MNDAA ဦးဆောင်သော မဟာမိတ်(၃)ဖွဲ့၏ (၁၀၂၇ စစ်ဆင်ရေး)အတွင်း ရှမ်းမြောက်ပိုင်းရှိ လုံခြုံရေးစခန်းအချို့ သိမ်းပိုက်ခံခဲ့ရဟုဆို
မြူနစ် (NSS) - အောက်တိုဘာ ၂၈
ကိုးကန့်လက်နက်ကိုင်အဖွဲ့ MNDAA ဦးဆောင်သော မဟာမိတ်(၃)ဖွဲ့၏ (၁၀၂၇ စစ်ဆင် ရေး) အတွင်း ရှမ်းမြောက်ပိုင်းရှိ လုံခြုံရေးစခန်းအချို့ သိမ်းပိုက်ခံခဲ့ရကြောင်း သတင်းရရှိသည်။
မဟာမိတ်(၃)ဖွဲ့ဖြစ်သော MNDAA၊ TNLA နှင့် AA လက်နက်ကိုင်အဖွဲ့တို့သည် ယမန် နေ့(အောက်တိုဘာလ ၂၇ ရက်)၊ နံနက် အစောပိုင်းတွင် ရှမ်းပြည်နယ်မြောက်ပိုင်းရှိ ချင်းရွှေဟော်၊ ကွမ်လုံ၊ နမ့်ခမ်း နှင့် လားရှိုးမြို့တစ်ဝိုက်ရှိ တပ်မတော်၏ လုံခြုံရေးစခန်းများကို ဝင်ရောက်တိုက်ခိုက်မှု ပြုလုပ်ခဲ့သည်။
အဆိုပါ (၁၀၂၇ စစ်ဆင်ရေး)ကာလအတွင်း တအာင်းလက်နက်ကိုင်အဖွဲ့ TNLA အနေဖြင့် လားရှိုးမြို့နယ်ရှိ တပ်မတော်၏ တိန်းတန်တပ်စခန်းကို သိမ်းပိုက်ရရှိခဲ့သည်ဟု TNLA ဘက်က သတင်းထုတ်ပြန်ထားသည်။
ထို့ပြင် တိန်းတန်တပ်စခန်းကို သိမ်းပိုက်စဉ် သေနတ် (၁၄)လက်၊ RPG တစ်လက်၊ လက်ပစ်ဗုံး အလုံး(၂၀၀)အပါအဝင် အခြားဆက်စပ်ပစ္စည်းများကို သိမ်းဆည်းရရှိခဲ့သည်ဟုလည်း TNLA ဘက်က ပြောသည်။
“လားရှိုးမြို့မှာ ဒီနေ့ တစ်မနက်လုံးတော့ ဘာသံမှ မကြားရဘူး။ အခုနေ့လည်လောက်မှာ လက်နက်ကြီးသံတွေတော့ ပြန်ကြားရတာရှိတယ်။ မနေ့ကည တစ်နာရီ၊ ၂ နာရီလောက်အထိ ပစ်ခတ်သံတွေကြားရတာပေါ့။ ကြားတာတော့ လားရှိုး- မူဆယ်ဘက်ကို သွားလို့ရတယ်ပြောကြတယ်။ ဒါပေမယ့် ချင်းရွှေဟော်ဘက်ကို ပိတ်ထားတယ်ကြားတယ်။ လမ်းပေါ်မှာတော့ သွားတဲ့လာတဲ့သူ သိပ်မရှိဘူးလို့ သိရတယ်”ဟု လားရှိုးမြို့ခံတစ်ဦးက NSS ကို ပြောသည်။
အလားတူ (၁၀၂၇ စစ်ဆင်ရေး)ကာလအတွင်း နမ့်ခမ်းမြို့နယ်၊ နမ့်ခမ်း-နမ့်ဖတ်ကားလမ်းပေါ်ရှိ (၁၃)မိုင်တပ်စခန်း၊ (၁၂) မိုင်တပ်စခန်းနှင့် မန်မိုင်တပ်စခန်း(မိုက်ခရိုဝိတ်တာဝါတိုင်တပ်စခန်း) (၃)ခုကိုလည်း သိမ်းပိုက်ခဲ့ကြောင်း TNLA အဖွဲ့ဘက်က ထုတ်ပြန်ထားသည်။
(၁၀၂၇ စစ်ဆင်ရေး)ကာလအတွင်း ကိုးကန့်လက်နက်ကိုင်အဖွဲ့ MNDAA အနေဖြင့် ယနေ့(အောက်တိုဘာလ ၂၈ ရက်)တွင် ချင်းရွှေဟော်ဒေသရှိ နမ့်ကျွမ်းတပ်စခန်းတစ်ခုကို သိမ်းပိုက်ခဲ့ကြောင်း MNDAA အဖွဲ့က ထုတ်ပြန်ထားသည်ကို တွေ့ရှိရသည်။
ထို့ပြင် ယမန်နေ့တွင်လည်း ချင်းရွှေဟော်ဒေသတစ်ဝိုက် နှင့် ကွမ်လုံကြားရှိ လုံခြုံရေးစခန်းများကို MNDAA အဖွဲ့က တိုက်ခိုက်သိမ်းပိုက်မှုများရှိခဲ့ကြောင်း သိရသည်။
ကိုးကန့်အဖွဲ့ MNDAA ဦးဆောင်သော မဟာမိတ်(၃)ဖွဲ့၏ (၁၀၂၇ စစ်ဆင်ရေး)အတွင်း ၎င်း(၃)ဖွဲ့နှင့်အတူ PDF အဖွဲ့ဝင် အများအပြားကလည်း ပူးပေါင်းကာ တိုက်ခိုက်နေမှုများရှိနေကြောင်း သိရသည်။
ထိုသို့ လက်နက်ကိုင်မဟာမိတ်(၃)ဖွဲ့က သိမ်းပိုက်ထားသည့် လုံခြုံရေးစခန်းအချို့ကို တပ်မတော်လုံခြုံရေးအဖွဲ့ဘက်က ပြန်လည်တိုက်ခိုက် သိမ်းယူနိုင်မှုများ ရှိနေကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။
“ညတုန်းက တစ်ညလုံး ကွမ်လုံကို ဝင်တိုက်တယ်။ ချင်းရွှေဟော်က ရာဘာကုန်းစခန်းကို ဝင်တိုက်တယ်။ ဒါပေမယ့် သူတို့တွေ မရသွားပါဘူး။ အခုတော့ ချင်းရွှေဟော်မြို့ရဲ့ တစ်ခြမ်းကိုတော့ တပ်ကပြန်သိမ်းနိုင်ပြီ။ ဟိုဖက်တစ်ခြမ်းပဲ ကျန်တော့တယ်”ဟု လုံခြုံရေးအဖွဲ့နှင့်နီးစပ်သူတစ်ဦးက NSS ကို ပြောသည်။
လက်ရှိတွင် ရှမ်းပြည်နယ်မြောက်ပိုင်းမြို့နယ်များရှိ တိုက်ပွဲဖြစ်ပွားနေသည့်ဒေသများ ပြန်လည်တည်ငြိမ်ရေးအတွက် လုံခြုံရေးအရ ဆောင်ရွက်သင့်သည့်ကိစ္စရပ်များကို ဆက်လက်လုပ်ဆောင်သွားမည်ဟု နစကဘက်က တုံ့ပြန်ထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ယုဇနဥယျာဉ်မြို့တော်၌ ဆယ်ကျော်သက်အရွယ်အမျိုးသမီးတစ်ဦး မိုးကြိုးစက်ကွင်းထိမှန်၍ သေဆုံးခဲ့
RELATED POSTS
02 Oct 2024 | နိုင်ငံရေး,ပြည်တွင်း
01 Oct 2024 | နိုင်ငံရေး,နိုင်ငံတကာ
01 Oct 2024 | နိုင်ငံရေး,နိုင်ငံတကာ
01 Oct 2024 | နိုင်ငံရေး,နိုင်ငံတကာ