သန့်ဇင် (NSS) - မတ် ၂၄

ရန်ကုန်တိုင်း၊ အင်းစိန်မြို့နယ်တွင် ဖောကား နှင့် ALPHARD တို့ မျက်နှာချင်းဆိုင် ယာဉ်တိုက်မှုဖြစ်ပွားခဲ့ရာ တစ်ဦးထိခိုက်ဒဏ်ရာ ရရှိခဲ့ကြောင်း တွဲလက်လူမှုကူညီရေးအသင်းထံမှ သိရသည်။

ယာဉ်တိုက်မှုသည် ယမန်နေ့ (မတ်လ ၂၃ ရက်)၊ မွန်လွဲ ၁ နာရီ ၄၅ မိနစ်အချိန်တွင် အင်းစိန်မြို့နယ်၊ ထန်းပင်ကုန်း လမ်းဆုံ မီးပွိုင့်အနီး၊ ပြည်လမ်းပေါ်တွင် ဖြစ်ပွားခဲ့ခြင်း ဖြစ်ကြောင်း သိရသည်။

“ဖောကားက စော်ဘွားကြီးကုန်းကနေ  မင်္ဂလာဒုံကို အတက်မှာ အရှိန်လွန်ပြီးတော့ လမ်းလယ်ကတုံးတွေနဲ့ ဓာတ်တိုင်တွေကို ဝင်တိုက်တာ။ ပြီးတော့ မင်္ဂလာဒုံဘက်က ဆင်းလာတဲ့ ALPHARD ကို မျက်နှာချင်းဆိုင် ဝင်တိုက် ပြီး လမ်းဘေးထိုးဆင်းသွားတာ” ဟု တွဲလက်လူမှုကူညီရေးအသင်းမှ တာဝန်ရှိသူတစ်ဦးက NP News ကို ပြော သည်။

အဆိုပါ ယာဉ်တိုက်မှုဖြစ်စဉ်ကြောင့် ALPHARD ကားပေါ်မှ အသက်(၄၂)နှစ်အရွယ် ယာဉ်မောင်းအမျိုးသား၌ ယာဘက်ပါးပွန်းပဲ့ဒဏ်ရာ၊ ယာလက်ဖျံ နှင့် ယာပုခုံးတို့ ထိခိုက်ဒဏ်ရာများရရှိခဲ့ကြောင်း သိရသည်။

“ထိခိုက်ဒဏ်ရာရတဲ့အမျိုးသားကတော့ မစိုးရိမ်ရပါဘူး။ အရင်တုန်းကလည်း အဲဒီနားကခဏခဏဖြစ်တယ်။ အခုလထဲမှာပဲ စိမ်းစားဥတွေ တင်လာတဲ့ Light Truck ကားတစ်စီး ဓာတ်တိုင် ဝင်တိုက်ထားသေးတယ်။ အကြံပြု ချင်တာကတော့ ယာဉ်ကိုစည်းကမ်းနဲ့ မောင်းစေချင်တယ်။ ပြီးတော့အရက်သောက်ပြီး မောင်းတာတွေ မလုပ်စေ ချင်ဘူး” ဟု ၎င်းက အကြံပြုပြောထားသည်။

ထို့ကြောင့် ထိခိုက်ဒဏ်ရာရရှိသူအမျိုးသားကို တွဲလက်လူမှုကူညီရေးအသင်းက အင်းစိန်မြို့နယ်ပြည်သူ့ဆေးရုံသို့ ပို့ဆောင်ကူညီပေးခဲ့ကြောင်း သိရသည်။