ဂျန်ဇက် (NSS) - နိုဝင်ဘာ ၁၈

အမေရိကန်သမ္မတ ဂျိုးဘိုင်ဒန်ဟာ ရုရှားနိုင်ငံ ပိုင်နက်အတွင်းပိုင်းကို အမေရိကန်နိုင်ငံထုတ် ဒုံးကျည်တွေနဲ့တိုက်ခိုက်ဖို့ ခွင့်ပြုပေးလိုက်ကြောင်းသိရပါတယ်။ အမေရိကန်အစိုးရအဖွဲ့ဟာ ရုရှားပိုင်နက်အတွင်းရှိ ပစ်မှတ်တွေကိုအမေရိကန်ထုတ် တာဝေးပစ်ဒုံးကျည်တွေ နဲ့ တိုက်ခိုက်ဖို့ ခွင့်ပြုလိုက်တဲ့အတွက် လာမယ့်ရက်ပိုင်းအတွင်းယူကရိန်းက ရုရှားကိုတိုက်ခိုက်လာဖွယ်ရှိနေကြောင်း သိရပါတယ်။

အမေရိကန် အစိုးရတာဝန်ရှိသူတွေက အမေရိကန်ရွေးကောက်ခံသမ္မတ ဒေါ်နယ်ထရမ့် တာဝန်မယူခင် လက်ရှိအမေရိကန်အစိုးရတာဝန်ယူခွင့်ရတဲ့နောက်ဆုံးလအတွင်း ရုရှားပိုင်နက်အတွင်းကို အမေရိကန်ထုတ် Army Tactical Missile System (ATACMS) ဒုံးကျည်တွေနဲ့ ပစ်ခတ်တိုက်ခိုက်ဖွယ်ရှိနေကြောင်း ပြောပါတယ်။ အမေရိကန်အစိုးရဟာ ယူကရိန်းစစ်ပွဲမှာ ရုရှားနိုင်ငံဘက်ကနေ မြောက်ကိုရီးယားနိုင်ငံ ပါဝင်တိုက်ခိုက်ခြင်းကို လက် တုံ့ပြန်မှုအဖြစ် ယူကရိန်းကို အမေရိကန်နိုင်ငံထုတ် တာဝေးပစ်ဒုံးကျည်တွေအသုံးပြုခွင့်ပေးခဲ့ခြင်း ဖြစ်ကြောင်းသိရပါတယ်။

ယူကရိန်းသမ္မတဇီလန်စကီးက "ကျွန်တော်တို့ဟာ သင့်တော်တဲ့လုပ်ရပ်တွေလုပ်နိုင်ဖို့ ခွင့်ပြုချက်တွေရထားတယ်"လို့ ပြောပါတယ်။ ယူကရိန်းနိုင်ငံမှာ အမေရိကန်နိုင်ငံထုတ် ATACMS အမျိုးအစားဒုံးကျည်အစင်းရေဘယ်နှစ်ခုအထိ ရှိနေသလဲဆိုတာကို အတိကျမသိသေးကြောင်း သတင်းတွေက ဖော်ပြထားပါတယ်။ ရုရှားသမ္မတပူတင်ကတော့ အမေရိကန်အစိုးရရဲ့ဆုံးဖြတ်ချက်ဟာ တတိယကမ္ဘာစစ်ကိုဦးတည်လာဖွယ်ရှိနေပြီး လျင်မြန်စွာတုံ့ပြန်မှာဖြစ်ကြောင်း သတိပေးထားပါတယ်။ ရုရှားနဲ့ ယူကရိန်းနိုင်ငံကြားဖြစ်ပွားနေတဲ့စစ်ပွဲဟာ (၂)နှစ်ကျော်ခဲ့ပေမယ့် လက်ရှိအချိန်အထိ အပစ်ခတ်ရပ်စဲရေးရယူနိုင်ခြင်းမရှိသေးကြောင်း သိရပါတယ်။