ဂျန်ဇက် (NSS) - ဧပြီ ၁ဝ

အစ္စရေးနိုင်ငံဟာ အီရန်နိုင်ငံရဲ့နျူကလီးယား လုပ်ဆောင်နေတဲ့နေရာတွေကို တိုက်ခိုက်ဖို့ အဆင်သင့်ရှိနေကြောင်း ဗြိတိန်မီဒီယာတွေက ဖော်ပြထားပါတယ်။

အီရန်ဟာ ဆီးရီးယားနိုင်ငံရှိ အီရန်သံရုံးတိုက်ခိုက်ခံရမှုတွေနဲ့ပတ်သက်ပြီး လက်တုံ့ပြန်မယ်ဆိုရင် အစ္စရေးဟာ အီရန်ရဲ့နျူကလီးယားအစီအစဉ်တွေကို ပစ်မှတ်ထားတိုက်ခိုက်သွားဖွယ်ရှိနေကြောင်း လန်ဒန်အခြေစိုက်မီဒီယာ တွေက ဖော်ပြထားပါတယ်။

အစ္စရေးဟာ ဧပြီလအစောပိုင်းက ဆီးရီးယားနိုင်ငံကိုလေကြောင်းက ဗုံးကြဲတိုက်ခိုက်ခဲ့ရာ အီရန်ဗိုလ်ချုပ်နှစ်ဦး အပါအဝင် လူအများအပြား သေဆုံးခဲ့ကြောင်း သိရပါတယ်။ အီရန်ဘာသာရေးခေါင်းဆောင်က အစ္စရေးဟာ ၎င်းတို့ လုပ်ဆောင်ခဲ့တဲ့အတိုင်း တုံ့ပြန်ခံရဖွယ်ရှိနေကြောင်း မကြာသေးမီက သတိပေးခဲ့ပါတယ်။ 

ဒါပေမယ့် ဗြိတိန်အခြေစိုက်  Elaph News သတင်းဌာနက အစ္စရေးဟာ အီရန်ရဲ့နျူကလီးယားအစီအစဉ်တွေ လုပ်ဆောင်နေတဲ့နေရာတွေကို လေကြောင်းက တိုက်ခိုက်ဖို့ လေယာဉ်မှူးတွေကို အထူးလေ့ကျင့်သင်ကြားပေးနေ ကြောင်း ဖော်ပြထားပါတယ်။ ဗြိတိန်အခြေစိုက် The Sun သတင်းဌာနက အစ္စရေးရဲ့တိုက်ခိုက်မှုတွေဟာ အရှေ့ အလယ်ပိုင်းဒေသအတွင်းမှာ တင်းမာမှုတွေပိုမိုဖြစ်လာဖွယ်ရှိနေပြီး အမေရိကန်အစိုးရက အစ္စရေးရဲ့တိုက်ခိုက်မှု တွေကို ကူညီထောက်ပံ့ပေးဖွယ်ရှိနေကြောင်း ဖော်ပြထားပါတယ်။ 

အမေရိကန်ထောက်လှမ်းရေးအဖွဲ့တွေက အီရန်ဟာ ရာမာဒန် ကာလပြီးဆုံးချိန်မှာ အစ္စရေးနိုင်ငံရှိ အခြေခံ အဆောက်အဦးကို ဒရုန်းတွေနဲ့တိုက်ခိုက်လာဖွယ်ရှိနေကြောင်း မကြာသေးမီက သတင်းထုတ်ပြန်ခဲ့ပါတယ်။ ဂါဇာစစ်ပွဲဖြစ်ပွားလာခဲ့ပြီးနောက်ပိုင်းတည်းက အစ္စရေးနဲ့ အီရန်တို့ဟာ တင်းမာမှုအရှိန်မြင့်တက်လာခဲ့ပြီး အစ္စရေး ရဲ့ဆီးရီးယားနိုင်ငံကို တိုက်ခိုက်မှုတွေအတွင်း အီရန်ဗိုလ်ချုပ်တွေ သေဆုံးခဲ့ရကြောင်း သိရပါတယ်။