Pearl (NSS) - ဧပြီ ၂၂

ကိုယ်ပိုင်ပြဋ္ဌာန်းခွင့်တို့ဖြင့် အောက်ခြေမှစတင်သော အုပ်ချုပ်မှုပြုပြင်ပြောင်းလဲရေးကို စတင်ဆောင်ရွက်နေပြီဟု ရှမ်းပြည်ပြန်လည်ထူထောင်ရေးကောင်စီ၊ ဗဟိုအလုပ်အမှုဆောင်ကော်မတီ က ယနေ့ (ဧပြီလ ၂၂ ရက်) တွင် အသိပေးထုတ်ပြန်ထားသည်။

RCSS/SSA ၏ ဥက္ကဋ္ဌ ဗိုလ်ချုပ်ကြီး ယွက်စစ်က အဖွဲ့အစည်းလှုပ်ရှားထိန်းချုပ်ရာ နယ်မြေများအတွင်းရှိ ပြည်သူများနှင့်တွေ့ဆုံခြင်း၊ တပ်မဟာနယ်မြေအသီးသီးတွင် စစ်ပညာသင်ယူနေသော တပ်သားသစ်များနှင့်တွေ့ဆုံခြင်းတို့ကို  မတ်လနှင့် ဧပြီလအတွင်း ဆောင်ရွက်ခဲ့ကြောင်း သိရသည်။  

ဗိုလ်ချုပ်ကြီး ယွက်စစ်အနေဖြင့်  စစ်ပညာသင်ယူနေသည့် လူငယ်များကို အမျိုးသားရေးဆိုင်ရာ တာဝန်များ၊ ရှမ်းပြည်နှင့် ဇာတိရပ်ရွာအပေါ် တန်ဖိုးထားမှုများ မှန်ကန်စွာ သိမြင်စေရန်၊ မိမိကိုယ်ကို နှင့် မိမိရပ်ရွာကို ကိုယ်တိုင်ကာကွယ်နိုင်သည်အထိ အခြေခံစစ်ပညာကို စနစ်တကျသင်ကြားတတ်မြောက်ရန်အတွက် တွေ့ဆုံခဲ့ခြင်းဖြစ်သည်ဟု အထက်ပါ ကော်မတီက ဆိုသည်။ 

ထို့ပြင် ဖြတ်သန်းခဲ့ပြီးသော နိုင်ငံရေးဆွေးနွေးပွဲများမှ ထွက်ပေါ်လာသည့် သဘောတူညီချက်များကို လက်တွေ့စတင်အကောင်အထည်ဖော်ရန်၊ အထူး သဖြင့် ဒေသန္တရအဆင့်မှ အခြေခံတကျ ပြင်ဆင်တည်ဆောက်နိုင်ရန်အတွက် သွားရောက်ခဲ့ခြင်း ဖြစ်သည်ဟုလည်း ထုတ်ပြန်ထားသည်။ 

 RCSS/SSA  ထိန်းချုပ်ရာ နယ်မြေဒေသအတွင်းရှိ အခြေခံ စစ်ပညာ သင်တန်းများ၌ တပ်သားသစ် (၆၀၀၀)ဦး သင်တန်းတတ်ရောက်နေကြောင်းလည်း သိရသည်။ လက်ရှိတွင်  RCSS အနေဖြင့် ဒေသအတွင်းတည်ငြိမ်ရေး၊ ဖက်ဒရယ်ဒီမိုကရေစီ နည်းလမ်းတကျ တန်းတူရေးနှင့် ကိုယ်ပိုင်ပြဋ္ဌာန်းခွင့် တို့ဖြင့် အောက်ခြေမှစတင်သော အုပ်ချုပ်မှုပြုပြင်ပြောင်းလဲရေးကို စတင်ဆောင်ရွက်နေပြီဖြစ်ကြောင်း ထုတ်ပြန်ထားသည်။

ထို့ပြင် ပြီးခဲ့သော ကာလအတွင်း၌ RCSS ထိန်းချုပ်ရာဒေသများတွင် အုပ်ချုပ်ရေးလုပ်ငန်းများကို စတင်အကောင်အထည်ဖော်ရန် ဗိုလ်ချုပ်ကြီး ယွက်စစ်အနေဖြင့် ထုတ်ဖော်ပြောဆိုခဲ့ဖူးသည်။ ဗိုလ်ချုပ်ကြီး ယွက်စစ် ဦးဆောင်သော RCSS လက်နက်ကိုင်အဖွဲ့သည် လက်ရှိ နစက အစိုးရနှင့် ငြိမ်းချမ်းရေး တွေ့ဆုံဆွေးနွေးမှုများ ပြုလုပ်ထားသည့် လက်နက်ကိုင်အဖွဲ့အစည်းတစ်ခုလည်းဖြစ်သည်။