ကျော် (NSS) - ဒီဇင်ဘာ ၇

နိုင်ငံတော်ကိုတည်ဆောက်ရာတွင် ကဏ္ဍပေါင်းစုံက မဆုတ်မနစ်သော ဇွဲ၊ လုံ့လ၊ ဝီရိယကြီးမားစွာဖြင့် စွမ်းစွမ်းတမံ ကြိုးပမ်းဆောင်ရွက်ကြသူများအတွက် ဂုဏ်ထူးဆောင်ဘွဲ့၊ ဂုဏ်ထူးဆောင်တံဆိပ်များကို လာမည့် လွတ်လပ်ရေးနေ့၌ ပေးအပ်ချီးမြှင့်သွားမည်ဖြစ်ကြောင်း သိရသည်။

ဂုဏ်ထူးဆောင်ဘွဲ့ ချီးမြှင့်အပ်နှင်းခံရမည့်ပုဂ္ဂိုလ်များသည် သားစဉ်မြေး ဆက်ဂုဏ်ယူဝင့်ကြွားနိုင်သော ထိုက်တန်သည့်စွမ်းဆောင်ရည်များရှိရမည်ဖြစ်ကြောင်း နစက ဒုဥက္ကဋ္ဌ၊ ဒုတိယဗိုလ်ချုပ်မှူးကြီးစိုးဝင်းက ပြောသည်။

ယမန်နေ့(ဒီဇင်ဘာလ ၆ ရက်)က နေပြည်တော်၌ ကျင်းပသည့် ၂၀၂၄ ခုနှစ်အတွက် ဂုဏ်ထူးဆောင်ဘွဲ့များ၊ ဂုဏ်ထူးဆောင်တံဆိပ်များ ချီးမြှင့်အပ်နှင်းရန် စိစစ်ရေးအဖွဲ့အစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

နိုင်ငံတော်အတွက် ထူးကဲစွာ ဘာသာသာသနာ့အကျိုးဆောင်ရွက်ခဲ့ကြသည့် သာသနာ့အာဇာနည်များ၊ လူပုဂ္ဂိုလ်များကို ဂုဏ်ထူးဆောင်ဘွဲ့များ ၊ဂုဏ်ထူးဆောင်တံဆိပ်များနှင့် စွမ်းဆောင်မှုဆိုင်ရာဂုဏ်ထူးဆောင်တံဆိပ်များ ချီးမြှင့်သွားမည်ဖြစ်ကြောင်း ၎င်းကပြောသည်။

ထို့ပြင် နိုင်ငံတော်တည်ငြိမ်အေးချမ်းရေးနှင့်တရားဥပဒေစိုးမိုးရေးတာဝန်များ ထမ်းဆောင်ရာတွင် မိမိကိုယ်ကျိုးကို မငဲ့ကွက်ဘဲ ရဲဝံ့စွန့်စားစွာတာဝန်ထမ်းဆောင်ခဲ့ကြသော တပ်မတော်သားများ၊ မြန်မာနိုင်ငံရဲတပ်ဖွဲ့ဝင်များအပါအဝင် ပြည်သူ့ဝန်ထမ်းများကိုလည်း ချီးမြှင့်ပေးအပ်သွားမည်ဖြစ် ကြောင်း ပြောသည်။

ထိုသို့ ပေးအပ်ချီးမြှင့်နိုင်ရန် သာသနာတော်ဆိုင်ရာဘွဲ့တံဆိပ်တော်များပြဋ္ဌာန်းချက်၊ ၂၀၀၉ ခုနှစ် ဂုဏ်ထူးဆောင်ဘွဲ့များ၊ ဂုဏ်ထူးဆောင်တံဆိပ်များဆိုင်ရာပြဋ္ဌာန်းချက်၊ ၂၀၁၄ ခုနှစ် ဂုဏ်ထူးဆောင်ဘွဲ့များ၊ ဂုဏ်ထူး ဆောင်တံဆိပ်များဆိုင်ရာပြဋ္ဌာန်းချက်ကို ဖြည့်စွက်ပြဋ္ဌာန်းချက်တို့နှင့်အညီ စီစစ်သွားမည်ဖြစ်ကြောင်း ၎င်းကပြောသည်။

"နစက ဥက္ကဋ္ဌရဲ့ လမ်းညွှန်ချက်နဲ့အညီ နိုင်ငံတော်တာဝန်ထမ်းဆောင်ရင်း ထိခိုက်၊ ဒဏ်ရာရ၊ သေဆုံး၊ကျဆုံးခဲ့တဲ့ နိုင်ငံ့ဝန်ထမ်းတွေကိုလည်း ထောက်ပံ့ငွေတွေပေးအပ်နိုင်ဖို့အတွက် စိစစ်သွားမှာပါ"ဟု နစက ဒုဥက္ကဋ္ဌကပြောသည်။

ဂုဏ်ထူးဆောင်ဘွဲ့ရရှိသူများ၊ ဂုဏ်ထူးဆောင်တံ ဆိပ်ရရှိသူများကို ၂၀၂၄ ခုနှစ်၊ ဇန်နဝါရီလ ၄ ရက်(လွတ်လပ်ရေးနေ့)တွင် ချီးမြှင့်ပေးအပ်သွားမည် ဖြစ်ကြောင်း သိရသည်။