မြူနစ် (NSS) - ဒီဇင်ဘာ ၈

တပ်မတော်သည် ပါတီစုံဒီမိုကရေစီစနစ်ကို သံယောင်လိုက်နေသော အဖွဲ့အစည်းမဟုတ်ကြောင်း နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

၎င်းက ယမန်နေ့(ဒီဇင်ဘာလ ၇ ရက်)တွင် နိုင်ငံအတွင်း ဖြစ်ပေါ်နေသောအခြေအနေများနှင့်ပတ်သက်၍ မီဒီယာများကို ရှင်းလင်းပြောကြားရာတွင် အထက်ပါကဲ့သို့ ပြောကြားခဲ့ခြင်းဖြစ်သည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်အနေဖြင့် ၂၀၀၈ ဖွဲ့စည်းပုံအခြေခံဥပဒေတွင်ပါရှိသော တိုင်းဒေသကြီးနှင့်ပြည်နယ်များတွင် ဝန်ကြီးချုပ်များခန့်အပ်ခြင်း ပုဒ်မ ၂၆၁ အား ပြင်ဆင်နိုင်ရန် ငြိမ်းချမ်းရေးညီလာခံ၌ တရားဝင်ပြောကြားခဲ့ဖူးကြောင်း နစကမှ ဆိုသည်။

“ပုဒ်မ ၂၆၁ ရဲ့အနှစ်သာရအရ သက်ဆိုင်ရာတိုင်းဒေသကြီးနဲ့ ပြည်နယ်တွေက လွှတ်တော်ကိုယ်စားလှယ်တွေထဲက လွှတ်တော်ကိုယ်စားလှယ်တစ်ဦးကို သမ္မတကခန့်ရတာဖြစ်ပါတယ်။ ရခိုင်ပြည်နယ်မှာ အဲဒီအချိန်တုန်းက ဒီကိစ္စနဲ့ပတ်သက်ပြီး ရခိုင်လွှတ်တော်က သူတို့ထောက်ခံတဲ့ သူကိုတင်ချင်ပါတယ်။ ဒါနဲ့ပတ်သက်ပြီး တပ်မတော်အနေနဲ့လည်း လွှတ်တော်ကနေ အများစုထောက်ခံတဲ့ လွှတ်တော်ကိုယ်စားလှယ်ကို ပြည်နယ်နဲ့တိုင်းဒေသကြီးဝန်ကြီးချုပ်အဖြစ် ခန့်အပ်ဖို့ စဉ်းစားသင့်တယ်လို့ ကျွန်တော်တို့ ပြောခဲ့ပါတယ်” ဟု ဗိုလ်ချုပ်ဇော်မင်းထွန်းက ပြောသည်။

သို့သော် ယင်းအချိန်တွင် ဒီမိုကရေစီအရေး၊ ဖက်ဒရယ်အရေး ကြွေးကြော်နေသော အစိုးရအနေဖြင့် ငြိမ်သတ်နေခဲ့သည်ဟု ၎င်းက ဆက်လက်ပြော သည်။

“အဲဒီအချိန်တုန်းက အခု ဒီမိုကရေစီတို့၊ ဖက်ဒရယ်တို့ ကြွေးကြော်နေတဲ့သူများသည် အစိုးရဖြစ်ပါတယ်။ တုတ်တုတ်မှ မလှုပ်ခဲ့ပါဘူး။ အဲဒီတော့ ကျွန်တော်ပြောချင်တာက တိုင်းရင်းသားများအနေ နဲ့ တိုင်းရင်းသားများ၊ ပြည်သူလူထုများ အလိုရှိတဲ့ ပါတီစုံဒီမိုကရေစီစနစ်ကို တပ်မတော်အစိုးရက ဦးဆောင်ပြီး ဖော်ဆောင်ပေးခဲ့တာဖြစ်ပါတယ်။ အခုအထိ ဒီစနစ်ကို အာမခံပါတယ်လို့လည်း ပြောထားတာဖြစ်ပါတယ်။ တပ်မတော်အစိုးရသည်၊ တပ်မတော်သည် ပါတီစုံဒီမိုကရေစီစနစ်ကို သံယောင်လိုက်နေတဲ့အဖွဲ့အစည်းမဟုတ်ပါဘူး” ဟု နစကပြောခွင့်ရက ဆိုသည်။

လက်ရှိဖြစ်ပေါ်နေသော လက်နက်ကိုင်ပဋိပက္ခများ အမြန်ချုပ်ငြိမ်းရေးအတွက် တပ်မတော်၊ လုံခြုံရေးတပ်ဖွဲ့ဝင်များအပြင် ပြည်သူလူထု၏ ပူးပေါင်းပါဝင်ဆောင်ရွက်မှုသည် အရေးကြီးကြောင်းလည်း နစကဘက်က မေတ္တာရပ်ခံထားသည်။

ထို့ပြင် နိုင်ငံအတွင်း၌ အကြမ်းဖက်မှုများကို အားပေးလုပ်နေသော NUG၊ PDF နှင့် ၎င်းတို့၏ နောက်ကွယ်တွင် ဒီမိုကရေစီ အမည်ခံထားသည့် နိုင်ငံကြီးများရှိနေပြီး မြန်မာနိုင်ငံ အလုံးစုံပျက်သုဉ်းရေးကို ဦးတည်ဆောင်ရွက်နေသည်ဟု နစကမှ ဆိုသည်။

ဒီမိုကရေစီအရေး၊ ဖက်ဒရယ်အရေး ကြွေးကြော်ထားသူများအနေဖြင့် ရဟန်းသံဃာ အပါအဝင် ဆရာ၊ ဆရာမ နှင့် ကျန်းမာရေးဝန်ထမ်းများကို သတ်ဖြတ်နေသည့်အပြင် ပြည်သူလူထု၏အခြေခံအဆောက်အဦးဖြစ်သော လမ်း၊ တံတား၊ လျှပ်စစ်တာဝါတိုင်များကို ဖျက်ဆီးနေကြောင်းလည်း နစကပြောခွင့်ရက ပြောသည်။