြစ်ပွားခဲ့ပြီးကယ်ဆယ်ရေးသမားတွေဟာ မြေပြိုမှုဖြစ်ပွားတဲ့အရပ်ဒေသကို သွားရောက်ဖို့ခက်ခက်ခဲခဲရုန်းကန်ခဲ့ရကြောင်းသိရပါတယ်။ မိုးသည်းထန်စွာရွာသွန်းမှုနဲ့အတူ မြေပြိုမှုများကြောင့်ရေကြီးမှုများလည်းဖြစ်ပွားခဲ့ရာ ဒေသခံများအခက်ခဲဖြစ်နေရကြောင်း အင်ဒိုနီးရှား ဒေသဆိုင်ရာအာဏာပိုင်များက ပြောပါတယ်။

အင်ဒိုနိးရှားအာဏာပိုင်တွေဟာ မြေပြိုမှုများကြောင့် ဒုက္ခရောက်နေရသူတွေကို ကူညီကယ်တင်ပေးနိုင်ဖို့ ရဲတပ်ဖွဲ့များအပါအဝင် လူပေါင်း ၁၈၀ ကို စေလွှတ်ထားကြောင်းသိရပါတယ်။ ပြီးခဲ့တဲ့မေလတုန်းကလည်း ဆူလာဝေစီကျွန်းတောင်ပိုင်းမှာ မြေပြိုမှုတွေဖြစ်ပွားခဲ့ရာ အနည်းဆုံး ၁၅ ဦးသေဆုံးခဲ့ဖူးကြောင်းသိရပါတယ်။ အင်ဒိုနိးရှားနိုင်ံမှာ နိုဝင်ဘာလကနေ ဧပြီလအတွင်း မိုးရာသီအဖြစ်သတ်မှတ်ထားပြီး ဇူလိုင်လဟာ ပုံမှန်ခြောက်သွေ့တဲ့လဖြစ်ပေမယ့် အချိန်မဟုတ် မိုးကြီးမှုများဖြစ်ပွားနေကြောင်း သိရပါတယ်။