လာအိုနိုင်ငံက အာဆီယံအလှည့်ကျဥက္ကဋ္ဌအဖြစ် တာဝန်ယူချိန်တွင်လည်း မြန်မာအရေးနှင့်ပတ်သက်ပြီး အာဆီယံ အဖွဲ့၏ ရပ်တည်ချက်ပြောင်းလဲမည် မဟုတ်ဟုဆို
ဂျန်ဇက် (NSS) - အောက်တိုဘာ ၂၉
အာဆီယံအဖွဲ့အနေဖြင့် မြန်မာနိုင်ငံတွင် ငြိမ်းချမ်းမှုများပြန်လည်ရရှိစေရန်အတွက် လာအိုနိုင်ငံက အာဆီယံအလှည့်ကျဥက္ကဋ္ဌအဖြစ် တာဝန်ယူချိန်တွင်လည်း SAC နှင့် စေ့စပ်ဆွေးနွေးမှုများ ဆက်လက်လုပ်ဆောင်သွားမည် ဖြစ်ကြောင်း၊ လာအိုနိုင်ငံက အာဆီယံအလှည့်ကျဥက္ကဋ္ဌအဖြစ် တာဝန်ယူချိန်တွင်လည်း မြန်မာနိုင်ငံနှင့်ပတ်သက် ပြီး အာဆီယံအဖွဲ့၏ ရပ်တည်ချက်အပြောင်းအလဲဖြစ်သွားမည်မဟုတ်ကြောင်း အာဆီယံအတွင်းရေးမှူးချုပ် Kao Kim Hourn က ဂျပန်နိုင်ငံအခြေစိုက် Nikkei Asia သတင်းဌာန နှင့် အောက်တိုဘာ ၂၇ ရက်က အင်တာဗျူးတွင် ထည့်သွင်းပြောဆိုခဲ့ကြောင်း သိရသည်။
လာအိုနိုင်ငံသည် အာဆီယံအလှည့်ကျဥက္ကဋ္ဌအသစ်အဖြစ် တာဝန်ယူချိန်တွင် မြန်မာအရေးနှင့်ပတ်သက်ပြီး ကိုင်တွယ်ဖြေရှင်းရာတွင် အလျော့ပေးဖွယ်ရှိနေကြောင်း သတင်းများထွက်ပေါ်နေခဲ့သည်။ လာအိုနိုင်ငံသည် လာမည့် ၂ဝ၂၄ ခုနှစ်တွင် အာဆီယံအလှည့်ကျဥက္ကဋ္ဌအဖြစ် တာဝန်ယူသွားမည်ဖြစ်ရာ မြန်မာနိုင်ငံငြိမ်းချမ်းမှုများ ပြန်လည်ရရှိစေရန် နှင့် အာဆီယံသဘောတူညီချက်ငါးချက်ကို သိသာတိုးတက်အောင် အကောင်အထည်ဖော်ရေး အတွက် ကြိုးပမ်းရဖွယ်ရှိနေကြောင်း သိရသည်။ အာဆီယံအတွင်းရေးမှူးချုပ်က လာမည့်နှစ်တွင် အာဆီယံအဖွဲ့ သည် မြန်မာနိုင်ငံအရေးအတွက် အင်ဒိုနီးရှားနိုင်ငံ လုပ်ခဲ့သောအတိုင်း ဆက်လုပ်သွားမှာဖြစ်ပြီး မြန်မာနိုင်ငံရေး အငြင်းပွားမှုများနှင့်ပတ်သက်ပြီး လာအိုနိုင်ငံ၏ ကိုင်တွယ်ဖြေရှင်းနိုင်စွမ်းကို လျှော့မတွက်သင့်ကြောင်း ထပ်မံ ပြောခဲ့သည်။
အာဆီယံအဖွဲ့ဝင်နိုင်ငံများကြား မြန်မာနိုင်ငံရေးအငြင်းပွားမှုများကိုဖြေရှင်းရန် ကြိးပမ်းရာတွင် စိတ်ဝမ်းကွဲပြားမှုရှိ နေသည်ဆိုသောသတင်းများကို အာဆီယံအတွင်းရေးမှူးချုပ်က ငြင်းဆန်ခဲ့ကြောင်း သိရသည်။ မြန်မာနိုင်ငံအရေးကို ဖြေရှင်းနိုင်ရန်အတွက် အာဆီယံအဖွဲ့၏ လက်ရှိဥက္ကဋ္ဌ၊ ယခင် ဥက္ကဋ္ဌဟောင်းနှင့် လာမည့် အလှည့်ကျဥက္ကဋ္ဌ တာဝန်ယူ ကိုင်တွယ်ဖြေရှင်းမည့်ပုံစံမျိုး လုပ်ဆောင်ရန် အာဆီယံက ပြီးခဲ့သော စက်တင်ဘာလ တွင် ကျင်းပခဲ့သော ထိပ်သီးအစည်းအဝေးတွင် အဖွဲ့ဝင်နိုင်ငံများကြား သဘောတူညီခဲ့ကြောင်း သိရသည်။
အဆိုပါ အစီအစဉ်နှင့်ပတ်သက်ပြီး အာဆီယံအတွင်းရေးမှူးချုပ်က မြန်မာအရေးအတွက် သုံးနိုင်ငံ ပူးပေါင်းကိုင်တွယ်မည့်အစီအစဉ်အသစ်က ကောင်းမွန်ကြောင်း ပြောသည်။ မြန်မာနိုင်ငံတွင် ၂ဝ၂၁ ခုနှစ်က ဖေဖော်ဝါရီလက အာဏာအငြင်းပွားမှုဖြစ်ပွားခဲ့ပြီးနောက်ပိုင်း အာဆီယံအဖွဲ့သည် မြန်မာနိုင်ငံရေးအငြင်းပွားမှုများ ကို ဖြေရှင်းနိုင်ရန် ကြားဝင်ကြိုးပမ်းခဲ့ပြီး အာဆီယံသဘာတူညီချက်ငါးချက်ကို SAC အဖွဲ့အကြီးအကဲ နှင့် သဘောတူညီမှုရယူနိုင်ခဲ့ကြောင်း သိရသည်။
အဆိုပါအာဆီယံသဘောတူညီချက်ငါးချက်သည် အကောင်အထည်ဖော်ရေးကြိုးပမ်းရာတွင် လက်ရှိအချိန်အထိ သိသာတိုးတက်ခြင်းမရှိသေးကြောင်း ဝေဖန်မှုများလည်း ရှိနေသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
လာမည့် သုံးလအတွင်း အယ်လ်နီညိုကြောင့် မိုးခေါင်ရေရှားခြင်းများ ဖြစ်ပေါ်လာနိုင်ဟု မိုးဇလထုတ်ပြန်
RELATED POSTS
24 Oct 2024 | နိုင်ငံရေး,နိုင်ငံတကာ
24 Oct 2024 | နိုင်ငံရေး,နိုင်ငံတကာ
23 Oct 2024 | နိုင်ငံရေး,နိုင်ငံတကာ