Pika(NSS) - ဧပြီ ၂၂

ဆီးရီးယားနိုင်ငံ အရှေ့မြောက်ပိုင်းမှာရှိတဲ့ အမေရိကန်စစ်အခြေစိုက်စခန်းဟာ ဒုံးကျည်အနည်းဆုံး(၅)စင်းနဲ့ ပစ်ခတ်တိုက်ခိုက်ခံခဲ့ရတယ်လို့ အမည်မဖော်လိုတဲ့အီရတ်လုံခြုံရေးအရာရှိနှစ်ဦးရဲ့ ပြောကြားချက်ကို ကိုးကားပြီး ရိုက်တာသတင်းဌာနက ဧပြီလ(၂၁)ရက်နေ့မှာ ဖော်ပြခဲ့ပါတယ်။

ဒါပေမဲ့လည်း အဲဒီတိုက်ခိုက်မှုအတွင်း လူအသေအပျောက် ရှိ/မရှိဆိုတာကိုတော့ လက်ရှိအချိန်အထိ အတည်ပြုနိုင်တာမျိုးမရှိသေးဘူးလို့လည်း သိရပါတယ်။ ဒါ့ပြင် အမေရိကန်တပ်ဖွဲ့တွေအပေါ် တိုက်ခိုက်မှုတွေကို ပြန်လည်စတင်ဖို့ ဆုံးဖြတ်ခဲ့တယ်လို့ အီရတ်အခြေ စိုက် Kataib Hezbollah လက်နက်ကိုင်အဖွဲ့က နောက်ပိုင်းမှာ ကြေညာချက်ထုတ်ပြန်ခဲ့ပါတယ်။ Kataib Hezbollah လက်နက်ကိုင်အဖွဲ့က 'မကြာသေးမီက ဖြစ်ခဲ့တဲ့ အဖြစ်အပျက်ဟာ အစပဲရှိပါသေးတယ်'လို့ ပြောကြားခဲ့ပါတယ်။ အမေရိကန်ဟာ အီရတ်နဲ့ဆီးရီးယားတို့မှာရှိတဲ့ ဒါဇင်နဲ့ချီတဲ့ ပစ်မှတ်တွေကို လက်တုံ့ပြန်တိုက်ခိုက်မှုတွေ ဆက်တိုက်လုပ်ဆောင်ပြီးတဲ့နောက်မှာတော့ အီရန်ကျောထောက်နောက်ခံပြု Kataib Hezbollah လက်နက်ကိုင်အဖွဲ့ဟာ ဒေသတွင်းမှာရှိတဲ့ အမေရိကန်စစ်စခန်းတွေအပေါ် တိုက်ခိုက်မှုတွေကို ပြီးခဲ့တဲ့ဖေဖော်ဝါရီလမှာ ရပ်တန့်ခဲ့ပါတယ်။ စစ်သွေးကြွအဖွဲ့တွေဟာ အစ္စရေး-ဟားမက်စစ်ပွဲစတင်ဖြစ်ပွားခဲ့တဲ့ ပြီးခဲ့တဲ့နှစ် အောက်တိုဘာလနဲ့ ယခုနှစ်ဖေဖော်ဝါရီလအတွင်း အရှေ့အလယ်ပိုင်းဒေသမှာရှိတဲ့ အမေရိကန်တပ်ဖွဲ့တွေကို ဒုံးကျည်တွေ၊ ဒရုန်းတွေနဲ့ အကြိမ်ပေါင်း(၁၅၀)ကျော် ပစ်ခတ်တိုက်ခိုက်ခဲ့ပါတယ်။

ပြီးခဲ့တဲ့လတွေအတွင်း ဂျော်ဒန်နိုင်ငံမှာရှိတဲ့ အမေရိကန်စစ်အခြေစိုက်စခန်းကို စစ်သွေးကြွအဖွဲ့တွေက ပစ်မှတ်ထားတိုက်ခိုက်ခဲ့တာကြောင့် စစ်သား(၃)ဦးသေဆုံးပြီး အခြားစစ်သား (၄၀)ဦး ထိခိုက်ဒဏ်ရာရရှိခဲ့တယ်လို့လည်း သိရပါတယ်။ ဧပြီလ(၂၁)ရက်နေ့က ဖြစ်ပွားခဲ့တဲ့ တိုက်ခိုက်မှုအတွင်း သေးငယ်သော ထရပ်ကားပေါ်မှာတပ်ဆင်ထားတဲ့ ဒုံးကျည်လောင်ချာတစ်ခုလည်းပါဝင်ခဲ့တယ်လို့ ရိုက်တာသတင်းဌာနကပြောကြားခဲ့ပါတယ်။ အဲဒီထရပ်ကားဟာ မပစ်လွှတ်ရသေးတဲ့ ဒုံးကျည်ပေါက်ကွဲမှုနဲ့အတူ မီးလောင်ကျွမ်းသွားခဲ့တယ်လို့ အီရတ်စစ်ဘက်အရာရှိတစ်ဦးကပြောကြားခဲ့ပါတယ်။ ဒါ့ပြင် အမည်မသိတဲ့ စစ်သွေးကြွတွေဟာ အခြားယာဉ်တစ်စီးနဲ့ ထွက်ပြေးသွားခဲ့တယ်လို့လည်း သိရပါတယ်။ အီရတ်နိုင်ငံ Baghdad မြို့မြောက်ဖက်မှာရှိတဲ့ အီရတ်စစ်ဌာနချုပ်တစ်ခုမှာ အသေခံဗုံးခွဲမှုဖြစ်ပွားပြီးတော့ တစ်ရက်အကြာမှာ ဒီတိုက်ခိုက်မှုတွေ ထွက်ပေါ်လာတာလည်းဖြစ်ပါတယ်။ အသေခံဗုံးခွဲမှုအတွင်း အီရတ်ရဲ့ Popular Mobilization Units (PMU)က အဖွဲ့ဝင်တစ်ဦးသေဆုံးခဲ့ပြီး အခြားလူ(၈)ဦး ထိခိုက်ဒဏ်ရာရရှိခဲ့တယ်လို့လည်း သိရပါတယ်။ အဆိုပါ အသေခံဗုံးခွဲမှုမှာ ပါဝင်ပတ်သက်တာမျိုးမရှိဘူးလို့ အစ္စရေးနဲ့အမေရိကန်စစ်ဘက်အရာရှိတွေက ထုတ်ပြန်ပြောဆိုထားပါတယ်။