Pika (NSS) - နိုဝင်ဘာ ၂၂

ပြင်သစ်အစိုးရသည် အာမေးနီးယားနိုင်ငံကို လက်နက်များထောက်ပံ့ပေးခြင်းဖြင့် ကော့ကေးဆပ်ဒေသတွင် ပဋိပက္ခများဖြစ်ပွားလာအောင် လှုံ့ဆော်ပေးနေကြောင်း အဇာဘိုင်ဂျန်သမ္မတ Ilham Aliyev က နိုဝင်ဘာလ(၂၁)ရက်တွင် စွပ်စွဲပြောဆိုခဲ့သည်။ 

အဇာဘိုင်ဂျန် နှင့် အာမေးနီးယားတို့သည် Nagorno-Karabakh ဒေသအတွက် ဆယ်စုနှစ်များစွာကြာ ပဋိပက္ခ ဖြစ်ပွားနေခဲ့ကြောင်းလည်း သိရသည်။ ထို့အပြင် အဇာဘိုင်ဂျန်အစိုးရသည် ပြီးခဲ့သည့်စက်တင်ဘာလတွင် အာမေးနီးယားလူမျိုး အများဆုံးနေထိုင်သော Nagorno-Karabakh ဒေသအပေါ် စစ်ဆင်ရေးများ လုပ်ဆောင်ခဲ့ ကြောင်း သိရသည်။

ထို့နောက် အဇာဘိုင်ဂျန်အစိုးရနှင့် အာမေးနီးယားခွဲထွက်ရေးသမားများကြား သဘောတူညီမှုရရှိပြီးနောက် Nagorno-Karabakh ဒေသသည် အဇာဘိုင်ဂျန်အစိုးရအုပ်ချုပ်မှုအောက်သို့ ပြန်လည်ရောက်ရှိခဲ့ကြောင်း သိရသည်။ 

Ilham Aliyev က "ပြင်သစ်နိုင်ငံဟာ အာမေးနီးယားနိုင်ငံကို လက်နက်ထောက်ပံ့ပေးခြင်း၊ အားမေးနီးယားမှာရှိတဲ့ ခွဲထွက်ရေးသမားတွေကို အားပေးခြင်းဖြင့် ကျွန်တော်တို့ဒေသတွင်းမှာ စစ်ပွဲအသစ်တွေ ဖြစ်ပွားလာစေဖို့အတွက် သူတို့ရဲ့စစ်လိုလားတဲ့ မူဝါဒကို ကျင့်သုံးနေပါတယ်" ဟု ပြောခဲ့သည်။

ပြင်သစ်အစိုးရသည် ၎င်း၏ ယခင်နှင့်လက်ရှိ ကိုလိုနီနယ်မြေများတွင်သာမက South Caucasus ဒေသတွင်လည်း ခွဲထွက်ရေးသမားများကို ထောက်ခံအားပေးကာ တည်ငြိမ်မှုများကို နှောင့်ယှက်နေကြောင်း Ilham Aliyev က ပြောခဲ့သည်။ 

ကော့ကေးဆပ်ဒေသတွင်းရှိ နယ်မြေပဋိပက္ခများတွင် အာမေးနီးယားလိုလားသော ဘက်လိုက်မှုများအတွက် ပြင်သစ်အစိုးရသည် အဇာဘိုင်ဂျန်အစိုးရ၏ ပြစ်တင်ဝေဖန်မှုများကို မကြာခဏခံရလေ့ရှိကြောင်း သိရသည်။