Pearl (NSS) - နိုဝင်ဘာ ၈

နေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်း (၃)ခုအတွက် လျှပ်စစ်ဓာတ်အားဝယ်ယူရေးသဘောတူစာချုပ်ကို မြန်မာ နှင့် တရုတ်ကြား ချုပ်ဆိုခဲ့ကြောင်း  မြန်မာနိုင်ငံဆိုင်ရာတရုတ်သံရုံး၏ အချက်အလက်များအရ သိရသည်။ 

ယမန်နေ့ (နိုဝင်ဘာလ ၇ ရက်)တွင် နေပြည်တော်၌ တရုတ်-မြန်မာပူးပေါင်းဆောင်ရွက်သည့် နေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်း သဘောတူစာချုပ်ချုပ်ဆိုသည့်အခမ်းအနားကို ကျင်းပခဲ့ကြောင်း သိရသည်။ 

အဆိုပါ အခမ်းအနားသည် မကွေးတိုင်းရှိ ကြီးအုံကြီးဝ နှင့် စေတုတ္ထရာ၊ မန္တလေးတိုင်းရှိ ကင်းတားနေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်း (၃) ခုအတွက် လျှပ်စစ်ဓာတ်အားဝယ်ယူရေး သဘောတူစာချုပ်ချုပ်ဆိုခြင်းဖြစ်ပြီး မြန်မာနိုင်ငံ လျှပ်စစ်စွမ်းအားဝန်ကြီးဌာန နှင့် တရုတ်နိုင်ငံ POWERCHINA Resources Ltd တို့ ပူးပေါင်းဆောင်ရွက်ခြင်းဖြစ်ကြောင်း သိရသည်။ 

ထို့ပြင် စီမံကိန်း (၃)ခု၏ စုစုပေါင်းစက်တပ်ဆင်အင်အားသည် ၉၀ မဂ္ဂါဝပ်ဖြစ်ပြီး အဆိုပါဒေသဖွံ့ဖြိုးတိုး တက်မှုအတွက် အာမခံချက်ပေးမည်ဖြစ်ကြောင်း သိရသည်။ 

အခမ်းအနား၌  တတိယအကြိမ် “Belt and Road” နိုင်ငံတကာပူးပေါင်းဆောင်ရွက်မှု ထိပ်သီးဖိုရမ်ရလဒ်များကို အကောင်အထည်ဖော်ရေး၊ လျှပ်စစ်ဓာတ်အားအပြန်အလှန်ချိတ်ဆက်မှုဖော်ဆောင်ရေး၊ မြန်မာ နိုင်ငံ၏ “လျှပ်စစ်လိုအပ်ချက်”ကို ကူညီဖြေရှင်းပေးရေး နှင့် တရုတ်-မြန်မာစီးပွားရေးစင်္ကြံ တည်ဆောက်မှုအတွက် အာမခံချက်ပေးရေးတို့နှင့်ပတ်သက်၍လည်း ဆွေးနွေးပြောကြားခဲ့ကြောင်း သိရသည်။ 

အခမ်းအနားသို့ မြန်မာနိုင်ငံ လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးဉာဏ်ထွန်း နှင့် မြန်မာ နိုင်ငံဆိုင်ရာ တရုတ်သံအမတ်ကြီး Mr. Chen Hai ၊ စီမံကိန်းကုမ္ပဏီ အထွေထွေမန်နေဂျာ Mr. Jiang Xingcheng တို့ တက်ရောက်ခဲ့ကြောင်း သိရသည်။