ကွမ်းလုံမြို့ ထိန်းချုပ်သိမ်းပိုက်ခံရခြင်း မရှိ၊ ကွမ်းလုံဗျူဟာကုန်းနှင့် လုံခြုံရေးအဖွဲ့ဝင်များက ပြင်းပြင်းထန်ထန် ခုခံ ကာကွယ်နေဟု နစကပြော
မြူနစ် (NSS) - နိုဝင်ဘာ ၁ဝ
ရှမ်းပြည်နယ်ရှိ ကွမ်းလုံမြို့သည် ထိန်းချုပ်သိမ်းပိုက်ခံရခြင်း မရှိသေးကြောင်း နှင့် ကွမ်းလုံဗျူဟာကုန်းနှင့် လုံခြုံရေးအဖွဲ့ဝင်များက ပြင်းပြင်းထန်ထန် ခုခံကာကွယ်နေကြောင်း နစကဘက်က ဆိုသည်။
နစကပြောခွင့်ရ ဗိုလ်ချုပ်ဇော်မင်းထွန်းက ယနေ့(နိုဝင်ဘာ ၁ဝ ရက်)တွင် ကွမ်းလုံမြို့အခြေအနေနှင့်ပတ်သက်၍ NP News သတင်းဌာန၏ မေးမြန်းမှုအပေါ် အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။
ကွမ်းလုံမြို့နှင့်အနီး တစ်ဝိုက်ရှိ လုံခြုံရေးစခန်းများကို ကိုးကန့်လက်နက်ကိုင်အဖွဲ့ MNDAA ဦးဆောင်သော လက်နက်ကိုင်အဖွဲ့များသည် အင်အားအလုံးအရင်းဖြင့် ဝင်ရောက်တိုက်ခိုက်နေသည်မှာ (၅)ရက်ခန့်ရှိပြီဖြစ် ကြောင်း သိရသည်။
“ကွမ်းလုံမြို့မှာ တိုက်ပွဲဖြစ်ပွားတာတော့ (၅)ရက်လောက်နီးပါးရှိနေပြီ။ အဲဒီမှာ ကွမ်လုံမှာ ယခင်ကတည်းကရှိခဲ့တဲ့ ကွမ်းလုံဗျုဟာနဲ့ အဖွဲ့တွေကတော့ ပြင်းပြင်းထန်ထန် ခုခံဆောင်ရွက်နေတယ်။ နောက်ထပ်အထောက်အကူပြုမယ့် အဖွဲ့များလည်း စေလွှတ်ပြီး ဖြစ်ပါတယ်။ ဒီနေရာက အရေးကြီးတဲ့နေရာလည်းဖြစ်တယ်။ ကျွန်တော်တို့အနေနဲ့ ခုခံ ကာကွယ်နေတယ်” ဟု ဗိုလ်ချုပ်ဇော်မင်းထွန်းက ပြောသည်။
MNDAA ဦးဆောင်သော လက်နက်ကိုင်အဖွဲ့များသည် အင်အားအလုံးအရင်းဖြင့် နေ့စဉ်နီးပါး ကွမ်းလုံမြို့ကို တိုက်ခိုက်နေခြင်းဖြစ်ပြီး Drop ဗုံးများကို အများဆုံးအသုံးပြုကာ တိုက်ခိုက်နေခြင်းဖြစ်ကြောင်း ၎င်းက ထပ်မံ ပြောသည်။
ထို့ပြင် PDF အဖွဲ့ဝင်များအနေဖြင့် MNDAA ၏ စစ်ဝတ်စုံများကို ဝတ်ဆင်ကာ ကွမ်းလုံမြို့ရှိ လုံခြုံရေးစခန်းများကို ဝင်ရောက်တိုက်ခိုက်နေရမှုများလည်းရှိကြောင်း သိရသည်။
ကွမ်းလုံမြို့အား အပြီးသတ်သိမ်းပိုက်ပြီးဖြစ်ကြောင်း MNDAA က အတည်ပြုထားသည်ဟုဆိုကာ NUG ၏ ကာကွယ်ရေးဝန်ကြီးဌာနဆိုသောအဖွဲ့အစည်းက ယမန်နေ့တွင် သတင်းထုတ်ပြန်ခဲ့သည်။
“ဒါတွေနဲ့ပတ်သက်ပြီးတော့ ကျွန်တော်ပြောချင်တာက ကောလဟာလကို နည်းမျိုးစုံနဲ့ ဖြန့်ပါလိမ့်မယ်။ ဝါဒဖြန့်ပါ လိမ့်မယ်။ ဒါတွေနဲ့ပတ်သက်ပြီး ပြည်သူလူထုအနေနဲ ယုံကြည်မှုမရှိကြဖို့ ပြောချင်ပါတယ်” ဟု နစကပြောခွင့်ရ ဗိုလ်ချုပ်ဇော်မင်းထွန်းက ဆက်လက်ပြောသည်။
MNDAA၊ TNLA၊ AA မဟာမိတ်(၃)ဖွဲ့သည် အောက်တိုဘာ ၂၇ ရက်မှစတင်ကာ (၁ဝ၂၇ စစ်ဆင်ရေး) အမည်ဖြင့် ရှမ်းပြည်နယ်မြောက်ပိုင်းအတွင်းရှိ လုံခြုံရေးစခန်းများကို ဝင်ရောက်တိုက်ခိုက်ခဲ့ပြီး ၎င်းတို့နှင့်အတူ KIA အဖွဲ့၊ PDF အဖွဲ့များကလည်း ပူးပေါင်းတိုက်ခိုက်လျက်ရှိသည်။
“သိန္နီဘက်ခြမ်းအခြေအနေမှာ သိန္နီမြို့ထဲက တစ်ချို့နေရာတွေမှာတော့ သောင်းကျန်းသူများအနေနဲ့ ဝင်ရောက်နေ တာရှိတယ်။ လမ်းတွေကို ချိုးဖျက်ထားတာရှိတယ်။ ဒါတွေနဲ့ပတ်သက်ပြီးလည်း တပ်မတော်အနေနဲ့ ပြင်ဆင်ရေး လုပ်ငန်းတွေ၊ ပြန်လည်ပြီးတော့ လုံခြုံရေးလုပ်ငန်းတွေ ဆောင်ရွက်လျက်ရှိပါတယ်” ဟု နစကပြောခွင့်ရက ဆိုသည်။
မနက်ဖြန် (နိုဝင်ဘာ ၁၁ ရက်)တွင် တရုတ်နိုင်ငံ၏ အကူအညီဖြင့် တည်ဆောက်ခဲ့သော ကွမ်းလုံတံတားသစ် ဖွင့်လှစ်ရန် မြန်မာ-တရုတ်နှစ်နိုင်ငံအစိုးရကြား စီစဉ်ထားသော်လည်း တိုက်ပွဲများကြောင့် ၎င်းအစီအစဉ်ကို ယာယီ ရပ်ဆိုင်းထားရကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဂါဇာဒေသကို ရယူ သိမ်းပိုက်အုပ်ချုပ်ဖို့ ကြိုးပမ်းမှာမဟုတ်ဘူးလို့ အစ္စရေးအစိုးရ ပြော
RELATED POSTS
24 Oct 2024 | နိုင်ငံရေး,နိုင်ငံတကာ
24 Oct 2024 | နိုင်ငံရေး,နိုင်ငံတကာ
23 Oct 2024 | နိုင်ငံရေး,နိုင်ငံတကာ