ဂျန်ဇက် (NSS) - ဇန်နဝါရီ ၇

အီရတ်ဝန်ကြီးချုပ်မိုဟမ်မက် ရှီယာအယ်ဆူဒါနီက ၎င်းတို့နိုင်ငံအတွင်းကနေ အမေရိကန်ဦးဆောင်တဲ့ နိုင်ငံတကာ တပ်ဖွဲ့တွေကို နှင်ထုတ်သွားတော့မှာဖြစ်ကြောင်း ထုတ်ဖော်ပြောဆိုလိုက်ပါတယ်။ 

အီရတ်နိုင်ငံအတွင်းရှိ အမေရိကန်တပ်ဖွဲ့တွေရဲ့တိုက်ခိုက်မှုတွေကြောင့် အီရတ်ပြည်သူစစ်အဖွဲ့ခေါင်းဆောင်တွေ ကို ထိခိုက်သွားခဲ့ပြီးနောက် အီရတ်အစိုးရက နိုင်ငံအတွင်းရှိ အီရတ်အစိုးရ အမေရိကန်တပ်ဖွဲ့တွေကို ပြန်နှင်ထုတ်ဖို့ စီစဉ်လာခဲ့တာဖြစ်ပါတယ်။ 

အမေရိကန်စစ်တပ်ဟာ အီရတ်အစိုးရက စပွန်ဆာပေးထားတဲ့ Popular Mobilization Forces အမည်ရှိ ပြည်သူစစ်အဖွဲ့တွေကို လေကြောင်းက တိုက်ခိုက်ခဲ့ကြောင်း သိရပါတယ်။ အီရတ်ဝန်ကြီးချုပ်က "Popular Mobilization Forces အဖွဲ့တွေထဲမှာ နိုင်ငံအတွင်းရှိ အစိုးရအဖွဲ့တွေကို ကိုယ်စားပြုသူတွေ ပါဝင်နေတဲ့ အဖွဲ့အစည်းဖြစ်ပါတယ်။

အီရတ်စစ်တပ်အတွက် အဓိကအရေးပါတဲ့လက်နက်ကိုင်အဖွဲ့ဝင်တွေလည်းဖြစ်ပါတယ်။ အမေရိကန်အစိုးရက ကျွန်တော်တို့ လုံခြုံရေးတပ်ဖွဲ့တွေကို တိုက်ခိုက်ခဲ့တာကိုပြစ်တင်ရှုတ်ချပါတယ်။ အမေရိကန်တပ်ဖွဲ့တွေဟာ ခွင့်ပြုထားတဲ့လုပ်ပိုင်ခွင့်ထက်ကျော်လွန်ပြီး လုပ်ဆောင်ခဲ့တယ်" လို့ ပြောပါတယ်။  

အီရတ်အစိုးရဟာ ISIS အဖွဲ့တွေကို တိုက်ခိုက်ဖို့အတွက် အမေရိကန်တပ်ဖွဲ့တွေကို အီရတ်နိုင်ငံအတွင်း လာရောက် အခြေစိုက်တပ်စွဲထားဖို့ ဖိတ်ခေါ်ခဲ့ကြောင်း သိရပါတယ်။ အမေရိကန်အစိုးရကတော့ ၎င်းတို့တိုက်ခိုက်ခဲ့သူတွေဟာ အီရန်နိုင်ငံရဲ့အထောက်အပံ့ကို ရရှိထားတဲ့လက်နက်ကိုင်အဖွဲ့အစည်းတွေဖြစ်တယ်လို့ ပြောပါတယ်။ 

အီရတ်နိုင်ငံအတွင်းမှာ အမေရိကန်တပ်ဖွဲ့ဝင်အရေအတွက် ၂၅ဝဝ ကျော် ကျန်ရှိနေဆဲဖြစ်ကြောင်း သိရပါတယ်။ အီရတ်ဝန်ကြီးချုပ်က "အ‌မေရိကန်တပ်ဖွဲ့တွေကို အီရတ်နိုင်ငံအတွင်း တပ်စွဲခွင့်ပြုထားတဲ့ သက်တမ်းကုန်ဆုံးချိန် မှာ ပြန်လည်ချုပ်ဆိုမယ့်စာချုပ်နဲ့ပတ်သက်ပြီး ဆွေးနွေးရမှာဖြစ်ပါတယ်။ အီရတ်အစိုးရဟာ နိုင်ငံရဲ့ကုန်းမြေ၊ ရေပိုင်နက် နဲ့ လေပိုင်နက်အချုပ်အခြာတွေကို အပြည့်အဝ ပြန်လည်ထိန်းချုပ်နိုင်ဖို့ ကြိုးပမ်းမှာဖြစ်တယ်။ အီရတ်နိုင်ငံအတွင်းနိုင်ငံတကာတပ်ဖွဲ့တွေ တပ်စွဲခွင့် သက်တမ်းကုန်ဆုံးချိန်မှာ ကိုယ်ရပ်တည်ချက်နဲ့ကိုယ် လုပ်ဆောင်သွားမယ်" လို့ ပြောပါတယ်။