သန့်ဇင်(NSS) - စက်တင်ဘာ ၂၁

မန္တလေးတိုင်း၊ သပိတ်ကျင်းမြို့နယ်တွင် ဆပ်ပြာခွက်များအတွင်း ထည့်၍သယ်ဆောင်လာသည့် ငွေကျပ်သိန်း(၅၅၀) တန်ဖိုးရှိ ဘိန်ဖြူများဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သတင်းထုတ်ပြန်ထား သည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ပြီးခဲ့သည့် စက်တင်ဘာလ ၁၈ ရက်၊ နံနက် ၉နာရီခွဲအချိန်တွင် သပိတ်ကျင်းမြို့နယ်၊ ဖော့တောကျေးရွာအနီးတွင် မော်တော်ယာဉ်များအား စစ်ဆေးရှာဖွေစဉ် ရှာဖွေတွေ့ရှိခဲ့ခြင်းဖြစ်သည်။

ထိုသို့ စစ်ဆေးရှာဖွေခဲ့ရာ မန္တလေးမြို့မှ မြစ်ကြီးနားမြို့ဘက်သို့ မောင်းနှင်လာသည့် ခရီးသည်တင်ကားပေါ်မှ လိုက်ပါလာသည့် မအေးစန္ဒာ၏ ခရီးဆောင်အိတ်အတွင်းမှ ဆပ်ပြာခွက်များအတွင်းထည့်ထားသော ငွေကျပ်သိန်း(၅၅၀) တန်ဖိုးရှိ ဘိန်းဖြူအလေးချိန် (၂ ဒသမ ၂) ကီလိုနှင့် လက်ကိုင်ဖုန်းတစ်လုံးတို့အား သိမ်းဆည်းရမိခဲ့ကြောင်း သိရသည်။

ဆက်လက် စစ်ဆေးဖော်ထုတ်ချက်အရ မွန်းလွဲ ၁၂နာရီ ၄၀မိနစ်အချိန်တွင် ၎င်းငှားရမ်းနေထိုင်သည့် ချမ်းအေးသာစံမြို့နယ်၊ ကန်ကောက်ရပ်ကွက်၊ ၅၄လမ်းနှင့်၅၅လမ်းကြား၊ ၂၉(C)လမ်းရှိ နေအိမ်အား ဝင်ရောက်ရှာဖွေခဲ့ရာ မနှင်းနှင်းဦးအား ငွေကျပ်(၈၅)သိန်းနှင့်အတူ လက်ကိုင်ဖုန်း တစ်လုံးတို့အား ထပ်မံသိမ်းဆည်းရမိခဲ့ကြောင်း သိရသည်။

ထို့ကြောင့် ၎င်းတို့(၂)ဦးအား သပိတ်ကျင်းမြို့မရဲစခန်းတွင် မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားပြီး ကွင်းဆက်များအား စစ်ဆေးဖော်ထုတ်လျက်ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့က သတင်းထုတ်ပြန်ထားသည်။