ဂျန်ဇက် (NSS) - ဇူလိုင် ၂၈ 

ယူကရိန်းကို အက်ဖ် ၁၆ တိုက်လေယာဉ်များ လွှဲပြောင်းပေးမယ်ဆိုရင်တောင် မြေပြင်တိုက်ပွဲမှာ ဆိုးရွားစွာ ထိခိုက် ဆုံးရှုံးနေခြင်းကို ပြောင်းလဲနိုင်မှာမဟုတ်ကြောင်း အမေရိကန်အမျိုးသားလုံခြုံရေးအကြံပေး ဂျိတ်ဆူလီဗန်က ထုတ်ဖော်ပြောလိုက်ပါတယ်။

အမေရိကန် နဲ့ မဟာမိတ်နိုင်ငံတွေဟာ ယူကရိန်းတိုက်လေယာဉ်မှူးတွေကိုအက်ဖ် ၁၆ တိုက်လေယာဉ်တွေနဲ့ လေ့ကျင့်သင်ကြားပေးမယ့်အစီအစဉ်ကို ဖန်တီးထားပေမယ့် ယူကရိန်းကိုအက်ဖ် ၁၆ တိုက်လေယာဉ်တွေ လွှဲပြောင်းပေးရေးနဲ့ပတ်သက်ပြီးမရေမရာဖြစ်လျက်ရှိနေကြောင်း သိရပါတယ်။ အက်ဖ် ၁၆ တိုက်လေယာဉ်တွေနဲ့ ယူကရိန်းတိုက်လေယာဉ်မှူးတွေကို လေ့ကျင့်သင့်ကြားပေးနေတာတွေကို အစီအစဉ်အတိုင်း ဆက်လက်လုပ်ဆောင်မှာဖြစ်ပေမယ့် အက်ဖ် ၁၆ တိုက်လေယာဉ်တွေဟာ ယူကရိန်းစစ်ရေးပဋိပက္ခမှာ အဓိကအခန်းကဏ္ဍက  ပါဝင်လာဖို့ အလားလာနည်းနေပါတယ်လို့ ၎င်းက ပြောပါတယ်။

၎င်းက "ရုရှားဟာ တိုက်လေယာဉ်မျိုးဆက်တွေထဲမှာ နောက်ဆုံးပေါ် တိုက်လေယာဉ်မျိုးဆက်တွေကို အစီးရေ ရာချီ ပိုင်ဆိုင်ထားတယ်။ အဲဒီနောက်ဆုံးပေါ် တိုက်လေယာဉ်တွေကို ရုရှားရဲ့တန်ပြန်ထိုးစစ်ဆင်မှုတွေထဲမှာ ပါဝင် မှု မရှိသေးဘူး" လို့ပြောပါတယ်။ 

ယူကရိန်းဟာ ရုရှားတပ်ဖွဲ့တွေကို အသာစီးရယူနိုင်ဖို့ အက်ဖ် ၁၆ တိုက်လေယာဉ်တွေ ကူညီပေးဖို့ အမေရိကန်ဦး ဆောင်တဲ့ အနောက်အုပ်စုနိုင်ငံတွေကို တောင်းဆိုလျက်ရှိနေကြောင်း သိရပါတယ်။ အမေရိကန်ဦးဆောင်တဲ့ အနောက်အုပ်စုနိုင်ငံတွေဟာ ယူကရိန်းတပ်ဖွဲ့ဝင်တွေကို အက်ဖ် ၁၆ တိုက်လေယာဉ်တွေနဲ့ လေ့ကျင့်သင်ကြားပေးမယ့် ကူညီထောက်ပံ့ပေးခြင်းမျိုးမရှိသေးကြောင်း သိရပါတယ်။ 

ယူကရိန်းဟာ ဇွန်လအစောပိုင်းတည်းက ရုရှားအပေါ်တန်ပြန် ထိုးစစ်ဆင်နေပေမယ့် မျှော်လင့်သလောက် အောင်မြင်မှုမရဘဲ ထိခိုက်ဆုံးရှုံးမှုများစွာဖြစ်လျက်ရှိနေကြောင်း သိရပါတယ်။ ရုရှားသမ္မတပူတင်က ယူကရိန်းကို အက်ဖ် ၁၆ တိုက်လေယာဉ်များ ပံ့ပိုးပေးကူညီပေးမယ်ဆိုရင်လည်း အက်ဖ် ၁၆ တိုက်လေယာဉ်တွေဟာ တင့်ကားတွေ၊ သံချပ်ကာကားတွေ ထိခိုက်ပျက်စီးသလိုမျိုး မီးလောင်ပျက်စီးမှာဖြစ်ကြောင်း သတိပေးထားပါတယ်။