Pearl (NSS) - မတ် ၁၆

နေပြည်တော်လမ်းလျှောက်သင်္ကြန်တွင် အထူးအစီအစဉ်အနေ ဖြင့် ကိုရီးယားမှ K-POP အဆိုတော်များ လာရောက် ဖျော်ဖြေမည်ဖြစ်ကြောင်း နစက၏ အချက်အလက်များအရသိရသည်။ 

၂၀၂၄ ခုနှစ် မြန်မာ့ရိုးရာ အတာသင်္ကြန်ပွဲတော်ကာလအတွင်း နေပြည်တော်တွင် လမ်းလျှောက်သင်္ကြန် အောင်မြင်စွာကျင်းပနိုင်ရေး ညှိနှိုင်းအစည်းအဝေးကို ယမန်နေ့ (မတ်လ ၁၅ ရက်) တွင် နေပြည်တော်ရှိ ပြန်ကြားရေးဝန်ကြီးဌာန၌ ကျင်းပခဲ့သည်။

ယခင်နှစ်ကဲ့သို့ နေပြည်တော်တွင် လမ်းလျှောက်သင်္ကြန်ကို ထည့်သွင်းကျင်းပမည်ဖြစ်ပြီး နိုင်ငံတော်ဝန်ကြီးချုပ်၏ လမ်းညွှန်မှုအရ နေပြည်တော်တွင် နိုင်ငံတော်အဆင့် မြန်မာ့ရိုးရာအတာသင်္ကြန်ပွဲတော်ကို ဖော်ဆောင်မည်ဖြစ်ကြောင်း ပြန်ကြားရေးဝန်ကြီး ဦးမောင်မောင်အုန်းက ပြောသည်။  

နေပြည်တော် လမ်းလျှောက်သင်္ကြန်တွင် အထူးအစီအစဉ်အနေ ဖြင့် Boss and Jobs Company နှင့် ကိုရီးယားကုမ္ပဏီများ ပူးပေါင်း၍ လမ်းလျှောက်သင်္ကြန် ဗဟိုမဏ္ဍပ်တွင် ကိုရီးယားနိုင်ငံမှ K-POP အဆိုရှင်များနှင့် နာမည်ကြီး အနုပညာရှင်များ ပါဝင်သီဆိုကပြဖျော်ဖြေမည်ဖြစ်ကြောင်းလည်း ၎င်းက ဆက်လက်ပြောသည်။  

အလားတူ မြန်မာနိုင်ငံမှ ထင်ပေါ်ကျော်ကြားသည့် အနုပညာရှင်များကိုလည်း နေပြည်တော် လမ်းလျှောက်သင်္ကြန်တွင် ပါဝင်ဆင်နွှဲနိုင်ရန် ဖိတ်ခေါ်ထားကြောင်းသိရသည်။ ထို့ပြင် နေပြည် တော်၌ တိုင်းရင်းသားသင်္ကြန်၊ စတုဒီသာသင်္ကြန်၊ ဝန်ကြီးဌာနသင်္ကြန်နှင့် လူငယ်သင်္ကြန်စသည့် ဇုန်လေးခု ထည့်သွင်းကျင်းပနိုင်ရန်အတွက် စီစဉ်နေကြောင်းလည်း သိရသည်။