Pika (NSS) - ဖေဖော်ဝါရီ ၁၂

ပင်လယ်နီအတွင်းသွားလာနေသော သင်္ဘောများကို ဟူသီလက်နက်ကိုင်အဖွဲ့၏ တိုက်ခိုက်မှုများသည် အာမခံနှင့် သင်္ဘောသွားလာမှုနှုန်းများအပေါ် သိသာသော အကျိုးသက်ရောက်မှုများရှိခဲ့သော်လည်း ကမ္ဘာလုံးဆိုင်ရာစီးပွား ရေး တိုးတက်မှု အလားအလာများအပေါ် အကျိုးသက်ရောက်မှုများမရှိသေးကြောင်း နိုင်ငံတကာငွေကြေးရန်ပုံငွေ အဖွဲ့ IMF မန်နေဂျင်းဒါရိုက်တာ ခရစ္စတာလီနာဂျော်ဂီဗာက ပြောကြားခဲ့သည်။

ခရစ္စတာလီနာဂျော်ဂီဗာ က "ဟူသီလက်နက်ကိုင်အဖွဲ့ရဲ့တိုက်ခိုက်မှုတွေဟာ ဈေးနှုန်းတွေအပေါ် ဖိအားတွေ တိုးလာပေမယ့် ကမ္ဘာလုံးဆိုင်ရာငွေကြေးဖောင်းပွမှုတွေအတွက် ကျွန်မတို့ရဲ့ခန့်မှန်းချက်တွေ အထက်ကိုတော့ မရောက်သေးပါဘူး။ ဒီကိစ္စနဲ့ပတ်သက်ပြီး ဂယက်ရိုက်မှုတွေရှိပေမယ့် ကမ္ဘာလုံးဆိုင်ရာစီးပွားရေးအတွက် တိုးတက်မှုခန့်မှန်းချက်တွေကို သိသိသာသာကျဆင်းစေတာမျိုးတော့ မရှိသေးပါဘူး" ဟု ပြောခဲ့သည်။

၂ဝ၂၄ ခုနှစ် ဇန်နဝါရီလတွင် မြေထဲပင်လယ်နှင့် ပင်လယ်နီတို့ကို ဆက်သွယ်ထားသော အရေးကြီးသော ရေကြောင်း ကုန်သွယ်မှုလမ်းကြောင်းဖြစ်သည့် စူးအက်တူးမြောင်းကို ဖြတ်သန်းသွားလာမှုများသည် ပြီးခဲ့သည့်နှစ် ဇန်နဝါရီလနှင့် နှိုင်းယှဉ်မည်ဆိုပါက ထက်ဝက်နီးပါးကျဆင်းသွားကြောင်း ခရစ္စတာလီနာဂျော်ဂီဗာက မှတ်ချက် ပြုခဲ့သည်။

ကုန်တင်သင်္ဘောသွားလာမှု ကျဆင်းမှု၏ အကျိုးသက်ရောက်မှုသည် ရေကြောင်းသွားလာမှုမှ ဝင်ငွေအပေါ် မှီခိုနေရသော အီဂျစ်နိုင်ငံအတွက် အပြင်းထန်ဆုံးဖြစ်ပြီး တစ်လလျှင် အမေရိကန်ဒေါ်လာသန်း(၁ဝဝ)ခန့် ဆုံးရှုံးခဲ့ရ ကြောင်း သိရသည်။

သို့သော်လည်း ပင်လယ်နီတွင် ဖြစ်ပွားနေသော ရေကြောင်းသွားလာမှု အကျပ်အတည်းသည် ကမ္ဘာလုံးဆိုင်ရာ စီးပွားရေးအတွက် ရေရှည်တိုးတက်မှုအလားအလာများကို ကျဆင်းသွားစေကြောင်း ခရစ္စတာလီနာဂျော်ဂီဗာ က ပြောခဲ့သည်။

၎င်းက "ဒီလိုအကျပ်အတည်းတွေကို ရင်ဆိုင်ဖို့အတွက် ကျွန်မတို့ဟာ ပိုမိုကောင်းမွန်တဲ့အနေအထားတစ်ခုမှာ ရှိနေဖို့လိုအပ်ပါတယ်။ကမ္ဘာတစ်ဝှမ်းက ဘဏ္ဍာရေးအာဏာပိုင်တွေဟာ ဒီလိုအကျပ်အတည်းတွေကို ခံနိုင်ရည်ရှိဖို့ အတွက် လိုအပ်တဲ့ကြားခံအရာတွေကို တည်ဆောက်သင့်ပါတယ်" ဟု ပြောခဲ့သည်။