ရောင်နီ (NSS) - ဇွန် ၁ဝ 

အင်ဒိုနီးရှားနိုင်ငံ အလယ်ပိုင်းမှာ အမျိုးသမီးတစ်ဦး တစ်ကိုယ်လုံး စပါးအုံးမြွေ မျိုချခံရပြီး သေဆုံးမှု ဖြစ်ပွားခဲ့ တယ်လို့ ဒေသဆိုင်ရာတာဝန်ရှိသူတစ်ဦးက ဇွန် ၈ ရက်မှာ ပြောကြားခဲ့ပါတယ်။ သေဆုံးသူဟာ အသက် ၄၅ နှစ် အရွယ်အမျိုးသမီးဖြစ်ပြီး ဆူလာဝီစီ ပြည်နယ်၊ တောင်ပိုင်း၊ ကန်လန်ပန် ကျေးရွာမှာ နေထိုင်သူဖြစ်ပါတယ်။ 

သူမရဲ့အလောင်းကို ၅ မီတာ အရှည်ရှိ reticulated စပါးအုံးမြွေရဲ့ ခန္ဓာကိုယ် ဝမ်းဗိုက်ထဲမှာ ဇွန်လ ၇ ရက်က တွေ့ရှိခဲ့ခြင်းဖြစ်ပါတယ်။ အမျိုးသမီးဟာ ဇွန်လ ၆ ရက် ညပိုင်းက ပျောက်ဆုံးသွားခဲ့တာဖြစ်ပြီး ရွာသားတွေက ရှာဖွေမှုတွေပြုလုပ်ခဲ့ရာ နောက်ပိုင်းမှာ ဝမ်းဗိုက်ဖောင်းပြီး မရွေ့နိုင်ဖြစ်နေတဲ့ စပါးကြီးမြွေကိုတွေ့ခဲ့တာ ဖြစ်ပါတယ်။ အဲဒီနောက် ရွာသားတွေက စပါးအုံးမြွေရဲ့ အစာအိမ်ဝမ်းဗိုက်ကို ဖောက်ထုတ်ကြည့်ဖို့ သဘာတူခဲ့ ကြပြီး ဝမ်းဗိုက်ကို စဖောက်ချိန်မှာပဲ သေဆုံးသူ အမျိုးသမီးရဲ့ဦးခေါင်းကို ချက်ချင်း မြင်တွေ့ခဲ့ရတယ်လို့ သိရပါတယ်။ 

မြွေမှ လူကို မျိုခြင်းဖြစ်ရပ်ဟာ ရှားပါးတယ်လို့ ဆိုနိုင်ပေမယ့် အင်ဒိုနီးရှားမှာတော့ ပြီးခဲ့တဲ့နှစ်တွေအတွင်း အလားတူဖြစ်ရပ်နဲ့ လူသေဆုံးမှုတွေ ရှိခဲ့ပါတယ်။