ကန့်ဘလူမြို့နယ်ရှိ လျှပ်စစ်ဝန်ထမ်း (၁၆)ဦးကို PDF အဖွဲ့က ဖမ်းဆီးခေါ်ဆောင်
Pearl (NSS) - ဇန်နဝါရီ ၇
ကန့်ဘလူမြို့နယ်ရှိ လျှပ်စစ်ဝန်ထမ်း(၁၆)ဦးကို PDF အဖွဲ့က ဖမ်းဆီးခေါ်ဆောင်သွားခဲ့ကြောင်း ဒေသခံများထံမှ သိရသည်။
ပြီးခဲ့သော ဇန်နဝါရီလ (၅)ရက်၊ ညနေပိုင်းတွင် စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့နယ်၊ သဖန်းဆိပ်ဆည်နှင့်ရေအားလျှပ်စစ်စက်ရုံရှိ ထရန်စဖော်မာများကို PDF အဖွဲ့က မိုင်းထောင်ဖောက်ခွဲမှုများပြုလုပ်ခဲ့ကြောင်း ဒေသခံများက ပြောသည်။
ထိုသို့ မိုင်းထောင်ဖောက်ခွဲခံရသည့် ထရန်စဖော်မာများကို ပြန်လည်ပြုပြင်ရေးအတွက် ကန့်ဘလူမြို့နယ်ရှိ လျှပ်စစ်ဝန်ထမ်း (၁၆)ဦးသည် ယမန်နေ့ (ဇန်နဝါရီလ ၆ ရက်)တွင် သဖန်းဆိပ်ဆည်ဘက်သို့ သွားရောက်စဉ် ဖမ်းဆီးခံခဲ့ရကြောင်း သိရသည်။
"ဖြစ်စဉ်မှန်ပါတယ်။ သဖန်းဆိပ်ဆည်၊ ဆင်စွယ်ရွာနားမှာ ဖမ်းခံလိုက်ရတာ။ အဲဒီဘက်မှာသွားပြီး မီးပြင်တာ။ မနေ့က လျှပ်စစ်ဝန်ထမ်း (၁၆)ယောက် ဖမ်းခံလိုက်ရတယ်။ လုံခြုံရေးမပါလို့နေမှာပေါ့။ ခုထိ ဘာမှအဆက်အသွယ် မရသေးဘူး"ဟု ဒေသခံတစ်ဦးက NSS ကို ပြောသည်။
ယင်းကဲ့သို့ လျှပ်စစ်ဝန်ထမ်းများ ဖမ်းဆီးခံရပြီးနောက် အဆက်အသွယ် ပြတ်တောက်နေသည့်အတွက် ၎င်းတို့၏ မိသားစုဝင်များအနေဖြင့် စိုးရိမ်ပူပန်နေလျက်ရှိကြောင်း သိရသည်။
လက်ရှိတွင် သဖန်းဆိပ်ရေအားလျှပ်စစ်ကို အသုံးပြုနေကြသည့် မြို့ နှင့် ကျေးရွာများတွင် ဓာတ်အားပြတ်တောက်လျက်ရှိပြီး ဒေသခံများလည်း အခက်အခဲများ ဖြစ်ပေါ်နေလျက်ရှိကြောင်းသိရသည်။
ကန့်ဘလူမြို့ခံတစ်ဦးကလည်း "မီးပျက်နေတာတော့ (၃)ရက်လောက်ရှိပြီ။ သောကြာနေ့ ညနေ (၃)နာရီလောက်ကတည်းကပါ။ ကန့်ဘလူမြို့ပေါ်ရော။ မြို့နယ်တွေရော။ ကျေးရွာတွေရော မီးမလာဘူး။ မီးမလာတော့ ရေတင်တာတွေ တော်တော်ကို အခက်အခဲတွေဖြစ်နေကြတယ်။ ရေမရတော့ ဒုက္ခ ရောက်နေကြတာ။ တစ်နာရီကို (၈၀၀၀)၊ (၁၀၀၀၀) နဲ့ ရေအငှား လိုက်တင်ပေးနေတဲ့ စက်သမားတွေတော့ရှိတယ်" ဟု NSS ကို ပြောသည်။
ပြီးခဲ့သော ၂၀၂၂ ခုနှစ်၊ ဧပြီလ ၂၁ ရက်တွင်လည်း ကယားပြည်နယ်အတွင်းရှိ လောပိတ-ရွှေမြို့မဟာဓာတ်အားလိုင်းမှ ပျက်စီးနေသည့် တာဝါတိုင်များ ကို သွားရောက်ပြုပြင်သော လျှပ်စစ်ဝန်ထမ်းစုစုပေါင်း ၂၆ ဦး နှင့် ပစ္စည်းများကို KNDF အဖွဲ့က ဖမ်းဆီးယူဆောင်ခဲ့သည့် ဖြစ်စဉ် ဖြစ်ပွားဖူးသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ပွင့်ဖြူမြို့နယ်၌ PDF အဖွဲ့ဝင်(၄)ဦး ဗုံးထောင်နေစဉ် ပေါက်ကွဲမှုဖြစ်ပွားခဲ့ရာတစ်ဦးပွဲချင်းပြီးသေဆုံး
RELATED POSTS
26 Sep 2024 | နိုင်ငံရေး,နိုင်ငံတကာ
24 Sep 2024 | နိုင်ငံရေး,နိုင်ငံတကာ
24 Sep 2024 | နိုင်ငံရေး,နိုင်ငံတကာ