NSS - အောက်တိုဘာ ၂၂

ပဲခူးတိုင်း၊ ပေါက်ခေါင်းမြို့နယ်တွင် အမျိုးသားတစ်ဦးကို PDF အဖွဲ့က နေအိမ်အတွင်းဝင်ရောက်ကာ သေနတ်ဖြင့်ပစ်ခတ်သတ်ဖြတ်သွားခဲ့ကြောင်း ရဲတပ်ဖွဲ့က သတင်းထုတ်ပြန်ထားသည်။

ဖြစ်စဉ်မှာ ပြီးခဲ့သော အောက်တိုဘာလ ၁၉ ရက်၊ နံနက် ၇နာရီ ၄၅မိနစ်အချိန်တွင် ပေါက်ခေါင်းမြို့နယ်၊ သရက်တပင်ကျေးရွာ၌ အထက်ပါကဲ့သို့ ဖြစ်ပွားခဲ့ကြောင်း သိရသည်။

အဆိုပါကျေးရွာတွင် နေထိုင်သည့် ဦးလှဝေသည် ၎င်း၏နေအိမ်၌ ရှိနေစဉ် PDF အဖွဲ့အင်အား (၅)ဦးက ရောက်ရှိလာကာ နေအိမ်တွင်း ဝင်ရောက်ကာ သေနတ်ဖြင့်ပစ်ခတ်သတ်ဖြတ်သွားခဲ့ကြောင်း သိရသည်။

ထိုသို့သေနတ်ဖြင့် ပစ်ခတ်ခံရမှုကြောင့် ဦးလှဝေ(၆၄)နှစ်တွင် ဦးခေါင်းနောက်စေ့ကျည်ဖောက်ဝင်ဒဏ်ရာတစ်ချက်ရရှိကာ အခင်းဖြစ်ပွားရာနေရာ၌ သေဆုံးသွားခဲ့ကြောင်း သိရသည်။

အလားတူ နံနက် ၁၀ နာရီအချိန်တွင် မကွေးတိုင်း၊ တောင်တွင်းကြီးမြို့နယ်၊ တောင်တွင်းကြီး-မကွေးသွားကားလမ်း၊ မိုင်တိုင်အမှတ် (၂၈၅)မိုင်၊ တလုပ်ပင်ကျေးရွာအနီးတွင် ကျေးရွာခွဲတာဝန်ခံဖြစ်သူ အမျိုးသားတစ်ဦး သတ်ဖြတ်ခံခဲ့ရကြောင်း ရဲတပ်ဖွဲ့က ဆက်လက်ထုတ်ပြန်ထားသည်။

တောင်တွင်းကြီးမြို့နယ်၊ ဆုံကုန်းကျေးရွာတွင်နေထိုင်သည့် ကျေးရွာတာဝန်ခံဖြစ်သူ ဦးဖိုးသိန်းသည် တောင်ကြီးမြို့နယ်မှ ၎င်းနေထိုင်သည့် ကျေးရွာသို့ ဆိုင်ကယ်ဖြင့်တစ်ဦးတည်းပြန်စဉ် အထက်ပါနေရာအရောက်၌ PDF အဖွဲ့က သေနတ်ဖြင့် ပစ်ခတ်သတ်ဖြတ်သွားခဲ့ ကြောင်း သိရသည်။

ထိုသို့ သေနတ်ဖြင့်ပစ်ခတ်ခံရမှုကြောင့် ဦးဖိုးသိန်း(၆၁)နှစ်တွင် ဝဲပါးနှင့် ယာပါးကျည်ဖောက်ဝင် ဒဏ်ရာ(၂)ချက်ရရှိကာ အခင်းဖြစ်ပွားရာနေရာ၌ သေဆုံးသွားခဲ့ကြောင်း သိရသည်။

အထက်ပါ လုပ်ကြံသတ်ဖြတ်မှုများတွင် ပါဝင်ပတ်သက်သူများအား ဖော်ထုတ်ဖမ်းဆီးအရေး ယူနိုင်ရေးလုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။