ဂျန်ဇက် (NSS) - ဇန်နဝါရီ ၇ 

အီရန်ကာကွယ်ရေးဦးစီးချုပ်က ရန်သူတွေကို အဝေးကိုမောင်းထုတ်သွားမယ်လို့ ထုတ်ဖော်ပြောဆိုလိုက်ပါတယ်။

ပင်လယ်နီဒေသအတွင်းမှာ အီရန်နိုင်ငံရဲ့မဟာမိတ်ဖြစ်တဲ့ ဟူသီလက်နက်ကိုင်အုပ်စုနဲ့ အနောက်အုပ်စုနိုင်ငံတွေ ကြား တင်းမာမှုအရှိန်မြင့်တက်နေချိန်မှာပဲ အီရန်ကာကွယ်ရေးဦးစီးချုပ်ဖြစ်တဲ့ ဟူစိန်ဆာလာမီက အခုလိုမျိုး ထုတ်ဖော်ပြောဆိုလိုက်တာဖြစ်ပါတယ်။ 

၎င်းက "ကျွန်တော်တို့ဟာ ရန်သူတွေနဲ့ အလုံးစုံစစ်ပွဲဖြစ်ဖို့ ရင်ဆိုင်နေရတယ်" လို့ စစ်သင်္ဘောအသစ် လွှဲပြောင်း ပေးအပ်ပွဲမှာ ပြောဆိုသွားခဲ့တာဖြစ်ပါတယ်။ အီရန်ရေတပ်ဟာ ဇန်နဝါရီ ၆ ရက်မှာ အဘူမက်ဒီ အမည်ရှိ စစ်သင်္ဘောအသစ်နဲ့အတူ အမြန်သွားတိုက်ခိုက်ရေးရေယာဉ်အစင်း ၁ဝဝ ကျော်ကို လွှဲပြောင်းရယူခဲ့ကြောင်း သိရပါတယ်။ 

အီရန်ကာကွယ်ရေးဦးစီးချုပ်က ရန်သူတွေလို့ သုံးနှုန်းပေမယ့် ဘယ်နိုင်ငံတွေဆိုတဲ့အချက်ကို အတိအကျ ထုတ်ဖော်ပြောဆိုခြင်းမျိုးတော့ မရှိခဲ့ပါဘူး။ အီရန်ကာကွယ်ရေးဦးစီးချုပ်က "ကျွန်တော်တို့ဟာ ရန်သူတွေ ချဲ့ထွင် နေတဲ့နေရာတိုင်းမှာရှိနေတဲ့ နိုင်ငံအကျိုးစီးပွားကို ကာကွယ်သွားဖို့ လိုအပ်တယ်။ အီရန်နိုင်ငံပိုင်နက်နားကို ချဉ်းကပ်လာမယ်ဆိုရင်တော့ ရန်သူတွေ ထိခိုက်နစ်နာသွားမယ်။ ရန်သူတွေကို မောင်းထုတ်သွားရမယ်" လို့ ပြောပါတယ်။ 

အီရန်နိုင်ငံအနေနဲ့ ကမ္ဘာရေတပ်အင်အားကြီးနိုင်ငံတွေကို စိန်ခေါ်ဖို့ ရေတပ်နဲ့ပတ်သက်ပြီး ခံစစ်၊ တိုက်စစ်နှစ်ခု စလုံးကို ပိုမိုကောင်းမွန်အောင်လုပ်ဆောင်သွားမယ်လို့ ၎င်းက ပြောပါတယ်။ အစ္စရေးနဲ့ ဟားမက်စ်လက်နက်ကိုင် အဖွဲ့ကြားဖြစ်ပွားနေတဲ့စစ်ပွဲနဲ့ပတ်သက်ပြီး အီရန်နိုင်ငံဟာ အမေရိကန်၊ အစ္စရေးနိုင်ငံတို့နဲ့ တင်းမာမှုတွေ ပိုမို ဖြစ်ပွားလာနေကြောင်း သိရပါတယ်။