NSS - ဧပြီ ၁၅ 

ပြင်ဦးလွင်မြို့တွင် ဧပြီလ ၁၄ ရက်(မဟာသင်္ကြန်အကျနေ့) ည ၇ နာရီဝန်းကျင်အချိန်ခန့်က TNLA/PDF ပူးပေါင်းအဖွဲ့၏ ရှော့တိုက်ဒုံးများဖြင့် ပစ်ခတ်မှုကြောင့် ဘုန်းကြီးကျောင်းတစ်ကျောင်းနှင့် ပြည်သူ့ဆေးရုံ အရိုးကုသဆောင်တွင် ရှော့တိုက်ဒုံးထိမှန်ခဲ့ရာ သံဃာတော်နှစ်ပါး ပျံလွန်တော်မူခဲ့ရပြီး၊ အရပ်သားတစ်ဦးသေဆုံးကာ ဆေးကုသမှုခံယူနေသည့် လူနာ ၁၁ ဦးခန့် ထိခိုက်ဒဏ်ရာများ ရရှိခဲ့ကြောင်း သတင်းရရှိသည်။ 

“ပစ်ခတ်သံတွေက ညတုန်းက တော်တော်ကြားရတယ်။ ကျွန်မတို့ဘက်နဲ့က နည်းနည်းတော့ ဝေးတယ်ဆိုပေမယ့်လည်း အသံတွေ ကြားနေရတော့ ကြောက်တော့လည်း ကြောက်တာပေါ့၊ ပြင်ဦးလွင်မှာက ဒါမျိုး ဖြစ်လေ့ဖြစ်ထတော့ မရှိဘူးလေ။ ပြီးတော့ တပ်ချုပ်ရောက်နေတယ်လို့လည်း ကြားထားတယ်” လို့ ပြင်ဦးလွင် ဒေသခံတစ်ဦးက NP News ကို ပြောသည်။ 

TNLA/PDF ပူးပေါင်းအဖွဲ့၏ ရှော့တိုက်ဒုံးများဖြင့် ပစ်ခတ်မှုတွင် ပြင်ဦးလွင်မြို့ နေရာ ငါးနေရာထက်မနည်း ကျရောက်ပေါက်ကွဲခဲ့ကြောင်း သိရသည်။ 

ယင်းသို့ ပစ်ခတ်မှုကြောင့် အောင်မြေဇေယျာဘုန်းကြီးကျောင်းအား ထိမှန်ခဲ့ရာ ကျောင်းတွင်း သီတင်းသုံးနေထိုင်သည့်  သံဃာတော်နှစ်ပါး ပျံလွန်တော်မူခဲ့ရပြီး လူပုဂ္ဂိုလ်တစ်ဦး သေဆုံးခဲ့ရကာ နှစ်ဦးဒဏ်ရာရရှိခဲ့ကြောင်း၊ ပြင်ဦးလွင်ပြည်သူ့ဆေးရုံအရိုးကုသဆောင်ပေါ်သို့ ကျရောက်ပေါက်ကွဲမှုကြောင့် အရပ်သားလူနာ ၁၁ ဦး ဒဏ်ရာရရှိခဲ့ကြောင်း၊ အခြားသော ဆေးကုသဆောင်အချို့လည်း လက်နက်ကြီးကျည်ထိမှန်၍ ပျက်စီးမှုများ ရှိခဲ့ကြောင်း သတင်းရထားသည်။

အဆိုပါနေ့ နံနက်ပိုင်းတွင် မန္တလေးမြို့ လမ်းလျှောက်သင်္ကြန်ပွဲတော် အဝင်ပေါက်ရှိ ဆိုင်ကယ်စတန်းနေရာတွင် အကြမ်းဖက်သမားများ၏ ဗုံးထောင်ပေါက်ကွဲမှုကြောင့် ကလေးငါး ဦး အပါအဝင် ၁၂ ဦး ထက်မနည်း ထိခိုက်ဒဏ်ရာများ ရရှိခဲ့သည့်ဖြစ်စဥ်ဖြစ်ပွားခဲ့သည်။