ဂျန်ဇက် (NSS) - အောက်တိုဘာ ၂၄

အစ္စရေးစစ်တပ်သည် ဂါဇာဒေသကို ဗုံးကြဲတိုက်ခိုက်မှုများ ဆက်လက်လုပ်ဆောင်နေခြင်းကြောင့် ဟားမက်စ် နှင့် အစ္စရေးကြားအပစ်အခတ်ရပ်စဲရေးရရှိစေရန် အလားလာနည်းနေကြောင်းသိရသည်။နိုင်ငံတကာအဖွဲ့စည်းများသည် ဂါဇာဒေသအပေါ်တိုက်ခိုက်နေသည့် အစ္စရေး၏တိုက်ခိုက်မှုများအ ဆုံးသတ်ရန်တောင်းဆိုနေသော်လည်း အစ္စရေးကတိုက်ခိုက်မှုများရပ်တန့်ခြင်းမရှိဘဲ ဆက်လက်တိုက်ခိုက်နေဆဲဖြစ်ကြောင်းသိရသည်။ 

အစ္စရေး နှင့် ဟားမက်စ်အဖွဲ့ကြားဖြစ်ပွားနေသည့်စစ်ပွဲကြောင့် ကုလသမဂ္ဂအဖွဲ့လက်အောက်ခံဝန်ထမ်းဦးရေ အနည်းဆုံး ၃၅ ဦးအထိ သေဆုံးထားကြောင်းသိရသည်။ ပြီးခဲ့သော ၂၄ နာရီအတွင်း ဂါဇာဒေသကို အစ္စရေး၏ဗုံးကြဲတိုက်ခိုက်မှုများကြောင့် ကုလသမဂ္ဂ ဒုက္ခသည်များအေဂျင်စီဝန်ထမ်းအရေအတွက် ၆ ဦး သေဆုံးခဲ့ရာ သေဆုံးသူအရေအတွက် အနည်းဆုံး ၃၅ ဦးအထိ မြင့်တက်လာနေကြောင်းသိရသည်။

ပါလက်စတိုင်း နှင့် အစ္စရေးကြား ပြန်လည်ငြိမ်းချမ်းရေးရရှိစေရန်အတွက် အဓိကဦးပေးလုပ်ဆောင်သွားမည်ဖြစ်ကြောင်း တရုတ်နိုင်ငံခြားရေးဝန်ကြီးက ပြောသည်။ တရုတ်နိုင်ငံခြားရေးဝန်ကြီး ဝမ်ယိသည် အစ္စရေးနိုင်ငံခြားရေးဝန်ကြီးနှင့်တွေ့ဆုံဆွေးနွေးချိန်အတွင်း ယင်းကဲ့သို့ပြောဆိုခဲ့ခြင်းဖြစ်ပြီး  ငြိမ်းချမ်းရေးရရှိစေရန် အပြုသဘောဆောင်သောကြိုးပမ်းမှုများကို အားပေးထောက်ခံမည်ဟုပြောဆိုထားသည်။

အမေရိကန်တပ်ဖွဲ့များက ၎င်းတို့သည် ဆီးရီးယားနိုင်ငံအနောက်တောင်ပိုင်းရှိ အမေရိကန်စစ်အခြေ စိုက်စခန်းကို ဒရုန်းများဖြင့်တိုက်ခိုက်ရန် ကြိုးပမ်းများကို ဟန့်တားဖျက်ဆီးနိုင်ခဲ့ကြောင်းပြောသည်။အဆိုပါ ဒရုန်းများကို ပစ်ချဖျက်ဆီးချိန်အတွင်း ထိခိုက်ဒဏ်ရာရသူမရှိခဲ့ကြောင်း အမေရိကန်စစ်ဘက်ကထပ်မံပြောဆိုထားသည်။

အမေရိကန်သမ္မတ ဂျိုးဘိုင်ဒန်က ဂါဇာဒေသအပစ်ခတ်ရပ်စဲရေး မဆွေးနွေးခင် ဟားမက်စ်လက်နက် ကိုင်အဖွဲ့အနေဖြင့် ဖမ်းဆီးထားသော သူအားလုံးကို ပြန်လွှတ်ပေးစေလိုကြောင်းတိုက်တွန်းပြောဆိုလိုက်သည်။ ဖမ်းဆီးထားသူအားလုံးကို ပြန်လွှတ်ပေးမည်ဆိုလျှင် အပစ်ခတ်ရပ်စဲရေးဆွေးနွေးသွားမည်ဖြစ်ကြောင်း အမေရိကန်သမ္မတကထပ်မံပြောဆိုခဲ့သည်။