Pika (NSS) - ဇွန် ၁၃

တောင်ကိုရီးယားအတိုက်အခံခေါင်းဆောင်လီဟာ ပြည်နယ်အုပ်ချုပ်ရေးမှူးဖြစ်ခဲ့စဉ်အချိန်အတွင်း မြောက်ကိုရီးယားသွားရောက်လည်ပတ်ရာမှာ အဆင်ပြေချောမွေ့စေဖို့နဲ့ မြောက်ကိုရီးယားကို ရန်ပုံငွေလွှဲပြောင်းပေးဖို့အတွက် စီးပွားရေးအုပ်စုတစ်ခုကို အသုံးပြုဖို့ ကြံစည်ခဲ့တယ်ဆိုတဲ့ စွပ်စွဲမှုတွေနဲ့အတူ လာဘ်ပေးလာဘ်ယူမှုနဲ့ ဇွန်လ(၁၂)ရက်နေ့က တရားစွဲဆိုခံခဲ့ရတယ်လို့ သိရပါတယ်။

ဒီမိုကရက်တစ်ပါတီခေါင်းဆောင် Lee Jae-myung ရဲ့ လက်ထောက်ဖြစ်သူ လီဟာ Gyeonggi ပြည်နယ်အုပ်ချုပ်ရေးမှူးဖြစ်ခဲ့စဉ်အချိန်အတွင်း မြောက်ကိုရီးယားကို အမေရိကန်ဒေါ်လာ(၈)သန်းပေးပို့ဖို့အတွက် Ssangbangwool စီးပွားရေးအုပ်စုပါဝင်တဲ့ ပူးပေါင်းကြံစည်မှုမှာ တရားမဝင်ရန်ပုံငွေလွှဲပြောင်းမှု၊ လာဘ်ပေးလာဘ်ယူမှုတို့နဲ့ အပြစ်ရှိကြောင်း တွေ့ရှိထားပြီးဖြစ်တယ်လို့လည်း သိရပါတယ်။ Ssangbangwool ဟာ အတွင်းခံထုတ်လုပ်တဲ့စီးပွားရေးနဲ့စတင်ခဲ့ပြီး အခြားစီးပွားရေးလုပ်ငန်းတွေကို တိုးချဲ့ခဲ့တဲ့ စီးပွားရေးအုပ်စုတစ်ခုဖြစ်ပါတယ်။၂၀၁၉ ခုနှစ်နဲ့ ၂၀၂၂ ခုနှစ်တို့မှာဖြစ်ပွားခဲ့တဲ့ လျှို့ဝှက်ကြံစည်မှုတွေမှာ ပါဝင်တာမျိုးမရှိဘူးလို့ လီက ငြင်းဆိုထားပါတယ်။

ဒါ့ပြင် မြောက်ကိုရီးယားကို သွားရောက်လည်ပတ်ခြင်းဟာ ကုန်သွယ်မှုနဲ့ဆိုင်တဲ့ပရောဂျက်ကို မြှင့်တင်နိုင်ဖို့ ရည်ရွယ်ထားတာဖြစ်တယ်လို့ လီကပြောဆိုခဲ့ပါတယ်။ လီက'ကျွန်တော်က အရူးတစ်ယောက်မဟုတ်ပါဘူး။ အစိုးရရှေ့နေတွေရဲ့ ဖန်တီးနိုင်စွမ်းက ပိုမိုဆိုးရွားလာပါတယ်'လို့ ပြောဆိုခဲ့ပါတယ်။ လီဟာ ၂၀၂၂ ခုနှစ်မှာ ကျင်းပခဲ့တဲ့ သမ္မတရွေးကောက်ပွဲမှာ ဒီမိုကရက်တစ်ပါတီရဲ့ကိုယ်စားလှယ်လောင်းအဖြစ် ပါဝင်ယှဉ်ပြိုင်ခဲ့ပေမယ့်လည်း အစိုးရရှေ့နေဖြစ်တဲ့ လက်ရှိသမ္မတ ယွန်ဆက်ယိုလ်ကို ရှုံးနိမ့်ခဲ့တယ်လို့လည်း သိရပါတယ်။ လီဟာ ဆိုးလ်မြို့အနီးမှာရှိတဲ့ မြို့တစ်မြို့ရဲ့မြို့တော်ဝန်အဖြစ် တာဝန်ထမ်းဆောင်ချိန်ကနေစတင်ပြီး အကျင့်ပျက်ခြစားမှုတွေနဲ့ သီးခြားရုံးတင်စစ်ဆေးမှုကို ခံနေရတယ်လို့လည်း သိရပါတယ်။