Pika (NSS) - စက်တင်ဘာ ၂၄

တောင်ကိုရီးယားနိုင်ငံသည် ကိုယ်ပိုင်နျူကလီးယားလက်နက်များ ထုတ်လုပ်ရန် အာရုံစိုက်ခြင်းမျိုးမရှိဘဲ အမေရိကန်နှင့်အတူ နျူကလီးယား ဟန့်တားရေးကို ပိုမိုအားကောင်းအောင်လုပ်ဆောင်ရန် အာရုံစိုက်၍ မြောက်ကိုရီးယား၏ နျူကလီးယားခြိမ်းခြောက်မှုများကို တုံ့ပြန်သွားမည်ဖြစ် ကြောင်း တောင်ကိုရီးယားသမ္မတ ယွန်ဆက်ယိုလ်က စက်တင် ဘာလ (၂ဝ)ရက်နေ့တွင် ထုတ်ဖော်ပြောဆိုခဲ့သည်။

ယွန်ဆက်ယိုလ်သည် ချက် ပြည်သူ့သမ္မတ နိုင်ငံကို သွားရောက်လည်ပတ်စဉ်အချိန်အတွင်း Hospodarske Noviny သတင်းစာနှင့်အင်တာဗျူး တစ်ခုအတွင်း ယခုကဲ့သို့ မှတ်ချက်ပြု ပြောဆိုခဲ့ခြင်း ဖြစ်သည်။ ပြီးခဲ့သည့်ရက်ပိုင်းတွင် မြောက်ကိုရီးယားအစိုးရသည် ယူရေနီယမ်သန့်စင်သည့်စက်ရုံများ၏ ဓာတ်ပုံများကို ပထမဆုံးအကြိမ် ထုတ်ပြန်ပြသခဲ့ပြီးနောက် ယွန်ဆက်ယိုလ်၏မှတ်ချက်ပေးမှုများ ထွက်ပေါ်လာခြင်းဖြစ်သည်။

(၂၀၂၃)ခုနှစ် ဧပြီလတွင် အမေရိကန် သမ္မတဂျိူးဘိုင်ဒန်နှင့် ထိပ်သီး ဆွေးနွေးပွဲတစ်ခု အ တွင်း တည်ထောင်ခဲ့သော နျူကလီးယား အတိုင်ပင်ခံ အဖွဲ့နှင့်ပတ်သက်ပြီး တောင်ကိုရီးယား၏ ကတိကဝတ်များကို ယွန်ဆက်ယိုလ်က ထပ်မံပြောကြားခဲ့ကြောင်း သိရသည်။ ပြီးခဲ့သည့် ဇူလိုင်လတွင် အမေရိကန်နှင့် တောင်ကိုရီးယားတို့၏ ခေါင်း ဆောင်များသည် အရေးပေါ်အခြေအနေများတွင် အမေရိကန်၏ နျူကလီးယား စစ်ဆင်ရေးကို တောင် ကိုရီးယားက စစ်ရေးအရပံ့ပိုးကူညီပေးမှုများ လုပ်ဆောင်ပေးမည့် နျူကလီးယား လမ်းညွှန်ချက်တစ်ရပ်ကို ချမှတ်ခဲ့ကြကြောင်း သိရသည်။ 

ယွန်ဆက်ယိုလ်က "တောင်ကိုရီးယားဟာ ကိုယ်ပိုင်နျူကလီးယားလက်နက်မလိုဘဲ မြောက် ကိုရီးယားရဲ့ နျူကလီးယား ခြိမ်းခြောက်မှုတွေကို ထိထိရောက်ရောက်ဟန့်တားပြီး တုံ့ပြန်မယ့် ယန္တရားတစ်ခုကို တည်ထောင်ထားပါတယ်။ တောင်ကိုရီးယားဟာ ၎င်းရဲ့ကိုယ်ပိုင်စစ်ရေးစွမ်းရည်တွေကို မြှင့်တင် ဖို့နဲ့ မြောက်ကိုရီးယားရဲ့နျူကလီးယား ခြိမ်းခြောက်မှုတွေကို ဆန့်ကျင်ရာမှာ အမေရိကန်နဲ့အတူ တိုးချဲ့နျူကလီးယား ဟန့်တားမှုတွေရဲ့ ထိရောက်မှုတွေကို မြှင့်တင်ဖို့ ဦးစားပေးလုပ်ဆောင်နေပါတယ်"ဟု ပြောဆိုခဲ့သည်။

တိုးချဲ့နျူကလီးယားဟန့်တားမှုဆိုသည် မှာ မဟာမိတ်နိုင်ငံများကို နျူကလီးယား တပ်ဖွဲ့များ အပါအဝင် စစ်ရေးစွမ်းရည်အပြည့်ဖြင့် ကာကွယ်ရန် အမေရိကန်၏ကတိကဝတ်များကို ရည်ညွှန်ခြင်း ဖြစ်ကြောင်းသိရသည်။