သန့်ဇင် (NSS) - မတ် ၁၂

မန္တလေးတိုင်း၊ မတ္တရာမြို့နယ်တွင် စက်လှေ(၂)စီးပေါ်မှ ငွေကျပ် ၇ ဘီလျံကျော်တန်ဖိုးရှိ စိတ်ကြွရူးသွပ်ဆေးပြား များ ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါးတာဆီးနှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။

မူးယစ်ဆေးဝါးတားဆီးနှိမ်နင်းရေးတပ်ဖွဲ့က ပြီးခဲ့သည့် မတ်လ ၆ ရက်၊ ညနေ ၆ နာရီအချိန်တွင် မတ္တရာမြို့နယ်၊ ဆည်တော်ကြီးဆည်အတွင်း၌ အထက်ပါကဲ့သို့ဖမ်းဆီးရမိခဲ့ခြင်း ဖြစ်ကြောင်း သိရသည်။

အဆိုပါဆည်အတွင်း၌ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ပါဝင်သည့် ပူးပေါင်းအဖွဲ့က ရာဇာမိုး၊ မလမင်းနွယ်၊ သိန်းဇော်(ခ) ချစ်မွှေး၊ အောင်ပိုင်၊ မဖြူဖြူထွေးနှင့် မယမင်းသူ(ခ)မင်းမင်းတို့ (၆)ဦး လိုက်ပါလာသည့် စက်လှေငယ် (၂)စီးကို စစ်ဆေးရှာဖွေခဲ့ရာ မီးသွေးအိတ်များအတွင်းမှ သိုဝှက်သယ်ဆောင်လာသော ငွေကျပ် ၇ ဒသမ ၅ ဘီလျံတန်ဖိုးရှိ စိတ်ကြွရူးသွပ်ဆေးပြား သိန်း(၅၀)ကို ဖမ်းဆီးရမိခဲ့ကြောင်း သိရသည်။

ဆက်လက်စစ်ဆေးချက်အရ မတ်လ ၇ ရက်၊ နံနက် ၇ နာရီအချိန်တွင် မတ္တရာမြိုနယ်၊ ဆည်တော်ကျေးရွာတွင် အဆိုပါ စိတ်ကြွရူးသွပ်ဆေးများကို သယ်ဆောင်ခိုင်းသူ စိုင်းမင်းသူ နှင့် ပူးပေါင်းပါဝင်သူ ထွန်းသန်းတို့(၂)ဦးကို ထပ်မံဖမ်းဆီးရမိခဲ့ကြောင်း သိရသည်။

ထို့နောက် စစ်ဆေးချက်များအရ အဆိုပါဖမ်းဆီးရမိခဲ့သည့် စိတ်ကြွရူးသွပ်ဆေးပြားများကို ရှမ်းပြည်နယ် (မြောက်ပိုင်း)၊ နောင်ချိုမြို့နယ်မှ မန္တလေးတိုင်းဒေသကြီး၊ မတ္တရာမြို့နယ်သို့ ရေလမ်းကြောင်းမှ စက်တပ်လှေဖြင့် သယ်ဆောင်လာကာ ထိုမှတစ်ဆင့် မန္တလေးသို့ ဆက်လက်သယ်ဆောင်ခြင်း ဖြစ်ကြောင်း သိရသည်။

ထို့ကြောင့် ၎င်းတို့အား သက်ဆိုင်ရာမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ ဆိုင်ရာဥပဒေအရအမှုဖွင့် အရေးယူထားပြီး ကွင်းဆက်များအား စုံစမ်းစစ်ဆေးလျက်ရှိကြောင်း သိရသည်။