Pika (NSS) - မတ် ၇

ကမ္ဘာကျော်ဘီလျံနာအီလွန်မတ်သည် ကမ္ဘာ့အချမ်းသာဆုံးပုဂ္ဂိုလ်ဆိုသည့် ၎င်း၏ ဂုဏ်ပုဒ်ကို ဆုံးရှုံးခဲ့ရပြီး Amazon ကုမ္ပဏီတည်ထောင်သူ ဂျက်ဘီဇော့က ကမ္ဘာ့အချမ်းသာဆုံး ပုဂ္ဂိုလ်ဖြစ်လာခဲ့ကြောင်း ဘလွန်းဘတ်သတင်းဌာန၏ ကမ္ဘာ့အချမ်းသာဆုံးပုဂ္ဂိုလ်(၅ဝဝ)ဦး စာရင်း ဘီလျံနာများ ညွှန်းကိန်းတွင် ရေးသားဖော်ပြထားသည်။ 

မတ်လ(၅)ရက်တွင် ဂျက်ဘီဇော့၏ အသားတင်ပိုင်ဆိုင်မှုမှာ အမေရိကန်ဒေါ်လာ(၂၀၀)ဘီလျံရှိပြီး အီလွန်မတ်၏ အသားတင်ပိုင်ဆိုင်မှုမှာ (၁၉၈)ဘီလျံ ရှိကြောင်း သိရသည်။ အီလွန်မတ်သည် ပြီးခဲ့သည့်နှစ်တွင် အမေရိကန် ဒေါ်လာ(၃၁)ဘီလျံကျော် ဆုံးရှုံးခဲ့ရပြီး၊ ဂျက်ဘီဇော့၏ အသားတင်ပိုင်ဆိုင်မှုမှာ (၂၃)ဘီလျံကျော် တိုးလာခဲ့ကြောင်း အဆိုပါညွှန်းကိန်းအရ သိရသည်။ 

အီလွန်မတ်၏ လုပ်ရပ်များသည် Tesla ကုမ္ပဏီ၏ ရှယ်ယာများကို ကျဆင်းစေခြင်းဖြစ်ကြောင်း MarketWatch ကုမ္ပဏီက ပြောကြားခဲ့သည်။ EV ကား ထုတ်လုပ်သည့် Tesla ကုမ္ပဏီသည် အမေရိကန် နှင့် တရုတ်နိုင်ငံတို့တွင် ဈေးနှုန်းလျှော့ချမှုများ နှင့် လျှော့ဈေးတို့ကို ထုတ်ပြန်ကြေညာခဲ့ပြီးနောက် မတ်လ(၄)ရက်တွင် Tesla ကုမ္ပဏီ၏ ရှယ်ယာများမှာ (၇)ရာခိုင်နှုန်းကျော် ကျဆင်းသွားခဲ့ကြောင်း သိရသည်။

၂ဝ၂၄ ခုနှစ်အစမှ စတင်ပြီး လက်ရှိအချိန်အထိ Tesla ကုမ္ပဏီ၏ ရှယ်ယာများမှာ (၂၄)ရာခိုင်နှုန်းခန့် ကျဆင်း သွားခဲ့ကြောင်းလည်း သိရသည်။ Amazon ကုမ္ပဏီတည်ထောင်သူ ဂျက်ဘီဇော့သည် ၂ဝ၂၁ ခုနှစ်နောက်ပိုင်း ပထမဆုံးအကြိမ်အဖြစ် ဘလွန်းဘတ်သတင်းဌာန၏ ဘီလျံနာများညွှန်းကိန်းတွင် ထိပ်ဆုံးမှာ ရပ်တည်နေခြင်းဖြစ် သည်။ 

ဂျက်ဘီဇော့သည် Amazon ကုမ္ပဏီ၏ (၉)ရာခိုင်နှုန်းခန့်ကို ပိုင်ဆိုင်သည့်အပြင်  အာကာသရှာဖွေရေးကုမ္ပဏီ Blue Origin နှင့် အခြားစီးပွားရေးလုပ်ငန်းများကို ရာနှုန်းပြည့်ပိုင်ဆိုင်ကြောင်းလည်း သိရသည်။ ကမ္ဘာပေါ်တွင် တတိယ မြောက်အချမ်းသာဆုံးပုဂ္ဂိုလ်မှာ LVMH ကုမ္ပဏီ စီအီးအို ဘားနတ်အာနိုးလ်ဖြစ်ကြောင်း ဘလွန်းဘတ် သတင်းဌာန၏ ဖော်ပြချက်အရသိရသည်။ 

ဂျက်ဘီဇော့၊ အီလွန်မတ် နှင့် ဘားနတ်အာနိုးလ်တို့သည် ကမ္ဘာ့အချမ်းသာဆုံးပုဂ္ဂိုလ်နေရာကို နှစ်ပေါင်းများစွာကြာ အောင် တစ်လှည့်စီရယူနေခဲ့ခြင်းဖြစ်ကြောင်းလည်း သိရသည်။ ထို့အပြင် ၎င်းတို့သုံးဦးသည် အသားတင်ပိုင်ဆိုင်မှု အမေရိကန်ဒေါ်လာ(၂၀၀)ဘီလျံကျော်ရှိဖူးသည့် လူပုဂ္ဂိလ်များဖြစ်ကြောင်း ဘလွန်းဘတ်သတင်းဌာန၏ အဆိုအရ သိရသည်။