NSS - မတ် ၂၆

မကွေးတိုင်း၊ စလင်းမြို့နယ်တွင် ကျေးရွာတာဝန်ခံအမျိုသားတစ်ဦးကို အကြမ်းဖက်အဖွဲ့က ဖမ်းဆီးခေါ်ဆောင်က သေနတ်ဖြင့် ပစ်ခတ်သတ်ဖြတ်သွားခဲ့ကြောင်း လုံခြုံရေးအဖွဲ့နှင့် နီးစပ်သူများထံမှ သိရသည်။

ဖြစ်စဉ်မှာ ယနေ့(မတ်လ ၂၆ ရက်) နံနက်အစောပိုင်း ၁၂ နာရီ ၃၅ မိနစ်အချိန်တွင်  စလင်းမြို့နယ်၊ ကျွန်းရင်း ကျေးရွာမြောက်ဘက်၊ သရက်တော-ဆင်ဖြူကျွန်းသွားမြေနီးလမ်း၏ ဝဲဘက်ခြမ်းဇရပ်အနီး၌ အထက်ပါကဲ့သို့ ဖြစ်ပွားခဲ့ခြင်းဖြစ်ကြောင်း သိရသည်။

စလင်းမြို့နယ်၊ ကံရွှေကူကျေးရွာအုပ်စု၊ ပန်းပြင်ကျေးရွာတွင်နေထိုင်သည့် အသက်(၅၅)နှစ်အရွယ် ကျေးရွာခွဲ တာဝန်ခံ ဦးလူမြင့်(ခ)ဦးမှုံစီ သည် ၎င်း၏ နေအိမ်၌ရှိနေစဉ် သေနတ်များကိုင်ဆောင်လာသော အကြမ်းဖက်သမား (၄)ဦး က ဆိုင်ကယ်(၂)စီးဖြင့် ရောက်ရှိလာခဲ့ကြောင်း သိရသည်။

အဆိုပါအကြမ်းဖက်သမား(၄)ဦးက တာဝန်ခံရှိလားဟုမေးမြန်းကာ ဦးလူမြင့်(ခ)ဦးမှုံစီကို ထိုးကြိတ်ရိုက်နှက်ကာ လက်ပြန်ကြိုးတုတ်၍ ဖမ်းဆီးခေါ်ဆောင်သွားခဲ့ကြောင်း သိရသည်။

ထို့နောက် လိုက်လံရှာဖွေခဲ့ရာ ဦးလူမြင့်(ခ)ဦးမှုံစီကို ယနေ့ နံနက် ၇ နာရီ ၃ဝ မိနစ်အချိန်တွင် အခင်းဖြစ်နေရာ၌ လက်ပြန်ကြိုးတုတ်ခံရ၍ ဦးခေါင်းဝဲဘက်ထိပ် ကျည်ဖောက်ဝင်ဒဏ်ရာတစ်ချက်၊ ဝဲဘက်ပါးရိုးကျည်ဖောက်ဝင် ဒဏ်ရာတစ်ချက်တို့ဖြင့် ဦးနှောက်ပွင့်ထွက်ကာ သေဆုံးနေသည်ကို တွေ့ရှိခဲ့ရကြောင်း သိရသည်။

ထို့ကြောင့် သေဆုံးသူအမျိုးသား၏ ရုပ်အလောင်းအား စလင်းမြို့ပြည်သူ့ ဆေးရုံသို့ သယ်ယူပို့ဆောင်ထားရှိပြီး ပြစ်မှုကျူးလွန်သူများအား ဖော်ထုတ်ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းစစ်ဆေးလျက်ရှိကြောင်း သိရသည်။