Pearl (NSS) - ဖေဖော်ဝါရီ ၁၃

တောင်တွင်းကြီးမြို့တွင် ကျေးရွာအုပ်ချုပ်ရေးမှူး အပါအဝင် (၃)ဦးကို အကြမ်းဖက်သမားများက သေနတ်ဖြင့် လုပ်ကြံသတ်ဖြတ်ခဲ့ကြောင်း ဒေသခံများထံမှ သတင်းရရှိသည်။ 

ဖြစ်စဉ်မှာ ယမန်နေ့ (ဖေဖော်ဝါရီလ ၁၂ ရက်) ၊ နေ့လည် (၁)နာရီ (၃ဝ) မိနစ် ခန့်တွင် မကွေးတိုင်း၊ တောင်တွင်းကြီးမြို့၊ ရခိုင်ဘုရားကြီးဝန်းအနီးတွင် ဖြစ်ပွားခဲ့ခြင်းဖြစ်သည်။ 

အဆိုပါရခိုင်ဘုရားကြီးဝင်းအတွင်းရှိ ထမင်းဆိုင်အနီးတွင် တောင်တွင်းကြီးမြို့နယ်၊ ပင်းချောင်းကျေးရွာ၏ ကျေးရွာအုပ်ချုပ်ရေးမှူးဖြစ်သူ ဦးဝင်းအောင် အပါအဝင် (၃)ဦးတို့ ကို အကြမ်းဖက်သမားများက သေနတ်ဖြင့် လုပ်ကြံပစ်ခတ်ခဲ့ကြောင်း သိရသည်။ 

"ရခိုင်ဘုရားကြီးဝိုင်းအတွင်းက ထမင်းဆိုင်နားမှာ နေ့လည်လောက်က ပစ်ခံရတာ။ အားလုံးသေကုန်တာပေါ့" ဟု ဒေသခံတစ်ဦး က NP News ကို ပြောသည်။ 

ထိုသို့ပစ်ခတ်ခံရမှုကြောင့် ၎င်းတို့(၃)ဦးတွင် ကျည်ထိမှန် ဒဏ်ရာများရရှိကာ အခင်းဖြစ်နေရာတွင် သေဆုံးသွားခဲ့ပြီး လက်ရှိတွင် ၎င်းတို့ရုပ်အလောင်းအား တောင်တွင်းကြီးပြည်သူဆေးရုံ ရင်ခွဲရုံသို့ ပို့ဆောင်‌ပေးထားကြောင်း သိရသည်။