Pika (NSS) - မတ် ၂၁

မြောက်ကိုရီးယားနိုင်ငံ၏ နိုင်ငံခြားငွေရရှိမှု (၅၀)ရာခိုင်နှုန်းဝန်းကျင်ကို ဒစ်ဂျစ်တယ်ငွေကြေးကုမ္ပဏီများအပါအဝင် ဆိုက်ဘာတိုက်ခိုက်မှုများမှ ရရှိနေကြောင်း ကုလသမဂ္ဂလုံခြုံရေးကောင်စီက မတ်လ(၂၁)ရက်တွင် ထုတ်ပြန်ပြောကြားခဲ့သည်။

၂၀၁၇ ခုနှစ်မှ ၂၀၂၃ ခုနှစ်အတွင်း ဒစ်ဂျစ်တယ်ငွေကြေးနှင့်ဆက်စပ်သည့် ကုမ္ပဏီများအပေါ် သံသယဖြစ်ဖွယ် ဆိုက်ဘာတိုက်ခိုက်မှု(၅၈)ခုကို အကဲ ဖြတ်ခဲ့သည့် ကုလသမဂ္ဂလုံခြုံရေးကောင်စီ၏ အစီရင်ခံစာတွင် မြောက်ကိုရီးယား၏ ဆိုက်ဘာတိုက်ခိုက်မှုများကြောင့် အမေရိကန်ဒေါ်လာ(၃)ဘီလျံနှင့်ညီမျှသော ဆုံးရှုံးမှုကို ဖြစ်ပေါ်စေခဲ့သည်ဟု ဖော်ပြခဲ့ကြောင်း Yonhap သတင်းအေဂျင်စီက ရေးသားဖော်ပြခဲ့သည်။ မြောက်ကိုရီးယားအစိုးရသည် အဆိုပါငွေကြေးများကို ကြီးမားသောပျက်စီးမှုကို ဖြစ်ပေါ်စေမည့် လက်နက်များထုတ်လုပ်ရန် ကုန်ကျစရိတ်၏(၄၀)ရာခိုင်နှုန်းဝန်းကျင်တွင် အသုံးပြုခဲ့ကြောင်း အစီရင်ခံစာတွင်ရေးသားဖော်ပြထားသည်။

အဆိုပါကိစ္စများနှင့်ပတ်သက်ပြီး ကုလသမဂ္ဂလုံခြုံရေးကောင်စီသည် မြောက်ကိုရီးယားအပေါ် နောက်ထပ်ပိတ်ဆို့အရေးယူမှုများကို ချမှတ်သွားနိုင်ဖွယ်ရှိကြောင်း Nikkei သတင်းစာက ရေးသားဖော်ပြခဲ့သည်။ ကုလ သမဂ္ဂလုံခြုံရေးကောင်စီက ထုတ်ပြန်ခဲ့သော အစီရင်ခံစာသည် ပြီးခဲ့သည့်နှစ်တွင် ထုတ်ပြန်ခဲ့သော အမေရိကန်၏ခန့်မှန်းမှုများနှင့် ကိုက်ညီကြောင်းသိရသည်။ မြောက်ကိုရီးယားနိုင်ငံ၏ နိုင်ငံခြားငွေရရှိမှု ထက်ဝက်ခန့်သည် ဆိုက်ဘာတိုက်ခိုက်မှုများမှ ရရှိခြင်းဖြစ်ကြောင်း အမေရိကန်အစိုးရအကြီးတန်းအရာရှိတစ်ဦးက ပြီးခဲ့သည့်နှစ် ဇွန်လတွင် ထုတ်ပြန်ပြောဆိုခဲ့ဖူးသည်။နောက်ထပ်သတင်းအချက်အလက်များအတွက် မှတ်ချက်ပေးရန် တောင်းဆိုမှုများကို ကုလသမဂ္ဂလုံခြုံရေးကောင်စီက ပြန်လည်တုံ့ပြန်ဖြေကြားခြင်းမျိုးမရှိသေးကြောင်းသိရသည်။