သန့်ဇင် (NSS) - ဖေဖော်ဝါရီ 

ရန်ကုန်တိုင်း၊ မင်္ဂလာဒုံမြို့နယ်တွင် သစ်တင်ကားနှင့် အိမ်စီးကားတို့ယာဉ်တိုက်မှုဖြစ်ပွားခဲ့ရာ အမျိုသားတစ်ဦး ပွဲချင်းပြီး သေဆုံးသွားခဲ့ကြောင်း ထာဝရအလင်းတန်းလူမှုကူညီကယ်ဆယ်ရေးပရဟိတအသင်းထံမှ သိရသည်။

ယာဉ်တိုက်မှုသည် ယနေ့ (ဖေဖော်ဝါရီ ၆ ရက်)၊ နံနက် ၂ နာရီ ၄၄ မိနစ်အချိန်တွင် မင်္ဂလာဒုံမြို့နယ်၊ အမှတ်(၃) လမ်းမကြီး၊ သင်္ဃန်းကျွန်းကြီးကျေးရွာ၌ ဖြစ်ပွားခဲ့ခြင်းဖြစ်ကြောင်း သိရသည်။

“တိုက်တာက အိမ်စီးကား (Crown) နဲ့ သစ်တင်တဲ့ကားနဲ့တိုက်ကြတာ။ ဘယ်လိုဖြစ်ပြီးတိုက်လဲတော့ သေချာမသိခဲ့ဘူးပေါ့နော်။ အိမ်စီးကားပေါ်မှာပါတဲ့အမျိုးသားကတော့ ကားထဲမှာညှပ်ပြီးဆုံးသွားတယ်” ဟု ထာဝရအလင်းတန်းလူမှုကူညီကယ်ဆယ်ရေးပရဟိတအသင်းမှ တာဝန်ရှိသူတစ်ဦးက NP News ကို ပြောသည်။

အဆိုပါယာဉ်တိုက်မှုကြောင့် အိမ်စီးကားပေါ်မှ အသက်(၄ဝ)နှစ်ဝန်းကျင် ယာဉ်မောင်းအမျိုသားတွင် ထိခိုက် ဒဏ်ရာများရရှိကာ အခင်းဖြစ်နေရာ၌ ပွဲချင်းပြီးသေဆုံးသွားခဲ့ကြောာင်း သိရသည်။

ထို့ကြောင့် သေဆုံးသူအမျိုးသား၏ရုပ်အလောင်းကို ထာဝရအလင်းတန်းလူမှုကူညီကယ်ဆယ်ရေးပရဟိတ အသင်းမှ မြောက်ဥက္ကလာပမြို့နယ် မေဓာဝီဆေးရုံကြီးသို့ ပို့ဆောင်ကူညီပေးခဲ့ကြောင်း သိရသည်။