စော (NSS) - အောက်တိုဘာ ၄

ရှမ်းပြည်နယ်၊ ကျောက်မဲမြို့ရှိ ပြောင်းပွဲရုံတစ်ရုံအတွက် လျှပ်စစ်မီးသွယ်တန်းပေးနေစဉ် အမျိုးသားတစ်ဦး ဓာတ်တိုင်ပေါ်မှပြုတ်ကျ၍ သေဆုံးခဲ့ကြောင်း သိရသည်။

ဖြစ်စဉ်မှာ ယမန်နေ့(အောက်တိုဘာလ ၃ ရက်)၊ မွန်းလွဲ(၁၁)နာရီအချိန်တွင် ကျောက်မဲမြို့၊ လုပ်ပါကျေးရွာ၊ ပုံဝိုးသွားလမ်းပေါ်၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း ကမ်းလင့်လက်များလူမှုကူညီရေးအသင်းထံမှ သိရသည်။

“သူက ကန်ထရိုက်နဲ့အလုပ်လာလုပ်ပေးတာပါ။ ကုမ္ပဏီဝန်ထမ်းပေါ့။ ပြောင်းပွဲရုံအတွက် လျှပ်စစ်မီးသွယ်တန်းပေးနေတာ တိုင်ပေါ်တက်တဲ့အချိန်မှာ ခြေချော်ကျသွားတာပါ။ ဆေးရုံရောက်တော့ ဆုံးသွားပါပြီ”ဟု ကမ်းလင့်လက်များလူမှုကူညီရေးအသင်းမှ တာဝန်ရှိသူတစ်ဦးက NSS ကိုပြောသည်။

အဆိုပါ အမျိုးသားသည် မောင်ဆဲလ် (၂၄)နှစ်ဖြစ်ပြီး နေပြည်တော် ၊ သာဝတ္ထိမြို့နယ်တွင် နေထိုင်သူတစ်ဦးဖြစ်ကြောင်း သိရသည်။

၎င်းသည် ဖြစ်စဉ်ဖြစ်ပွားပြီး ကျောက်မဲဆေးရုံသို့ ပို့ဆောင်စဉ် ဆေးရုံအရောက်၌ သေဆုံးခဲ့ခြင်းဖြစ်ကြောင်း သိရသည်။