Pika (NSS) - စက်တင်ဘာ ၂၄

အရှေ့အလယ်ပိုင်းဒေသမှာ ဖြစ်ပွားနေတဲ့ ပြဿနာတွေနဲ့ တန်ပြန်အရေးယူမှုတွေဟာ ဘယ်နိုင်ငံအတွက်မှ အကျိုးအမြတ်မရှိတဲ့ ပိုမိုကျယ်ပြန့်တဲ့ပဋိပက္ခအဖြစ်ကို ပြောင်းလဲသွားနိုင်တဲ့ အန္တရာယ်ရှိနေတယ်လို့ G7 အဖွဲ့ဝင်နိုင်ငံတွေရဲ့ နိုင်ငံခြားရေးဝန်ကြီးတွေက သတိပေးပြောကြားခဲ့ပါတယ်။

G7 အဖွဲ့က "အရှေ့အလယ်ပိုင်းဒေသတွင်းမှာဖြစ်ပွားနေတဲ့ ပြဿနာတွေနဲ့တန်ပြန်အရေးယူမှုတွေဟာ အန္တရာယ်များတဲ့အကြမ်းဖက်မှုတွေကို ဖြစ်လာစေနိုင်တဲ့ အန္တရာယ်ရှိနေပါတယ်။ ဒီပြဿနာတွေအားလုံးက ဒေသတွင်းတစ်ခုလုံးကို စိတ်ကူးလို့တောင်မရတဲ့ အကျိုးဆက်တွေရှိလာစေမယ့် ပိုမိုကျယ်ပြန့်တဲ့ပဋိပက္ခအဖြစ်ကို ဆွဲငင်နေပါတယ်"လို့ ပြောဆိုခဲ့ပါတယ်။ 

ဒါ့ပြင် အရှေ့အလယ်ပိုင်းဒေသတွင်းမှာ လက်ရှိဖြစ်ပွားနေတဲ့ ပြဿနာတွေအားလုံးကို ရပ်တန့်ကြဖို့ G7 အဖွဲ့က တောင်းဆိုခဲ့တယ်လို့လည်း သိရပါတယ်။ G7 အဖွဲ့က "အရှေ့အလယ်ပိုင်းဒေသမှာ တင်းမာမှုတွေပိုမိုမြင့်တက်လာတာကနေ ဘယ်နိုင်ငံကမှ အကျိုးအမြတ်တွေရရှိမှာမဟုတ်ပါဘူး"လို့ အလေးပေးပြောကြားခဲ့ပါတယ်။ ပြီးခဲ့တဲ့နှစ် အောက်တိုဘာလ(၇)ရက်နေ့မှာ အစ္စရေး-ဟားမတ်စ်စစ်ပွဲစတင်ဖြစ်ပွားပြီးနောက်ပိုင်းတည်းက အရှေ့အလယ်ပိုင်းဒေသမှာ တင်းမာမှုတွေမြင့်တက်လာခဲ့တာလည်း ဖြစ်ပါတယ်။လက်ဘနွန်အခြေစိုက် ဟစ်ဘိုလာလက်နက်ကိုင်အဖွဲ့ဟာ ဟားမတ်စ်လက် နက်ကိုင်အဖွဲ့ကို ထောက်ခံတဲ့အနေနဲ့ အစ္စရေးနိုင်ငံကို ဒုံးကျည်တွေ၊ ဒရုန်းတွေနဲ့တိုက်ခိုက်မှုကို နေ့စဉ်နီးပါးလုပ်ဆောင်ခဲ့တယ်လို့လည်း သိရပါတယ်။အဲဒီတိုက်ခိုက်မှုတွေကို လက်တုံ့ပြန်တဲ့အနေနဲ့ အစ္စရေးဟာ လက်ဘနွန်နိုင်ငံကို ကြီးမားတဲ့လေကြောင်းတိုက်ခိုက်မှုတွေ ပြန်လည်လုပ်ဆောင်ခဲ့တယ်လို့လည်း သိရပါတယ်။ ပြီးခဲ့တဲ့လတွေအတွင်း အီရန်နဲ့ အစ္စရေးနိုင်ငံတို့ဟာလည်း အပြန်အလှန်ပစ်ခတ်တိုက်ခိုက်မှုတွေကို လုပ်ဆောင်ခဲ့ပြီးနောက် ဒေသတွင်းမှာတင်းမာမှုတွေ ပိုမိုမြင့်တက်လာခဲ့တာလည်းဖြစ်ပါတယ်။ ပြီးခဲ့တဲ့ရက်ပိုင်းတုန်းကလည်း လက်ဘနွန်နိုင်ငံတစ်ဝန်းမှာ ထောင်နဲ့ချီတဲ့ အီလက်ထရွန်းနစ်ပစ္စည်းတွေ နှစ်ရက်ဆက်တိုက်ပေါက်ကွဲခဲ့ပြီး လူ(၃၀)ကျော်သေဆုံးကာ အခြားလူထောင်ချီ ထိခိုက်ဒဏ်ရာရရှိခဲ့တယ်လို့လည်း သိရပါတယ်။

ဟစ်ဘိုလာ နဲ့ လက်ဘနွန်အစိုးရတို့ဟာ အဲဒီဖြစ်ရပ်တွေအတွက် အစ္စရေးနိုင်ငံကို အပြစ်တင်ခဲ့ကြတယ်လို့လည်း သိရပါတယ်။ ဒါပေမဲ့လည်း ယင်းဖြစ်ရပ်နဲ့ပတ်သက်ပြီး ၎င်းတို့မှာတာဝန်ရှိ/မရှိဆိုတဲ့အချက်ကို အစ္စရေးအစိုးရဘက်က ပြန်လည်တုံ့ပြန်ဖြေကြားခဲ့တာမျိုးမရှိခဲ့ဘူးလို့လည်း သိရပါတယ်။