NSS - ဩဂုတ် ၂၇

မွန်ပြည်နယ်၊ ရေးမြို့နယ်တွင် ခရီးသည်တင်ကားကို KNU နှင့် PDF ပူးပေါင်းအဖွဲ့မှ လက်နက်ငယ်များဖြင့် ပစ်ခတ်တိုက်ခိုက်မှုကြောင့် ခရီးသည်(၂)ဦးထိခိုက်ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ပြီးခဲ့သည့် ဩဂုတ်လ ၂၄ ရက်၊ နံနက် ၅နာရီ ၁၅မိနစ်အချိန်တွင် ရေးမြို့နယ်၊ ရန်ကုန်-မော်လမြိုင်-ရေး ကားလမ်း၊ လိမ္မော်ခြံကျေးရွာအနီးတွင် ဖြစ်ပွားခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။

အဆိုပါ ခရီးသည်တင်ကားသည် ရန်ကုန်မှ ရေးမြို့သို့ မောင်းနှင်လာခြင်းဖြစ်ပြီး အထက်ပါကျေးရွာအနီးသို့ ဖြတ်သန်းမောင်းနှင်လာစဉ် KNU နှင့် PDF ပူးပေါင်းအဖွဲ့က လမ်း၏ဝဲဘက်ခြမ်းမှနေ၍ လက်နက်ငယ်များဖြင့် အကြောင်းမဲ့ပစ်ခတ်တိုက်ခိုက်ခဲ့ခြင်းဖြစ်ကြောင်း သိရသည်။

ထိုသို့ ပစ်ခတ်တိုက်ခိုက်မှုကြောင့် ဦးသိန်းမင်းတင် မောင်းနှင်ပြီး ယာဉ်နောက်လိုက် ဦးရဲရင်မြင့်မိုရ်နှင့် ဦးဝေလင်းပိုင်တို့လိုက်ပါလာသည့် “ရွှေပုလဲ” ခရီးသည်တင်ယာဉ်၏ ဝဲဘက်လေကာမှန်ကို ကျည် (၁)ချက်ထိမှန်ကာ ကားပေါ်၌ လိုက်ပါလာသည့် ခရီးသည် မဝါဝါဝင်း(၂၆)နှစ် နှင့် ဦးတင်ထွေး(၃၄)နှစ်တို့တွင် မှန်ကွဲစထိမှန်ဒဏ်ရာများရရှိခဲ့ကြောင်း သိရသည်။

ဖြစ်စဥ်အား ကျူးလွန်ခဲ့သည့် အကြမ်းဖက်သမားများအား ဥပဒေနှင့်အညီ ထိရောက်စွာအရေးယူနိုင်ရေးနှင့် နယ်မြေတည်ငြိမ်အေးချမ်းရေးအတွက် လိုအပ်သည့် လုံခြုံရေးလုပ်ငန်းစဉ်များ ဆက်လက်ဆောင် ရွက်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။