သန့်ဇင် (NSS) - ဖေဖော်ဝါရီ ၂၃

မကွေးတိုင်း၊ မင်းဘူးမြို့နယ်၊ ရွှေစက်တော်ဘုရားပွဲသို့ ဘုရားဖူးလာသည့် ဆယ်ကျော်သက်အရွယ်ကလေးငယ်(၂)ဦးအား ရေနစ်စဉ် ကယ်ဆယ်ရာမှ အမျိုးသမီးတစ်ဦး ရေနစ်သေဆုံးသွားခဲ့ကြောင်း မြတ်စေတနာ နာရေးကူညီမှုအသင်း စကုမြို့ထံမှ သိရသည်။

ဖြစ်စဉ်မှာ ယမန်နေ့(ဖေဖော်ဝါရီ ၂၂ ရက်)၊ မွန်းလွဲ ၁၂ နာရီအချိန်ခန့်တွင် မင်းဘူးမြို့နယ်၊ စကုမြို့၊ ရွှေစက်တော်ဘုရားပွဲရှိရာ မန်းချောင်း အတွင်း ၌ ဖြစ်ပွားခဲ့ခြင်းဖြစ်ကြောင်း သိရသည်။

“သေဆုံးသူအမျိုးသမီးရဲ့ယောက်ျားကပြောပြတာမှာတော့ သူအမျိုးသမီးက ဆယ်ကျော်သက်အရွယ် သူ့တူမလေး(၂)ယောက်နဲ့ ရေချိုးနေရင်းနဲ့ ကလေး(၂)ယောက် ကချောင်းအောက်က ချောက်ထဲကိုကျသွားလို့ လိုက်ကယ်ဆယ်တာမှာ ကောင်မလေးက ရေနစ်သေတယ်လို့ ပြောတယ်” ဟု မြတ်စေတနာနာရေးကူညီမှုအသင်းစကုမြို့မှ တာဝန်ရှိသူတစ်ဦးက NP News ကို ပြောသည်။

အဆိုပါရေနစ်သေဆုံးခဲ့သူမှာ အသက်(၂၄)နှစ်အရွယ် မပန်းနုဆိုသူဖြစ်ပြီး ရမည်းသင်းမြို့တွင် နေထိုင်ကြောင်း သိရသည်။

“ရွှေစက်တော်ဘုရားပွဲရာသီဆိုရင် မန်းချောင်းမှာရေနစ်သေတာတွေက အရင်ကလည်းဖြစ်ဖူးတယ်။ အရင်က မန်းချောင်းက ခြေကျင်းဝတ်လောက်ပဲရေစီးတာ။ ဘုရားဖူးတွေလာတော့ ရေချိုးလို့ရအောင်ဆိုပြီး အောက်ပိုင်းကို ကန့်လိုက်တော့ ရေကနည်းနည်း နက်လာတာပေါ့။ အဲဒါကြောင့် ဂေါပကနဲ့ တာဝန်ရှိသူတွေက ချောင်းနားမှာ ဘယ်နားကတော့ရေနက်တယ်ဆိုပြီး စာတွေရေးထားတာ ရှိတယ်။ အဲတော့ သတ်မှတ်ထားတဲ့ ကန့်သက်ထားတဲ့နေရာတွေမှာရေမချိုးဖို့နဲ့။ မိဘတွေကလေည်း ကလေးတွေကို လည်းဂရုစိုက်စေချင်တယ်” ဟု ၎င်းက အကြံပြုပြောထားသည်။

ထို့ကြောင့် သေဆုံးသူအမျိုးသမီး၏ ရုပ်အလောင်းအား မင်းဘူး-စကုမြို့နယ်ပြည်သူ့ဆေးရုံမှတစ်ဆင့် ရမည်းသင်းမြို့သို့ ဆက်လက်ပို့ဆောင်ပေးခဲ့ကြောင်း သိရသည်။