Pika (NSS) - အောက်တိုဘာ ၁၈ 

တူနီးရှားနိုင်ငံတွင် အောက်တိုဘာလ(၁၇)ရက်က ရာနှင့်ချီသော ဆန္ဒပြသူများသည် နိုင်ငံတွင်းရှိ ပြင်သစ်သံရုံး အပြင်ဖက်တွင် စုဝေးကာ ဆန္ဒပြခဲ့ကြသလို အမေရိကန်ကို ပြစ်တင်ရှုတ်ချခဲ့ကြောင်းလည်း သိရသည်။

ထို့အပြင် အီရန်နိုင်ငံတွင်လည်း ရာနှင့်ချီသောဆန္ဒပြသူများသည် တီဟီရန်မြို့ရှိ ဗြိတိန် နှင့် ပြင်သစ်သံရုံးများ အပြင်ဖက်တွင် စုဝေးကာဆန္ဒပြခဲ့ကြကြောင်း သိရသည်။ ထို့အပြင် လက်ဘနွန်နိုင်ငံရှိ အမေရိကန်သံရုံး အပြင်ဖက်တွင်လည်း ရာနှင့်ချီသောလူများသည် စုဝေးကာ ဆန္ဒပြခဲ့ကြကြောင်း သိရသည်။

လုံခြုံရေးတပ်ဖွဲ့ဝင်များသည် ဆန္ဒပြသူများကို လူစုခွဲရန်အတွက် မျက်ရည်ယိုဗုံးများကို အသုံးပြုခဲ့ကြောင်းလည်း သိရသည်။ အစ္စရေးသည် ဂါဇာကမ်းမြောင်ဒေသရှိ ဆေးရုံတစ်ရုံကို ဗုံးကြဲတိုက်ခိုက်ခဲ့ခြင်းကြောင့် အနည်းဆုံး လူ(၅ဝဝ) သေဆုံးခဲ့ပြီးနောက် ယခုကဲ့သို့ ဆန္ဒပြပွဲများပေါ်ပေါက်လာခဲ့ခြင်းဖြစ်သည်။ အဆိုပါဗုံးကြဲတိုက်ခိုက်မှုနှင့် ပတ်သက်ပြီး တူနီးရှား နှင့် အီရန်ရှိ ပြည်သူအများအပြားက စိတ်ဆိုးဒေါသဖြစ်ကာ ယခုကဲ့သို့ ဆန္ဒပြခဲ့ကြခြင်းဖြစ် သည်။ အနည်းဆုံးလူ(၅ဝဝ)သေဆုံးခဲ့သော ဆေးရုံအပေါ် ဗုံးကြဲတိုက်ခိုက်မှုနှင့်ပတ်သက်ပြီး ပါလက်စတိုင်း ကျန်းမာရေးဝန်ကြီးဌာနက အစ္စရေးကို ပြစ်တင်ရှုတ်ချခဲ့ကြောင်းလည်း သိရသည်။

တူနီးရှားရှိ ဆန္ဒပြသူများက "အမေရိကန်နဲ့ ပြင်သစ်တို့ဟာ ဇီယွန်ဝါဒီရဲ့မိတ်ဖက်တွေပဲဖြစ်ပါတယ်။ အမေရိကန်နဲ့ ပြင်သစ်တို့ဟာ တူနီးရှားမှာရှိတဲ့ ၎င်းတို့ရဲ့သံတမန်တွေကို ပြန်လည်ခေါ်ယူသင့်ပါတယ်။ တူနီးရှားနယ်မြေမှာ အမေရိကန်သံရုံး မရှိသင့်ပါဘူး" ဟု အော်ဟစ်ပြောဆိုခဲ့ကြသည်။

အီရန်ရှိ ဆန္ဒပြသူများသည် တီဟီရန်မြို့ရှိ ပြင်သစ်သံရုံး၏ နံရံများကို ကြက်ဥများဖြင့် ပစ်ပေါက်ကာ ဆန္ဒပြခဲ့ကြကြောင်းလည်း သိရသည်။ ဆန္ဒပြသူများက "ပြင်သစ်နဲ့ ဗြိတိန်တို့ဟာ သေသင့်ပါတယ်" ဟု အော်ဟစ်ပြောဆိုခဲ့ကြသည်။ ဂါဇာကမ်းမြောင်ဒေသရှိ ဆေးရုံကို ဗုံးကြဲတိုက်ခိုက်ခြင်းနှင့်ပတ်သက်ပြီး အစ္စရေးကို နိုင်ငံအများအပြားက ပြစ်တင်ရှုတ်ချခဲ့ကြောင်းလည်း သိရသည်။