ရောင်နီ (NSS) - အောက်တိုဘာ ၂၄

           ဟောင်ကောင် မြို့တော်ရှိ တိရစ္ဆာန် ဥယျာဉ်တစ်ခုမှာ ဘက်တီးရီးယားပိုး ကူးစက်မှု Melioidosis ကြောင့် မျောက် (၁၁)ကောင် ထက်မနည်း သေဆုံးခဲ့တယ်လို့ အာဏာပိုင်တွေက ပြောကြားပါတယ်။ 

         ၁၈၆၀ ခုနှစ်က တည်ဆောက်ခဲ့တဲ့ ဟောင်ကောင်ရဲ့ ရှေးအကျဆုံး တိရစ္ဆာန်ရုံ အတွက် အခုလို ဘက်တီးရီးယားကြောင့် မျောက်သေဆုံးမှုဟာ ပထမအကြိမ် ဖြစ်ပါတယ်။ အဆိုပါ ဘက်တီးရီးယားကူးစက်မှု သတင်းရတဲ့ အောက်တိုဘာ ၁၄ ရက်ကစ တိရစ္ဆာန်ရုံကို ပိတ်ထားခဲ့တယ်လို့ အာဏာပိုင်တွေက ဆိုပါတယ်။ သေဆုံးသွားတဲ့ မျောက်တွေဟာ De Brazza မျိုးစိတ်အပြင် ရှဉ့်မျောက်တစ်ကောင်၊ မျက်နှာဖြူ ဆာကီမျောက်လည်း ပါဝင်ခဲ့ပြီး melioidosis ဘက်တီးရီးယားနဲ့အတူ သွေးလွန်တုပ်ကွေးရောဂါလက္ခဏာနဲ့ သေဆုံးသွားခဲ့တယ်လို့ အာဏာပိုင်တွေက ပြောပါတယ်။ ခွဲစိပ်စစ်ဆေးမှုတွေအရ မျောက်တွေ နေထိုင်ရာ နေရာအနီးရှိ မြေဆီလွှာမှတဆင့် melioidosis ဘက်တီးရီးယားတွေ ကူးစက်လာတယ်လို့ ၎င်းတို့ကဆိုပါတယ်။

         မြို့တော်ရဲ့ယဉ်ကျေးမှုနဲ့ ခရီးသွားလာရေးဝန်ကြီး ကယ်ဗင်ယန်းကတော့ တိရစ္ဆာန်ရုံရှိ မျောက်လှောင်အိမ်တွေအနီးက မြေကြီးကို တူးဖော်ပြီး စမ်းသပ်စစ်ဆေးဖို့ လိုအပ်တယ်လို့ ပြောကြားခဲ့ပါတယ်။ ဒီရောဂါပိုးဟာ  လူနဲ့တိရစ္ဆာန် နှစ်မျိုးလုံးကို ထိခိုက်စေနိုင်ပေမယ့် တိရစ္ဆာန်မှ လူကို ကူးစက်ဖို့တော့ မဖြစ်နိုင်ဘူးလို့ အာဏာပိုင်များက ဆိုပါတယ်။