ကျော် (NSS) - ဒီဇင်ဘာ ၆

နစက ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်အား ရုရှားသမ္မတ မစ္စတာဗလာဒီမာပူတင်က Order of Alexander Nevsky ဘွဲ့တံဆိပ်အား ချီးမြှင့်ခဲ့ကြောင်း သိရသည်။

အဆိုပါ ဘွဲ့တံဆိပ်အား နစက ဥက္ကဋ္ဌထံ ယမန်နေ့ (ဒီဇင်ဘာလ ၅ ရက်) မွန်းလွဲပိုင်းက ရုရှားနိုင်ငံ၊ လုံခြုံရေးကောင်စီအတွင်းရေးမှူး Mr. Nikolai PATRUSHEV မှ နေပြည်တော်ရှိ နစက ဥက္ကဋ္ဌရုံး သံတမန်ဆောင်ဧည့်ခန်းမ၌ ပေးအပ်ခဲ့ခြင်းဖြစ်ကြောင်း သိရသည်။

ချီးမြှင့်အပ်နှင်းပွဲ၌ လုံခြုံရေးကောင်စီအတွင်း ရေးမှူး Mr. Nikolai PATRUSHEV က ရုရှားနိုင်ငံနှင့်ကဏ္ဍစုံပူးပေါင်းဆောင်ရွက်မှုများဖွံ့ဖြိုးတိုး တက်ရေးအတွက် တန်ဖိုးကြီးမားသောကြိုးပမ်းမှုများဆောင်ရွက်ပေးခဲ့၍ နစက ဥက္ကဋ္ဌအား Order of Alexander Nevsky ဘွဲ့တံဆိပ်ချီးမြှင့်အပ်နှင်းခြင်းဖြစ်သည်ဟု ပြောကြားခဲ့သည်။

ထို့ပြင် နစက ဒု-ဥက္ကဋ္ဌ၊ ဒုတိယဗိုလ်ချုပ်မှူးကြီးစိုးဝင်းကိုလည်း ရုရှားသမ္မတ မစ္စတာဗလာဒီမာပူတင်က Order of Friendship ဘွဲ့တံဆိပ်ကိုချီးမြှင့်ခဲ့ ကြောင်း သိရသည်။

"ရုရှားနဲ့မြန်မာချစ်ကြည်ရင်းနှီးမှု၊ ပူးပေါင်းဆောင်ရွက်မှုတွေကို ပိုမိုနီးကပ်ခိုင်မာအောင် စွမ်းစွမ်းတမံဆောင်ရွက်နိုင်ခဲ့လို့ ဒီဘွဲ့တံဆိပ်တွေ ပေးအပ်ခြင်းဖြစ်ပါတယ်။ အချိန်နှစ်နာရီနီးပါးကြာတဲ့ဆွေးနွေးမှုတွေလည်းလုပ်ခဲ့ပါတယ်။ ကျွန်တော်တို့ မြန်မာနိုင်ငံမှာလိုအပ်နေတဲ့ စွမ်းအင်လျှပ်စစ်ကဏ္ဍတွေကို အဓိကထားပြီး ဆွေးနွေးနိုင်ခဲ့ပါတယ်"ဟု နစက ပြောခွင့်ရပုဂ္ဂိုလ် ဗိုလ်ချုပ်ဇော်မင်းထွန်းကပြောသည်။

ထို့ပြင် နစက ဥက္ကဋ္ဌနှင့် ရုရှားနိုင်ငံ၊ လုံခြုံရေးကောင်စီအတွင်းရေးမှူးတို့သည် နိုင်ငံတကာရေးရာများနှင့်အာဆီယံရေးရာများ၊ နိုင်ငံတကာမျက်နှာစာ၌ မြန်မာနိုင်ငံဘက်မှ ဆက်လက်ရပ်တည်နေမှုတို့ကို ဆွေးနွေးခဲ့ကြကြောင်း သိရသည်။

ထို့အတူ မြန်မာ-ရုရှားနှစ်နိုင်ငံကာကွယ်ရေးနှင့်လုံခြုံရေးဆိုင်ရာပူးပေါင်းဆောင်ရွက်မှုတိုးမြှင့်နိုင်ရေး၊ အကြမ်းဖက်မှုတိုက်ဖျက်ရေးပူးပေါင်းဆောင် ရွက်မှု၊ အကြမ်းဖက်မှုတိုက်ဖျက်ရေးအတွက် သတင်းအချက်အလက်များ အပြန်အလှန်ဖလှယ်ရေးတို့ကိုလည်း ဆွေးနွေးခဲ့ကြကြောင်း သိရသည်။

ထို့ပြင် မြန်မာ-ရုရှားတပ်မတော်နှစ်ရပ်ကြား ရေတပ်လေ့ကျင့်ခန်းအောင်မြင်စွာဆောင်ရွက်နိုင်ခဲ့မှု၊ လေကြောင်းတိုက်ရိုက်ပျံသန်းမှုနှင့် ခရီးသွားကဏ္ဍမြှင့်တင်ရေး၊ ကျန်းမာရေး၊ စွမ်းအင်၊ လျှပ်စစ်၊ ရေနံနှင့်သဘာဝဓာတ်ငွေ့၊ စိုက်ပျိုးရေးလုပ်ငန်းသုံး ဓာတ်မြေဩဇာထုတ်လုပ်ရေး၊ ကုန်သွယ်မှုနှင့်သံမဏိထုတ်လုပ်မှုလုပ်ငန်းများ တိုးတက်ရေးတို့တွင် ပူးပေါင်းဆောင်ရွက်မှုများတိုးမြှင့်ရန်လည်း ဆွေးနွေးခဲ့ကြကြောင်း သိရသည်။

"မြန်မာနိုင်ငံဟာ ရုရှားနိုင်ငံအတွက် အရှေ့တောင်အာရှမှာ ယုံကြည်စိတ်ချရမှုအရှိဆုံးနဲ့ခိုင်မာမှုအရှိဆုံးနိုင်ငံလို့ သတ်မှတ်ပြီးဖြစ်ပါတယ်။ ဒါကြောင့် ရုရှား-မြန်မာနှစ်နိုင်ငံပူးပေါင်းဆက်ဆံရေး၊ ရုရှား-မြန်မာ နှစ်နိုင်ငံချစ်ကြည်ရင်းနှီးရေးကိစ္စတွေကို ရှေ့ဆက်တိုးတက်အောင်ဆောင်ရွက်သွားမှာပါ"ဟု ဗိုလ်ချုပ်ဇော်မင်းထွန်းကပြောသည်။

အလားတူ ရုရှားနိုင်ငံ၊ လုံခြုံရေးကောင်စီအတွင်းရေးမှူး H.E. Mr Nikolai PATRUSHEV ကိုလည်း စွမ်းဆောင်မှုဆိုင်ရာဂုဏ်ထူးဆောင်ဘွဲ့ဖြစ်သည့် သရေစည်သူဘွဲ့အား နစက ဥက္ကဋ္ဌ ၊ ဗိုလ်ချုပ်မှူးကြီးမင်းအောင်လှိုင်က ပြန်လည်ချီးမြှင့်ခဲ့ကြောင်း သိရသည်။