ဂျန်ဇက် (NSS) - ဇန်နဝါရီ ၇

အစ္စရေးစစ်တပ်က ၎င်းတို့ဟာ ဂါဇာကမ်းမြောင်မြောက်ပိုင်းရှိ ဟားမက်စ်အဖွဲ့ရဲ့အမိန့်ပေးညွှန်ကြားမှုစနစ်ကို အလုံးစုံဖျက်ဆီးနိုင်ခဲ့ကြောင်း သတင်းထုတ်ပြန်လိုက်ပါတယ်။

အစ္စရေးစစ်တပ်ရဲ့ပြောရေးဆိုခွင့်ရှိသူတစ်ဦးဖြစ်တဲ့ ဗိုလ်ချုပ် ဟာဂါရီက ပါလက်စတိုင်းလက်နက်ကိုင်အဖွဲ့တွေဟာ လက်ရှိအချိန်မှာ အမိန့်ပေးညွှန်ကြားသူမရှိဘဲ တိုက်ခိုက်နေရခြင်းဖြစ်ကြောင်း ပြောပါတယ်။ ဟာဂါရီက အစ္စရေး စစ်တပ်ဟာ စစ်ပွဲစတင်ချိန်နောက်ပိုင်းတည်းက လက်ရှိအချိန်အထိ ဟားမက်စ်လက်နက်ကိုင်အဖွဲ့ဝင် ၈ဝဝဝ နီးပါး သုတ်သင်နိုင်ခဲ့ကြောင်း ပြောပါတယ်။ 

အစ္စရေးစစ်တပ်ဟာ လက်ရှိအချိန်မှာ ဂါဇာဒေသ အလယ်ပိုင်းနဲ့တောင်ပိုင်းဒေသကို တိုက်ခိုက်ဖျက်ဆီးဖို့ အာရုံစိုက် လုပ်ကိုင်နေကြောင်း ပြောပါတယ်။ 

အစ္စရေး နဲ့ ဟားမက်စ်လက်နက်ကိုင်အဖွဲ့ကြား စစ်ပွဲစတင်ခဲ့ပြီးနောက်ပိုင်း အစ္စရေးရဲ့တိုက်ခိုက်မှုတွေကြောင့် ပါလက်စတိုင်းလူမျိုး အနည်းဆုံး ၂၂ဝဝဝ ကျော် သေဆုံးထားပြီး လူပေါင်း နှစ်သန်းကျော် နေရပ်စွန့်ခွာနေရကြောင်း ပါလက်စတိုင်းကျန်းမာရေးအဖွဲ့က ပြောပါတယ်။

အစ္စရေးဝန်ကြီးချုပ်နေတန်ရာဟုက အစ္စရေးဟာ ဟားမက်စ်အဖွဲ့ကို အမြစ်ပြတ်ချေမှုန်းနိုင်ဖို့၊ ပြန်ပေးဆွဲခံရသူ တွေကို ပြန်လွှတ်ပေးဖို့ နဲ့ အစ္စရေးနိုင်ငံအပေါ် နောက်ထပ်တစ်ကြိမ်ခြိမ်းခြောက်မှုတွေမဖြစ်အောင် လုပ်ဆောင်ဖို့ ထိုးစစ်ဆင်မှုတွေ ဆက်လက်လုပ်ကိုင်သွားမှာဖြစ်ကြောင်း ပြောပါတယ်။ 

အစ္စရေးဝန်ကြီးချုပ်က "ဟားမက်စ်အဖွဲ့အပေါ် အလုံးစုံအနိုင်ရချိန်အထိ တိုက်ပွဲတွေကို ဆက်လက်တိုက်ခိုက်သွား မယ်" လို့ ပြောပါတယ်။ 

ဒါပေမယ့် အစ္စရေးဟာ လက်ဘနွန်နိုင်ငံအတွင်းရှိ ဟားမက်စ်လက်နက်ကိုင်အဖွဲ့ခေါင်းဆောင်တစ်ဦးကို ပြီးခဲ့တဲ့ ရက်ပိုင်းက သုတ်သင်ခဲ့ပြီးနောက် တင်းမာမှုအရှိန် ပိုမိုမြင့်တက်လာခဲ့ရာ ဟစ်ဘိုလာအုပ်စုတွေက အစ္စရေးကို ပစ်မှတ်ထားတိုက်ခိုက်မှုတွေ အရှိန်မြင့်လုပ်ဆောင်ခဲ့ကြောင်း သိရပါတယ်။