ဂျန်ဇက် (NP News) - မတ် ၂၆

မြန်မာနိုင်ငံအနေဖြင့် ပြည်တွင်း၌ စားသုံးဆီဖူလုံစေရန်အတွက် နေကြာပင်များကို စိုက်ပျိုး ဧက (၄)သန်းကျော်အထိ တိုးချဲ့စိုက်ပျိုးသွားရန် ပစ်မှတ်ထားနေကြောင်း စိုက်ပျိုးရေးဦးစီးဌာနညွှန်ကြား ရေးမှူးချုပ် ဦးရဲတင့်ထွန်းက ထုတ်ဖော်ပြောဆိုလိုက်ကြောင်း the star သတင်းဌာန၏ ဖော်ပြချက်အရ သိရသည်။ 

ပြည်တွင်းဈေးကွက်တွင် နေကြာဆီကို ချက်ပြုတ်ရာ၌ အဓိကထား အသုံးပြုမှုများလည်း မြင့်တက်နေကြောင်း၊ ချက်ပြုတ်ရေး လုပ်ငန်းများတွင်နေကြာစေ့ကို ဆီထုတ်အသုံးပြုသောဆီများ၊ မြေပဲဆီများ၊ နှမ်းစေ့ဆီများကို အဓိကထားအသုံးပြုကြောင်းသိရသည်။ မြန်မာနိုင်ငံသည် ၂ဝ၂၂-၂ဝ၂၃ ဘဏ္ဍာနှစ်တွင် နေကြာ စိုက်ပျိုးမြေဧက (၁ ဒသမ ၅)သန်းကျော်တွင် စိုက်ပျိုးရန် ပစ်မှတ်ထားခဲ့သော်လည်း စိုက်ပျိုးမြေ ဧက (၁ ဒသမ ဝ၈) သန်းတွင်သာ စိုက်ပျိုးနိုင်ခဲ့ကြောင်းသိရသည်။ 

ဦးရဲတင့်ထွန်းက " ပြီးခဲ့တဲ့ မုတ်သုံရာသီနဲ့ ဆောင်းရာသီတို့မှာ နေကြာပင်တွေကို စိုက်ပျိုးမြေ ဧက ၁ ဒသမ ဝ၈ သန်းစိုက်ပျိုးနိုင်ခဲ့တယ်။ နေကြာပင်စိုက်ပျိုးမှုတွေကို တိုးချဲ့စိုက်ပျိုးဖို့ ပစ်မှတ်ထားနေပြီး နေကြာပင်တွေကို စိုက်ပျိုးမြေ ဧက ၄ သန်းအထိ စိုက်ပျိုးသွားဖို့ စီစဉ်နေတယ် " ဟုဆိုသည်။

နေကြာပင်များကို မန္တလေး၊ မကွေးတိုင်း၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ ရှမ်းပြည်နယ်တို့တွင် စိုက်ပျိုးလျက်ရှိနေကြောင်းသိရသည်။ 

၎င်းက " လယ်သမားတွေဟာ လာမယ့်ဘဏ္ဍာနှစ်မှာ နေကြာပင်တွေကို ပိုမိုစိုက်ပျိုးဖို့ စိတ်ဝင်စားမယ်လို့ မျှော်လင့်ထားတယ်။ ပြည်တွင်း စားသုံးဆီဈေးကွက်ကလည်း ကောင်းမွန်မှုရှိနေပါတယ်" ဟုဆိုသည်။

မြန်မာနိုင်ငံတဝှမ်းရှိ ဆီစက်များသည် တစ်နှစ်လျှင် စားသုံးဆီ တန်ချိန် (၃)သိန်းဝန်းကျင်ခန့်ထုတ်လုပ်နိုင်ကြောင်းသိရသည်။