ဂျန်ဇက် (NSS) - အောက်တိုဘာ ၂၉

အစ္စရေးအစိုးရက  ပါလက်စတိုင်းလက်နက်ကိုင်အဖွဲ့ ဟားမက်စ်နဲ့ဖြစ်ပွားနေတဲ့စစ်ပွဲဟာ ဂါဇာဒေသကိုကြီးမားတဲ့ ဗုံးကြဲတိုက်ခိုက်မှုများနဲ့အတူ နောက်ထပ်အဆင့်တစ်ခုကိုရောက်ရှိလာပြီဖြစ်ကြောင်း ထုတ်ဖော်ပြောဆိုလိုက်ပါတယ်။

ပါလက်စတိုင်းလက်နက်ကိုင်အဖွဲ့ နဲ့ အစ္စရေးကြားဖြစ်ပွားနေတဲ့စစ်ပွဲကြောင့် ဂါဇာဒေသမှာ လူပေါင်းအနည်းဆုံး ၈ဝဝဝ ကျော် သေဆုံးထားပြီး အစ္စရေးဘက်က အနည်းဆုံး ၁၄ဝဝ ကျော် သေဆုံးခဲ့ကြောင်း သိရပါတယ်။ အစ္စရေး ဝန်ကြီးချုပ်နေတန်ရာဟုက "ကျွန်တော်တို့ဟာ မြေပြင်ထိုးစစ်ဆင် စတင်နေတယ်။ ဂါဇာကမ်းမြောင်ဒေသမှာ ပြုလုပ်မယ့် မြေပြင်တိုက်ပွဲတွေဟာ ခက်ခဲပြီး၊ အချိန်ကြာဖွယ်ရှိနေပါတယ်။ ကျွန်တော်တို့ရဲ့မစ်ရှ င်၊ရည်ရွယ်ချက် တွေကို အတူတကွလုပ်ဆောင်သွားမယ်" လို့ ပြောပါတယ်။

ဟားမက်စ်အုပ်စုက ၎င်းတို့အနေနဲ့ အောက်တိုဘာ ၇ ရက်က အစ္စရေးနိုင်ငံကို တိုက်ခိုက်ချိန်အတွင်း ဖမ်းဆီးခဲ့ သူတွေထဲမှာ ပါဝင်နေသူတွေထဲ ပါဝင်နေတဲ့ ရုရှားနိုင်ငံသား ၈ ဦးကို ပြန်လွှတ်ပေးသွားမယ်လို့ ဆိုပါတယ်။ ဟားမက်စ်အုပ်စုဟာ ပြီးခဲ့တဲ့ရက်ပိုင်းက ရုရှားနိုင်ငံကိုသွားရောက်ခဲ့ပြီး တွေ့ဆုံဆွေးနွေးခဲ့ကြောင်း သိရပါတယ်။ အစ္စရေးနိုင်ငံကတော့ ဟားမက်စ်အဖွဲ့ကို လက်ခံတွေ့ဆုံခြင်းမျိုးမလုပ်ဖို့ ရုရှားနိုင်ငံကို တောင်းဆိုခဲ့ကြောင်း သိရပါတယ်။ 

နိုင်ငံတကာကြက်ခြေနီအဖွဲ့က ကမ္ဘာ့နိုင်ငံတွေအနေနဲ့ ဂါဇာဒေသမှာဖြစ်ပွားနေတဲ့ ဘေးဒုက္ခဆိုးအခြေအနေများကို သည်းခံငြိမ်မနေသင့်ကြောင်း ထုတ်ဖော်ပြောဆိုလိုက်ပါတယ်။ အစ္စရေးရဲ့တိုက်ခိုက်မှုတွေကြောင့် ဂါဇာကမ်းမြောင် ဒေသမှာ အရပ်သားများ ထိခိုက်သေဆုံးနေခြင်းများထပ်မံမဖြစ်ပွားအောင် အစ္စရေးနဲ့ ဟားမက်စ်ကြားစစ်ပွဲတွေကို အဆုံးသတ်စေလိုကြောင်း  ICRC အဖွဲ့က ပြောပါတယ်။ 

ဗြိတိန်နိုင်ငံ လန်ဒန်မြို့မှာ အောက်တိုဘာ ၂၈ ရက်က ပါလက်စတိုင်းအားပေးထောက်ခံတဲ့ ဆန္ဒပြပွဲများ လုပ်ဆောင်ခဲ့ပြီး လူပေါင်းထောင်ချီ တက်ရောက်ခဲ့ကြောင်း သိရပါတယ်။ ဆန္ဒပြသူတွေဟာ ဂါဇာဒေသမှာ အပစ်ခတ်ရပ်စဲရေး ချက်ချင်းစတင်နိုင်ဖို့ အဓိကထား တိုက်တွန်းတောင်းဆိုခဲ့ကြောင်း သိရပါတယ်။ အစ္စရေးနဲ့ ဟားမက်စ်တို့ စစ်ပွဲဖြစ်ပွားခဲ့ပြီးနောက် ကမ္ဘာတဝန်းရှိ နိုင်ငံအချို့မှာ ပါလက်စတိုင်း လိုလားထောက်ခံကြောင်း ဆန္ဒပြပွဲများ လုပ်ဆောင်ခဲ့ပြီး စစ်ပွဲကို ချက်ချင်းအဆုံးသတ်စေဖို့ တောင်းဆိုနေကြောင်း သိရပါတယ်။

ဟားမက်စ်ခေါင်းဆောင်တစ်ဦးဖြစ်တဲ့ ယာဟာဆင်ဝါးက ၎င်းတို့အနေနဲ့ ဖမ်းဆီးထားသောအကျဉ်းသားတွေ အပြန်အလှန်လဲလှယ်ဖို့ အဆင်သင့်ရှိနေကြောင်း ထုတ်ဖော်ပြောဆိုထားပါတယ်။

ဟားမက်စ်အဖွဲ့ဟာ အောက်တိုဘာ ၇ ရက်က အစ္စရေးနိုင်ငံကိုတိုက်ခိုက်ချိန်အတွင်း ဖမ်းဆီးထားသူတွေနဲ့ အစ္စရေးအစိုးရ ဖမ်းဆီးထားတဲ့ ပါလက်စတိုင်းလူမျိုးတွေကို အပြန်အလှန်လဲလှယ်ဖို့ လိုလားနေကြောင်း သိရပါတယ်။