အစ္စရေး - ပါလက်စတိုင်း နောက်ဆုံးရသတင်း updated (Nov- 8 / 1:00 PM)
ဂျန်ဇက် (NSS) - နိုဝင်ဘာ ၈
ဂါဇာကမ်းမြောင်ဒေသကို မြေပြင်ထိုးစစ်ဆင်နွှဲတဲ့ အစ္စရေးတပ်ဖွဲ့တွေဟာ ဟားမက်စ်အဖွဲ့ရဲ့မြေအောက်ဥမင်လိုဏ်ခေါင်းကွန်ရက်များကို နိုဝင်ဘာ ၈ ရက်မှစတင်ပြီး ရှာဖွေဖျက်ဆီးသွားမယ်လို့ ဆိုပါတယ်။
အစ္စရေးဟာ ဟားမက်စ်အဖွဲ့ရဲ့တိုက်ခိုက်ခြင်းကိုခံရပြီးနောက် အောက်တိုဘာ ၇ ရက်ကတည်းက ဂါဇာဒေသကို လေကြောင်းကနေ ဗုံးကြဲတိုက်ခိုက်မှုများပြုလုပ်ခဲ့ကာ လက်ရှိအချိန်မှာတော့ မြေပြင်ထိုးစစ်ဆင်တိုက်ခိုက်နေကြောင်း သိရပါတယ်။
လက်ဘနွန်အခြေစိုက် ဟစ်ဘိုလာအုပ်စုတွေဟာ နိုင်ငံတောင်ပိုင်းကနေ အစ္စရေးထိန်းချုပ်ထားတဲ့ ဂိုလန် ကုန်းမြင့်ဒေသနဲ့ ဂျာလစ်ဒေသတွေကို ရော့ကတ်ဒုံးကျည်အစင်းပေါင်း ၂ဝ ကျော်နဲ့ ပစ်ခတ်တိုက်ခိုက်ခဲ့ကြောင်း သိရပါတယ်။ ဟစ်ဘိုလာအဖွဲ့တာဝန်ရှိသူတစ်ဦးက အစ္စရေးရဲ့တိုက်ခိုက်မှုကြောင့် လက်ဘနွန်တောင်ပိုင်းမှာ အဘွားအိုတစ်ဦးနဲ့ ကလေးငယ်သုံးဦး သေဆုံးရမှုကို လက်တုံ့ပြန်တိုက်ခိုက်မှုအဖြစ် အစ္စရေးကို လက်တုံ့ပြန် တိုက်ခိုက်ခဲ့တာဖြစ်ကြောင်း ဆိုပါတယ်။
စင်ကာပူအစိုးရဟာ ခွင့်ပြုချက်မရှိဘဲ ဟားမက်စ်-အစ္စရေးစစ်ပွဲနဲ့ ဆက်နွယ်ပြီးလူမြင်ကွင်းမှာ ကန့်ကွက်တဲ့ အမှတ်အသားလုပ်ဆောင်ခြင်းများ မလုပ်ဆောင်ဖို့ သတိပေးလိုက်ပါတယ်။ ခွင့်ပြုချက်မရှိဘဲ ဟားမက်စ် နဲ့ အစ္စရေးနိုင်ငံကြားဖြစ်ပွားနေတဲ့ စစ်ပွဲနဲ့ပတ်သက်တဲ့တံဆိပ်အမှတ်သားတွေ လုပ်ဆောင်မယ်ဆိုရင် ထောင်ဒဏ် ၆ လ ဒါမှမဟုတ် ငွေဒဏ်အဖြစ် ဒေါ်လာ ၅ဝဝ ဒဏ်ရိုက်ခံရမှာဖြစ်ကြောင်း ပြောပါတယ်။
အမေရိကန်သမ္မတဂျိုးဘိုင်ဒန်ဟာ နိုဝင်ဘာ ၇ ရက်က အစ္စရေးဝန်ကြီးချုပ်နေတန်ရာဟုနဲ့ ဖုန်းဆက် ဆွေးနွေးချိန် အတွင်း ဂါဇာဒေသကို တိုက်ခိုက်နေခြင်းများ ရပ်တန့်ထားဖို့တောင်းဆိုခဲ့ကြောင်း သိရပါတယ်။ ဂါဇာဒေသရှိ ပါလက်စတိုင်းပြည်သူတွေကို လူသားချင်းဆိုင်ရာစာနာမှုအကူအညီတွေပေးနိုင်ဖို့ တိုက်ခိုက်မှုတွေကို ဖြစ်နိုင်မယ် ဆိုရင် ရက်ပိုင်းလောက်ရပ်တန့်ထားဖို့တောင်းဆိုခဲ့တာဖြစ်ပါတယ်။
အစ္စရေးနဲ့ ဟားမက်စ်လက်နက်ကိုင်အဖွဲ့ကြားစစ်ပွဲစတင်တဲ့ တစ်လပြည့်ရက်ဖြစ်တဲ့ နိုဝင်ဘာ ၇ ရက်မှာ အမေရိကန်နိုင်ငံ နယူးယောက်မြို့က ဆန္ဒပြအုပ်စုတွေဟာ ကုလသမဂ္ဂရုံးရှေ့မှာ ထိုင်လျက် ငြိမ်းချမ်းစွာဆန္ဒပြခဲ့ပြီး ပြန်ပေးဆွဲခံထားရသူတွေ အမြန်ဆုံးပြန်လွှတ်ပေးဖို့တောင်းဆိုခဲ့ကြောင်း သိရပါတယ်။
ဟားမက်စ်အဖွဲ့ဟာ မတူညီတဲ့နိုင်ငံပေါင်း ၄ဝ ကျော်ကနေ လူပေါင်း ၂၄ဝ ကျော်ကို ပြန်ပေးဆွဲခံထားရကြောင်း သိရပါတယ်။ ဆန္ဒပြသူတွေထဲမှာ အသက် ၄ နှစ်အရွယ်ရှိ ကလေးငယ်လည်း ပါဝင်ခဲ့ပြီး လူပေါင်း ၁၃ဝ ကျော်ဟာ အနက်ရောက်အဝတ်စားတွေ ဝတ်ဆင်ကာ မျက်လုံးကို အနက်ရောက်အဝတ်စည်းပြီး ပြန်ပေးဆွဲခံထားရသူတွေ ပြန်လွှတ်ပေးဖို့ တောင်းဆိုဆန္ဒပြခဲ့တာဖြစ်ပါတယ်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
နေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်း(၃)ခုအတွက် လျှပ်စစ်ဓာတ်အားဝယ်ယူရေးသဘောတူစာချုပ်ကို မြန်မာနှင့် တရုတ်ကြားချုပ်ဆို
RELATED POSTS
24 Oct 2024 | နိုင်ငံရေး,နိုင်ငံတကာ
24 Oct 2024 | နိုင်ငံရေး,နိုင်ငံတကာ
23 Oct 2024 | နိုင်ငံရေး,နိုင်ငံတကာ