ယူကရိန်းစစ်ပွဲကို အနောက်အုပ်စုနိုင်ငံများက ငြီးငွေ့နေပြီဖြစ်ကြောင်း ယူကရိန်းဘဏ္ဍာရေးဝန်ကြီး ဝန်ခံပြောဆို
Pika (NSS) - အောက်တိုဘာ ၁၆
ယူကရိန်းကို ကူညီထောက်ပံ့ပေးနေသော အနောက်အုပ်စုနိုင်ငံများသည် ၎င်းတို့၏ ပြည်တွင်းရေးကိစ္စများ နှင့် ပထဝီဝင်နိုင်ငံရေးတင်းမာမှုများကို အာရုံစိုက်လာသောကြောင့် ယူကရိန်းအတွက် ငွေကြေးထောက်ပံ့မှုများတွင် အခက်အခဲများရှိလာခဲ့ကြောင်း ယူကရိန်းဘဏ္ဍာရေးဝန်ကြီးဆာဂေးမာချန်ကိုက ဝန်ခံပြောခဲ့သည်။
ဆာဂေးမာချန်ကိုက "ကူညီပံ့ပိုးမှုတွေ ဆက်လက်လုပ်ဆောင်ပေးဖို့ အနောက်အုပ်စုနိုင်ငံတွေကို စည်းရုံးသိမ်းသွင်း ရာမှာ ယူကရိန်းဟာ အရင်ကထက်နှစ်ဆလောက် ပိုမိုအားထုတ်ရပါလိမ့်မယ်။ ကျွန်တော်တို့ရဲ့ မိတ်ဖက်နိုင်ငံတွေ ကြားမှာ ငြီးငွေ့မှုတွေ၊ အားနည်းလာတာတွေကို အများကြီးတွေ့မြင်နေရပါတယ်။ သူတို့ဟာ ယူကရိန်းစစ်ပွဲကို မေ့ပစ်ချင်နေပေမယ့် စစ်ပွဲကတော့ ဆက်လက်ဖြစ်ပွားနေတုန်းပါပဲ" ဟု ပြောခဲ့သည်။
ယူကရိန်းအပေါ် အနောက်အုပ်စုနိုင်ငံများ၏ အာရုံစိုက်မှုနည်းပါးလာရသည့် အဓိကအကြောင်းအရင်းထဲမှ တစ်ခု မှာ အစ္စရေး-ဟားမက်စစ်ပွဲကြောင့်ဖြစ်ကြောင်း ဆာဂေးမာချန်ကိုက ပြောခဲ့သည်။ အစ္စရေး-ဟားမက်စစ်ပွဲသည် အရေးကြီးသော စွမ်းအင်ထောက်ပံ့သည့်နိုင်ငံများနှင့် ပို့ဆောင်ရေးလမ်းကြောင်းအတွက် အချက်အချာကျသည့် နေရာတစ်ခုဖြစ်သော အရှေ့အလယ်ပိုင်းဒေသသို့ပျံ့နှံ့လာကာ ကမ္ဘာ့စီးပွားရေးတစ်ခုလုံးအပေါ် ထိခိုက်မှုများရှိ လာမည်ကို နိုင်ငံအများအပြားက စိုးရိမ်နေကြကြောင်းလည်း သိရသည်။
ထို့အပြင် လာမည့်နှစ်တွင် ကျင်းပမည့် အမေရိကန်နှင့် ဥရောပရှိနိုင်ငံများ၏ ရွေးကောက်ပွဲများသည် နောက်ထပ် အာရုံထွေပြားစရာကိစ္စတစ်ခုဖြစ်ကြောင်း ဆာဂေးမာချန်ကိုက ပြောကြားခဲ့သည်။ နိုင်ငံအများအပြားရှိ ပထဝီဝင် နိုင်ငံရေးများနှင့် ပြည်တွင်းနိုင်ငံရေးအခြေအနေများသည် ယူကရိန်းအပေါ် ၎င်းတို့၏ အာရုံစူးစိုက်မှုများကို လျော့ကျလာစေကြောင်း ဆာဂေးမာချန်ကိုက ပြောခဲ့သည်။
ယူကရိန်းသည် ၂ဝ၂၄ ခုနှစ်တွင် ၎င်း၏ အမေရိကန်ဒေါ်လာ(၃၄)ဘီလျံ အသုံးစရိတ်လိုအပ်ချက်များကို ကာမိစေရန် အတွက် လက်ရှိအချိန်တွင် အနောက်အုပ်စုနိုင်ငံများ၏ ဘဏ္ဍာရေးအကူအညီများကို လိုအပ်နေကြောင်းလည်း သိရသည်။ ဆာဂေးမာချန်ကိုက "နိုင်ငံတကာငွေကြေးရန်ပုံငွေအဖွဲ့ IMF အစီအစဉ်ကနေ အမေရိကန်ဒေါ်လာ (၅ ဒသမ ၄) ဘီလျံထောက်ပံ့ပေးဖို့ ကတိပြုထားတာမျိုးတွေရှိပါတယ်။
ဂျပန်နဲ့ ဗြိတိန်နိုင်ငံတို့ကလည်း ကတိပြုတာမျိုးတွေ ရှိလာမယ်လို့ ကျွန်တော်တို့မျှော်လင့်ထားပါတယ်။ ပြီးတော့ ကျွန်တော်တို့ရဲ့အဓိကမိတ်ဖက်ဖြစ်တဲ့ အမေရိကန်နဲ့ ဥရောပသမဂ္ဂတို့ကိုလည်း အားကိုးပါတယ်" ဟု ပြောခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဂျပန်နိုင်ငံ၏ ပင်လယ်စာတင်သွင်းမှုများကို ပိတ်ပင်လိုက်ကြောင်း ရုရှားအစိုးရပြော
RELATED POSTS
24 Oct 2024 | နိုင်ငံရေး,နိုင်ငံတကာ
24 Oct 2024 | နိုင်ငံရေး,နိုင်ငံတကာ
23 Oct 2024 | နိုင်ငံရေး,နိုင်ငံတကာ