ယခုဘဏ္ဍာနှစ်၌ စီးပွားရေးတိုးတက်မှုနှုန်းသည် (၃ ဒသမ ၄) ရာခိုင်နှုန်း တိုးတက်လာခဲ့ပြီး ဆက်လက်တိုးတက်မည်ဟု တပ်ချုပ်ဆို
မျိုးကြီး (NP News) - မတ် ၂၆
ယခု ၂ဝ၂၂-၂ဝ၂၃ ဘဏ္ဍာနှစ်တွင် နိုင်ငံ၏စီးပွားရေးတိုးတက်မှုနှုန်းသည် ၃ ဒသမ ၄ ရာခိုင်နှုန်း တိုးတက်လာခဲ့ပြီး ဆက်လက်တိုးတက်မှုများရှိမည်ဟု ဗိုလ်ချုပ်မှူးကြီးမင်းအောင်လှိုင်က ပြောသည်။
၎င်းက မတ်လ ၂၄ ရက်တွင် နေပြည်တော်ရှိ နစကဥက္ကဋ္ဌရုံး၌ ကျင်းပသော ညှိနှိုင်းအစည်းအဝေးတွင် အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။
၂ဝ၂ဝ ပြည့်နှစ် ကိုဗစ်ရောဂါစတင်ဖြစ်ပွားချိန်မှစ၍ နိုင်ငံ့စီးပွားရေး ကျဆင်းလာခဲ့ပြီး ယခင်အစိုးရလက်ထက်၌ ပြည်တွင်းစီးပွားရေးအားပေးမှုနှင့် စီမံခန့်ခွဲရေးပိုင်းတို့တွင် အားနည်းခဲ့ခြင်း ကြောင့် ၂ဝ၂ဝ-၂ဝ၂၁ ဘဏ္ဍာရေးနှစ်၌ နိုင်ငံ၏ ဂျီဒီပီသည် ၅ ဒသမ ၉ ရာခိုင်နှုန်းအထိ ကျဆင်းခဲ့ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
အဆိုပါအခက်အခဲများကြားမှ နစကအစိုးရ တာဝန်ယူဆောင်ရွက်ချိန်တွင် စိုက်ပျိုးမွေးမြူးရေး လုပ်ငန်းများကို အရှိန်အဟုန် မပြတ်ဆောင်ရွက်ခဲ့သည့်အတွက် ၂ဝ၂၁-၂ဝ၂၂ ဘဏ္ဍာရေးနှစ် အောက်တိုဘာလမှ မတ်လအထိ ပထမ(၆)လအတွင်း နိုင်ငံ၏ ဂျီဒီပီသည် ၂ ဒသမ ၄ ရာခိုင်နှုန်းအထိတိုးတက်လာခဲ့ကြောင်း တပ်ချုပ်က ဆိုသည်။
ဆက်လက်ပြီး နစကဥက္ကဋ္ဌက အနုတ် (၅ ဒသမ ၉)ရာခိုင်နှုန်းမှ အပေါင်း (၂ ဒသမ ၄) ရာခိုင်နှုန်းအထိ တိုးတက်လာခြင်းသည် နိုင်ငံ၏စီးပွားရေးတိုးတက်လာခြင်းပင်ဖြစ်ကြောင်းလည်း ထုတ်ဖော်ပြောဆို ထားသည်။
ထို့ပြင် ယခု ၂ဝ၂၂-၂ဝ၂၃ ဘဏ္ဍာနှစ်တွင် နိုင်ငံ၏ ဂျီဒီပီသည် ၃ ဒသမ ၄ ရာခိုင်နှုန်းသို့ တိုးတက်လာခဲ့ပြီး ဆက်လက်ပြီး တိုးတက်မှုများရှိမည်ဟုလည်း ဘဏ္ဍာရေးဆိုင်ရာတာဝန်ရှိသူများအနေဖြင့် ခန့်မှန်းထား ကြကြောင်း ဗိုလ်ချုပ်မှူးကြီးမင်းအောင်လှိုင်က ဖွင့်ဟပြောဆိုထားသည်။
ထိုသို့ နိုင်ငံ၏ ဂျီဒီပီများတိုးတက်လာခြင်းသည် နစကအစိုးရအနေဖြင့် တိုင်းပြည်အတွက် စေတနာထားကာ ဆောင်ရွက်ခဲ့ခြင်းကြောင့်ဖြစ်ကြောင်း တပ်ချုပ်က ဆိုသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
သွေးအများဆုံးလှူဒါန်းသူအဖြစ် ဂင်းနစ်စံချိန်တင်နိုင်ခဲ့တဲ့အမျိုးသမီး
RELATED POSTS
22 Nov 2024 | စီးပွားရေး,ပြည်တွင်း
21 Nov 2024 | စီးပွားရေး,ပြည်တွင်း
