ပုံစာ - အင်းစိန်ဗဟိုအကျဉ်းထောင်တွင် ၂၀၂၃-၂၀၂၄ ပညာသင်နှစ်၊ Grade - 12 တက္ကသိုလ်ဝင်တန်းစာမေးပွဲဖြေဆိုနေသည့် မြင်ကွင်း

သန့်ဇင် (NSS) - ဇွန် ၁၁

၂၀၂၃- ၂၀၂၄ တက္ကသိုလ်ဝင်စာမေးပွဲကို အင်းစိန်ဗဟိုအကျဥ်းထောင်မှ ရာနှုန်းပြည့်အောင် မြင်သည့်အပြင် အကျဥ်းသားတစ်ဦးမှာ ဝိဇ္ဇာဘာသာတွဲ၌ မြန်မာတစ်နိုင်ငံလုံး တတိယအမှတ်အများဆုံးရရှိခဲ့ကြောင်း သိရသည်။

ယခုနှစ် မတ်လတွင် ကျင်းပခဲ့သော တက္ကသိုလ်ဝင်စာမေးပွဲအပြင် ဧပြီလ နှင့် မေလများတွင် အထူးအစီအစဉ်တစ်ရပ်အနေဖြင့် ကျင်းပပေးခဲ့သည့် တက္ကသိုလ်ဝင်စာမေးပွဲ အောင်စာရင်းများကို ယနေ့(ဇွန်လ ၁၁ ရက်)၊ နံနက် ၆ နာရီက သက်ဆိုင်ရာမြို့နယ်အသီးသီးရှိ စာစစ်ဌာနကျောင်းများတွင် တစ်ချိန်တည်းထုတ်ပြန်ကြောညာခဲ့သည်။ ထိုသို့ထုတ်ပြန်ကြေညာရာတွင် ၂၀၂၃- ၂၀၂၄ တက္ကသိုလ်ဝင်စာမေးပွဲကို အင်းစိန်ဗဟိုအကျဥ်းထောင်မှ အကျဥ်းသား(၇)ဦးဝင်ရောက်ဖြေဆိုခဲ့ပြီး ရာနှုန်းပြည့်အောင်မြင်ခဲ့ကြောင်း သိရသည်။

အဆိုပါအကျဥ်းသား(၇)ဦးတွင် (၄)ဘာသာဂုဏ်ထူးရှင်တစ်ဦး၊ (၃)ဘာသာဂုဏ်ထူးရှင် (၄) ဦး၊ (၂)ဘာသာဂုဏ်ထူးရှင် (၂)ဦးထွက်ပေါ်ခဲ့ပြီး ၎င်းတို့အနက်တစ်ဦးမှာ ဝိဇ္ဇာဘာသာတွဲဖြင့် မြန်မာတစ်နိုင်ငံလုံး တတိယအမှတ်အများဆုံးရရှိ အောင်မြင်ခဲ့ကြောင်း သိရသည်။

ထို့ပြင် IBECကျောင်းတိုက်မှ ယခုနှစ်ပညာသင်နှစ်တွင် တက္ကသိုလ်ဝင်တန်းအား ဝင်ရောက်ဖြေဆိုသူ (၁၃၄)ဦးရှိခဲ့သည့်အနက် (၃၆)ဦးအောင်မြင်ခဲ့ပြီး အဆိုပါကျောင်းတိုက်မှ ကျောင်း သားတစ်ဦးသည် (၅)ဘာသာဂုဏ်ထူးဖြင့် စစ်ကိုင်းတိုင်းဒေသကြီးတွင် အမှတ်အများဆုံးဖြစ်ခဲ့ကြောင်း သိရသည်။ ၂၀၂၃-၂၀၂၄ ပညာသင်နှစ် တက္ကသိုလ်ဝင်စာမေးပွဲတွင် ဝင်ရောက်ဖြေဆိုသူဦးရေ ၁၂၈,၆၃၅ ဦးရှိခဲ့ပြီး ၇၄,၅၉၂ ဦးအောင်မြင်ခဲ့သည့်အတွက် ၅၇ ဒသမ ၉၀ ရာခိုင် နှုန်း အောင်မြင်ခဲ့ကြောင်း သိရသည်။

ပြီးခဲ့သည့် ၂ဝ၂၃ ခုနှစ် တက္ကသိုလ်ဝင်စာမေးပွဲတွင် ဝင်ရောက်ဖြေဆိုသူ စုစုပေါင်း (၁၆၁၈၅ဝ) ဦးရှိခဲ့ရာမှ အောင်မြင်သူ(၁ဝ၉၈၅၁)ဦးရှိခဲ့ခြင်းကြောင့် အောင်ချက်ရာခိုင်နှုန်းမှာ (၆၇ ဒသမ ၈၇) ရာခိုင်နှုန်းဖြစ်ခဲ့သည့်အတွက် ယခုနှစ်တက္ကသိုလ်ဝင်စာမေးပွဲအောင်ချက်မှာ ယခင်နှစ်နှင့်နှိုင်းယှဉ်ပါက လျော့နည်းသွားသည်ကို တွေ့ရသည်။