Pika (NSS) - ဇန်နဝါရီ ၁၆ 

ရုရှားအစိုးရသည် ဇန်နဝါရီလ(၁၅)ရက်နေ့တွင် ယူကရိန်းစစ်သုံ့ပန်း(၂ဝဝ)ကျော်ကို နှစ်ရှည်ထောင်ဒဏ်များ ချမှတ်လိုက်ပြီး ၎င်းတို့အနက်မှ အချို့မှာ ထောင်ဒဏ်တစ်သက်တစ်ကျွန်း ချမှတ်ခံခဲ့ရကြောင်း သိရသည်။ 

ရုရှားတပ်ဖွဲ့များသည် ၂ဝ၂၂ ခုနှစ်တွင် Mariupol ဆိပ်ကမ်းမြို့ကို ဝိုင်းရံထားစဉ်အချိန်အတွင်း ယူကရိန်းတပ်သား ထောင်ချီကို ဖမ်းဆီးရမိခဲ့ခြင်းဖြစ်ကြောင်း သိရသည်။ ရုရှား၏ စစ်သုံ့ပန်းများအား စစ်ဆေးစီရင်ခြင်းမှာ တရားမဝင် ကြောင်း ယူကရိန်းနှင့် နိုင်ငံတကာလူ့အခွင့်အရေးအဖွဲ့များက ပြစ်တင်ရှုတ်ချပြောခဲ့သည်။ 

ရုရှား၏ စုံစမ်းစစ်ဆေးရေးကော်မတီအကြီးအကဲ Alexander Bastrykin က "အရပ်သားတွေကို သတ်ဖြတ်ခြင်းနဲ့ စစ်သုံ့ပန်းတွေကို ညှင်းပန်းနှိပ်စက်ခြင်းတို့အတွက် ယူကရိန်းတပ်ဖွဲ့ဝင်(၂ဝဝ)ကျော်ကို နှစ်ရှည်ထောင်ဒဏ်တွေ ချမှတ်ခဲ့ပါတယ်။ အကြီးတန်းအရာရှိတွေ အပါအဝင် ယူကရိန်းရဲ့စစ်ဘက်ဆိုင်ရာဝန်ထမ်းတွေကို တရားစွဲဆိုဖို့ ကြိုးပမ်းမှုတွေကို ဆက်လက်လုပ်ဆောင်သွားမှာပါ" ဟု ပြောခဲ့သည်။

ယူကရိန်းစစ်သုံ့ပန်း အများအပြားကို ရုရှားသိမ်းယူထားသော ယူကရိန်းနိုင်ငံအရှေ့ပိုင်းတွင် ထိန်းသိမ်းထားပြီး အချို့ကို ရုရှားနိုင်ငံသို့ ဖမ်းဆီးခေါ်ဆောင်သွားကြောင်းလည်း သိရသည်။ သို့သော်လည်း ယူကရိန်းစစ်သုံ့ပန်းများ ကို ပြစ်ဒဏ်ချမှတ်ခြင်းအား ရုရှား (သို့မဟုတ်) သိမ်းပိုက်ထားသော ယူကရိန်းနယ်မြေနှစ်ခုမှ မည်သည့်နေရာတွင် လုပ်ဆောင်ခဲ့သည်ဆိုသည့်အချက်ကို Alexander Bastrykin က ထုတ်ဖော်ပြောဆိုခဲ့ခြင်းမျိုး မရှိခဲ့ကြောင်းလည်း သိရသည်။

ယူကရိန်းစစ်သုံ့ပန်း(၂၄၂)ဦးကို သိမ်းပိုက်ထားသော ယူကရိန်းနယ်မြေတွင် ပြစ်ဒဏ်များချမှတ်ခဲ့ကြောင်း စုံစမ်း စစ်ဆေးရေးကော်မတီ သတင်းရင်းမြစ်များကို ကိုးကားပြီး RT က ဖော်ပြခဲ့သည်။ ရုရှား နှင့် ယူကရိန်းတို့သည် ပြီးခဲ့သည့်ဇန်နဝါရီလ(၃)ရက်တွင် ရာနှင့်ချီသော စစ်သုံ့ပန်းများကို အပြန်အလှန်လဲလှယ်ခဲ့ကြပြီး ပထမဆုံးအကြိမ် အဖြစ် လူသိရှင်ကြား ထုတ်ပြန်ကြေညာခဲ့ကြသည်။