Pika (NSS) - မတ် ၂၈

အမေရိကန်နိုင်ငံ အီလီနွိုက်ပြည်နယ်တွင် မတ်လ(၂၇)ရက်က ဓါးထိုးမှုဖြစ်ပွားခဲ့ရာ အနည်း ဆုံးလူ(၄)ဦးသေဆုံးခဲ့ပြီး အခြားလူ(၇)ဦးထိခိုက်ဒဏ်ရာရရှိခဲ့ကြောင်း အာဏာပိုင်များက ထုတ်ပြန်ပြောကြားခဲ့သည်။

အဆိုပါဖြစ်ရပ်နှင့်ပတ်သက်ပြီး အသက်(၂၂)နှစ်အရွယ် အမျိုးသားကို ဖမ်းဆီးထိန်းသိမ်းထားကာ မတ်လ(၂၇)ရက်၊ ညနေပိုင်းတွင် စစ်ဆေးမေးမြန်းမှုများကို လုပ်ဆောင်နေကြောင်း Rockford မြို့ရဲမှူးချုပ် Carla Redd က ပြောကြားခဲ့သည်။ ထို့ပြင် ထိခိုက်ဒဏ်ရာရရှိသူများထဲမှာ တစ်ဦးမှာစိုးရိမ်ရသည့်အခြေအနေတွင်ရှိကြောင်း ၎င်းကပြောကြားခဲ့သည်။ ၎င်းက 'ဒီဖြစ်ရပ်အတွင်းမှာ အသက်ဆုံးရှုံးသွားခဲ့တဲ့သူတွေရဲ့ မိသားစုဝင်တွေအတွက် ကျွန်မတကယ်ကို စိတ်မကောင်းဖြစ်မိပါတယ်'ဟု ပြောဆိုခဲ့သည်။ Rockford မြို့ ရဲတပ်ဖွဲ့သည် မတ်လ (၂၇)ရက်၊ နေ့လည်(၁)နာရီ(၁၄)မိနစ်တွင် ဖုန်းခေါ်ဆိုမှုကို လက်ခံရရှိခဲ့ကြောင်း ၎င်းကပြောကြားခဲ့သည်။

၎င်းက 'ဒီဖြစ်ရပ်နဲ့ပတ်သက်ပြီး ထွက်ပြေးနေတဲ့သူ ဒါမှမဟုတ် အခြားသံသယရှိသူတွေ မရှိတော့ဘူးလို့ကျွန်မထင်ပါတယ်။ ဒီလိုရာဇဝတ်မှုကို ကျူးလွန်ဖို့ အဲဒီအမျိုးသားကို ဘယ်အရာက တွန်းအားပေးခဲ့လဲဆိုတာကိုလည်း ကျွန်မတို့ရှင်းရှင်းလင်းလင်းမသိရှိရသေးပါဘူး' ဟု ပြောဆိုခဲ့သည်။ အဆိုပါဖြစ်ရပ်အတွင်း သေဆုံးခဲ့သူများမှာ အသက်(၁၅)နှစ်အရွယ်မိန်းကလေး၊ အသက်(၆၃)နှစ်အရွယ် အမျိုးသမီးတစ်ဦး၊ အသက်(၄၉)နှစ်အရွယ် အမျိုးသားတစ်ဦး နှင့် အသက်(၂၂)နှစ်အရွယ် အမျိုးသားတစ်ဦးတို့ဖြစ်ကြောင်းသိရသည်။ သို့သော် လည်း ၎င်းတို့၏နာမည်ကို တာဝန်ရှိသူများက ထုတ်ပြန်ပြောဆိုခဲ့ခြင်းမျိုးမရှိခဲ့ကြောင်းသိရသည်။