စော (NSS) - ဇူလိုင် ၈

ဇူလိုင်လ ၄ ရက်မှ ၆ ရက်အတွင်း ဝမ်းပျက်ဝမ်းလျှောရောဂါကြောင့် ဆေးရုံတက်လူနာအရေအတွက် မြင့်တက်ခဲ့သော်လည်း အများစုမှာ သာမန်ဝမ်းပျက်ဝမ်းလျှောရောဂါဖြစ်ပွားသူများဖြစ်နေကြောင်း ကျန်းမာရေးဝန်ကြီးဌာနက အသိပေးထုတ်ပြန်ထားသည်။

ကျန်းမာရေးဝန်ကြီးဌာနက ယမန်နေ့(ဇူလိုင်လ ၇ ရက်)နေ့ ညပိုင်းတွင် အထက်ပါကဲ့သို့ ထုတ်ပြန်ထားခြင်းဖြစ်သည်။ ရန်ကုန်တိုင်းအတွင်းရှိ ဆေးရုံများတွင် ယမန်နေ့ (ဇူလိုင်လ ၇ရက်)၊ နံနက် (၈)နာရီမှ ည (၈)နာရီအတွင်း ဝမ်းပျက်ဝမ်းလျှောရောဂါဖြင့် ဆေးရုံတက်ကုသသူ လူနာသစ်(၄၄)ဦးရှိခဲ့ကာ ၎င်းတို့အနက် (၂)ဦးမှာ ပြင်းထန်ဝမ်းပျက်ဝမ်းလျှောရောဂါဖြစ်ပွားသူလူနာများဖြစ်ပြီး ကျန်(၄၂)ဦးမှာ သာမန်ဝမ်းပျက်ဝမ်းလျှောရောဂါဖြစ်ပွားသူ လူနာများဖြစ်ကြောင်း သိရသည်။

ပြီးခဲ့သည့် ဇူလိုင်လ ၆ ရက်တွင် ဝမ်းပျက်ဝမ်းလျှောရောဂါလူနာသစ် (၆၃)ဦးရှိခဲ့သဖြင့် ယမန် နေ့ (ဇူလိုင်လ ၇ ရက်)တွင် လူနာသစ်တွေ့ရှိရမှုဦးရေ ကျဆင်းလာကြောင်း ကျန်းမာရေးဝန်ကြီးဌာနက ဆိုသည်။ ရန်ကုန်တိုင်း၊ ဒေါပုံမြို့နယ်တွင် ပြင်းထန်ဝမ်းပျက်ဝမ်းလျှောရောဂါဖြစ်ပွားမှုနှင့်ပတ်သက်၍ လူနာသစ်ရှာဖွေခြင်းနှင့် ကျန်းမာရေးအသိပညာပေးခြင်းလုပ်ငန်းများကို ကွင်းဆင်းဆောင်ရွက်ခဲ့ရာ အထူးသဖြင့် ဇူလိုင်လ ၄ရက်မှ ၆ရက်အတွင်း ဆေးရုံတက်လူနာမြင့်တက်ခဲ့သော်လည်း အများစုမှာ သာမန်ဝမ်းပျက်ဝမ်းလျှောရောဂါဖြစ်ပွားသူလူနာများဖြစ်ကြောင်း သိရသည်။

ကျန်းမာရေးဝန်ကြီးဌာနအနေဖြင့် ရောဂါဖြစ်ပွားရာ မြို့နယ်၊ ရပ်ကွက်၊ နေအိမ်များသို့ ကွင်းဆင်း၍ လူနာတွေ့ရှိရာနေရာသို့ ဦးတည်ကာကွယ်ထိန်းချုပ်သည့်လုပ်ငန်းများဖြစ်သည့် လူနာများနေထိုင်ရာနေအိမ်များသို့ သွားရောက်ကာ ကူးစက်မှုဖြစ်စဉ်များအား စစ်ဆေးမေးမြန်းစုံစမ်းခြင်း၊ ရောဂါပိုးထိန်းချုပ်ခြင်းနှင့် အနီးကပ်ထိတွေ့သူများအား Contact Treatment  ပေးခြင်းများ ဆောင်ရွက်လျက်ရှိကြောင်း သိရသည်။ ထို့ပြင် အနီးပတ်ဝန်းကျင်တွင် လူနာသစ်များရှာဖွေခြင်း၊ ကျန်းမာရေးအသိပညာပေးခြင်း၊ သောက်သုံးရေသန့်ရှင်းရေးအတွက်  ကလိုရင်းဆေးခတ်ခြင်း၊ ရေသန့်ဆေးပြားများဝေခြင်း၊ အစားအစာသန့်ရှင်းရေးနှင့် ပတ်ဝန်းကျင်သန့်ရှင်းရေးလုပ်ငန်းများ ဆောင်ရွက်လျက်ရှိကြောင်း သိရသည်။

အလားတူ ရန်ကုန်တိုင်းအတွင်းရှိ ပြည်သူ့ဆေးရုံကြီးများတွင်လည်း ဝမ်းပျက်ဝမ်းလျှောရောဂါလူနာများကို စနစ်တကျဆေးကုသမှုပေးလျက်ရှိပြီး လိုအပ်သောဆေးဝါးများကိုလည်း ပံ့ပိုးပေးလျက်ရှိကြောင်း ကျန်းမာရေးဝန်ကြီးဌာနက ဆိုသည်။ 

ယခုရက်ပိုင်းအတွင်း ကာလဝမ်းရောဂါပိုးရှိသူ (၅)ဦးခန့်ရှိခဲ့၍ လမ်းဘေးစားသောက်ဆိုင်များကို ယာယီပိတ်ထားခြင်း၊ ရေနှင့် ပတ်ဝန်းကျင်သန့်ရှင်းမှုလုပ်ငန်းများကို ဆောင်ရွက်နေကြောင်းလည်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဇူလိုင်လ ၆ ရက် ညပိုင်းတွင် ပြောကြားထားသည်။