ဂါဇာဒေသတွင် ပြုလုပ်နေသော အစ္စရေး၏တိုက်ခိုက်မှုများကိုရပ်တန့်ပြီး အပစ်ခတ်ရပ်စဲရန် ကုလသမဂ္ဂအဖွဲ့ဝင်နိုင်ငံများ မဲခွဲဆုံးဖြတ်

ဂျန်ဇက် (NSS) - အောက်တိုဘာ ၂၈ 

ဂါဇာဒေသတွင်ပြုလုပ်သော အစ္စရေး၏ တိုက်ခိုက်မှုများကို ချက်ချင်းရပ်တန့်ရန် နှင့် အပစ်ခတ်ရပ်စဲရေးချက်ချင်း လုပ်ဆောင်ရန် ကုလသမဂ္ဂအဖွဲ့ညီလာခံအစည်းအဝေးက တိုက်တွန်းတောင်းဆိုလိုက်သည်။ 

အစ္စရေး နှင့် ဟားမက်စ်အဖွဲ့ကြားဖြစ်ပွားနေသည့် စစ်ပွဲ ၂၁ ရက်နေ့မြောက်ဖြစ်သော အောက်တိုဘာ ၂၇ ရက်တွင် ကုလသမဂ္ဂညီလာခံအစည်းအဝေးကိုကျင်းပခဲ့ရာ ဂါဇာဒေသတွင်ပြုလုပ်နေသော အစ္စရေး၏ တိုက်ခိုက်မှုများနှင့် ပတ်သက်ပြီး အပစ်ခတ်ရပ်စဲရန် မဲခွဲဆုံးဖြတ်ခဲ့ရာ ကုလသမဂ္ဂအဖွဲ့ဝင်နိုင်ငံများအနက် အဖွဲ့ဝင်နိုင်ငံပေါင်း ၁၂ဝ က ထောက်ခံမဲပေးခဲ့ပြီး ကန့်ကွက်မဲ ၁၄ မဲရှိခဲ့ကာ ကြားနေမဲ  ၄၅ မဲ ရှိခဲ့ကြောင်း သိရသည်။

အစ္စရေးအစိုးရကတော့ ကုလသမဂ္ဂညီလာခံအတွင်း မဲခွဲဆုံးဖြတ်မှုရလဒ်များအပေါ် စိတ်ဆိုးဒေါသဖြစ်ကာ ပယ်ချ ထားပြီး ဟားမက်စ်လက်နက်ကိုင်အဖွဲ့နှင့်ရင်ဆိုင်မည့် နည်းလမ်းအားလုံးကို အသုံးပြုသွားမည်ဖြစ်ကြောင်း ပြောသည်။

အစ္စရေးသံအမတ်ကြီးဖြစ်သူ ဂီလက်အာဒမ်က "ဒီနေ့ဟာ ကုလသမဂ္ဂအဖွဲ့ နာမည်ပျက်မယ့် နေ့တစ်နေ့ပါ။ ကုလသမဂ္ဂအဖွဲ့ဟာ တရားဝင်မှု ဆက်စပ်မှုတစ်ခုတောင် မရှိတော့ဘူး။ ကုလသမဂ္ဂအဖွဲ့ဟာ ရှက်စရာကောင်းနေ ပါတယ်။ အစ္စရေးနိုင်ငံကတော့ ကိုယ်ကိုယ်တိုင် ခုခံကာကွယ်ပိုင်ခွင့်ရှိတာကို ဆက်လက်အသုံးချသွားမယ်။ ကျွန်တော်တို့ရဲ့အနာဂတ်ကို ကာကွယ်သွားမယ်။ ဟားမက်စ်အဖွဲ့ကို ငရဲဘုံ ပို့ပစ်မယ်။ ဒါမှ ကျွန်တော်တို့ကို နောက်ထပ်တစ်ကြိမ် ဘယ်သူမှ မခြိမ်းခြောက်ရဲတော့မှာပါ" ဟု ပြောသည်။

ဟားမက်စ်အဖွဲ့ကတော့ ပဋိပက္ခများအဆုံးသတ်ရန်အတွက် ကုလသမဂ္ဂအဖွဲ့ကြီး၏ တောင်းဆိုချက်များကို ကြိုဆိုခဲ့ကြောင်း သိရသည်။ ပါလက်စတိုင်းအစိုးရအဖွဲ့၏ နိုင်ငံခြားရေးဝန်ကြီးက အစ္စရေး၏ စစ်ရေးဆောင်ရွက်မှု များက ရက်စက်မှုအထွဋ်အထိပ်ကို ရောက်ရှိနေကြောင်း၊ အစ္စရေး၏ ကျူးကျော်မှုများကို ပယ်ချခဲ့သော နိုင်ငံတကာအဖွဲ့အစည်းများနှင့်အတူ ရပ်တည်သွားမည်ဖြစ်ကြောင်း ပြောသည်။